MELE NE KERESIANO
Trongëne Jë La Itre Trepene Meköti Iehova
Hnei Iehova Akötresie hna acile la itre trepene meköti thatraqane la itre atr. Hnei Nyidrë hna amekötine laka, ame la faipoipo tre, kola iothekeune la trahmanyi me föe, nge tha tro kö a seng. (Ma 19:4-6, 9) Xele Nyidrëti ma wange la nöjei pengöne huliwa ka sis. (1Ko 6:9, 10) Hnei Nyidrëti hna hamëne kowe la nöje i Nyidrë la itre trepene meköti göne la aqane troa heetr me nyihnyawane la ngönetrei së.—De 22:5; 1Ti 2:9, 10.
Nyimutre la itre atr enehila ka thipëne la itre trepene meköti Iehova. (Ro 1:18-32) Angatr a nue la aqane mekune la fen, troa amekötine la aqane heetre me nyihnyawa angatr, me aqane ujë i angatr. Nyimutre la itre ka amamane la itre thiina i angatr ka ngazo, nge angatr a qeje gelene la itre ka mele thenge la itre xa trepene meköt.—1Pe 4:3, 4.
Pine laka Itretre Anyipici Iehova së, loi e tro sa catre melëne la itre trepene meköti Nyidrë. (Ro 12:9) Tro sa tune kaa? Loi e tro sa qaja koi itre xane la itre ewekë hnei Nyidrëti hna kapa. Ngo nyipiewekë tro fe sa mele thenge la itre trepene meköt. Ame la easa ië iheetr, loi e tro sa isa hnying ka hape: ‘Nemene la ka mama ngöne la aqane heetre ni, itre trepene meköti Iehova maine itre aqane ujë ne la fen? Kolo kö a amamane hnene la aqane heetre ni laka, eni la ketre Keresiano?’ Ame la easa iëne la ketre film, loi e tro sa isa hnying ka hape: ‘Tro kö Iehova a kapa la film celë? Kolo kö a amamane ka hape, eni a mel thenge la itre trepene meköti Akötresie, maine thenge la itre aja ne la fen? Hapeu, tro jë kö la itre nyine iamadrinë hnenge hna iën a troa akeinyi ni? (Sa 101:3) Ijije kö tro la film celë a athixötrëne la ketre atrene la hnepe lapang maine itre xane pena?’—1Ko 10:31-33.
Pine nemene matre nyipiewekë tro sa trongëne la itre trepene meköti Iehova ngöne la mele së? Easenyi hë matre apatrene pi Iesu la itre mus, me iangazo qa la fen. (Eze 9:4-7) Itre ka kuca la aja i Akötresieti hmekuje hi la ka troa mele pe. (1In 2:15-17) Haawe, catre jë së mel thenge la itre trepene meköti Iehova, matre tro fe la itre ka öhne la aqane ujë së ka lolo a hane atrunyi Nyidrë.—1Pe 2:11, 12.
Hapeu, kolo kö a mama qa ngöne la aqane heetre ni laka, eni a mel thenge la itre trepene meköti Akötresie?
GOEËNE JË LA VIDEO HNA HAPE, NYI SINEE I IEHOVA JË—TRAHMANYI ME FÖE, NGE THUPENE LAI, SA JË LA ITRE HNYING:
Pine nemene matre inamacane la atr ka mel thenge la itre trepene meköti Iehova?
Pine nemene matre loi e tro la itre keme me thin a inine la itre trepene meköti Iehova kowe la itre neköi angatr, e co petre kö nyudren?
Nemene la aqane tro easë asë, itre thöth me itre qatr, a xatuane la itre atr troa hane kepe manathithi qa ngöne la elolo i Akötresie?