Nyitipune Jë Së La Nöjei Perofeta—Amosa
1. Pine nemene laka, ketre jëne ithuecatre koi së la tulu i Amosa?
1 Hapeu, hna hane kö traqa koi epuni la xou troa cainöj, qa ngöne laka, tha hnei epuni kö hna hane ini aqeany? Maine eje hi, tro hamë ithuecatre koi epuni hnene la tulu i Amosa. Atre thupë mamoe angeic, nge ka eëny, ngo hnei Iehova hna hamëne koi angeice la trenge catre ka ijij, göi troa tro fë la ketre maca ka sisitria. (Amosa 1:1; 7:14, 15) Ketre ame mina fe enehila, Iehova pala hi a iëne la itre atr hna tha wang atrune kö. (1 Kor. 1:27-29) Nemene la itre xa ini hne së hna kapa qa ngöne la tulu i Amosa, nge ka nyipi ewekë kowe la huliwa ne cainöje së?
2. Pine nemene matre ijije tro sa cile catre kowe la itre ka icilekeu memine la huliwa së?
2 Catre Jë Së Qëmekene La Icilekeu: Hnei Amazia, ketre atre huuje ne la baselaia ne lo treene lao tribu ne Isaraela nge ka hmi koi idrola, hna drenge la hna perofetane hnei Amosa. Öni angeice koi Amosa: ‘Kötre jë! Nue eahuni pi! Itre ka hmi hë huni la!’ (Amosa 7:12, 13) Goi thoi fe Amazia koi Ieroboama Joxu, matre troa sewe Amosa troa kuca la hnëqa i angeic. (Amosa 7:7-11) Ngo tha xou i Amosa kö. Ame enehila, kola thele enexöle hnene la itre xa hene ne hmi thene la itre ka kuci politik, matre tro angatr a ce axösisine la itre hlue i Iehova. Ngo, ase hë Iehova canga thuemacanyi së ka hape, pëkö ewekë hna kuca nyine isi me easë hna troa ien.—Is. 54:17.
3. Nemene la lue mekune hna qatrenge hnene la maca hne së hna tro fë enehila?
3 Maca Ne Iameköti Me Manathith: Ngacama maca ne iameköti la hna tro fë hnei Amosa kowe lo treene lao tribu ne Isaraela, ngo hnei angeice hna umuthe la maca i angeic hnene la ketre hna thingehnaeane hnei Iehova: laka, tro ha xupe hmaca la lapa i angatr, nge nyimutre la itre manathithi hnei angatre hna troa kapa. (Amosa 9:13-15) Ka tu së mina fe enehila: easa thuemacanyi itre atr ka hape, calemi hë “la drai ne amekötine” i Akötresie, ngo ketre hnepe götrane hi lai ne la ‘maca ka loi ne la baselaia.’ (2 Pet. 3:7; Mat. 24:14) Iehova a troa apatrene la ngazo e Amagedo matre nyi hnen la paradraiso e celë fen.—Sal. 37:34.
4. Nemene la ka aijijë së troa mekune laka, ijije tro sa kuca la aja i Iehova?
4 Ketre jole pi hë troa drengethenge Iehova, me catre kuca la aja i Nyidrë ngöne la fene hna lapaane hnene la itre ka icilekeu memine la huliwa ne cainöjëne la maca ne la Baselaia. (Ioane 15:19) Ngo ame pe, ka xecie hnyawa e kuhu hni së ka hape, tro kö Iehova a ini së la aqane tro sa kuca la aja i Nyidrë, tune lo aqane ini Amosa hnei Nyidrë.—2 Kor. 3:5.