Itre Ithuemacanyi Ne La Baselaia Ka Ijije Hna Hamëne Ngöne La Fene Hnengödrai
1 Ngöne la treu Eiperem, drai 23, ke, troa kuca koi nojei atr, la ketre cainöje ka ketre pengön; ame la taane la cainöj, ke, “Easenyi palaha la pune kowe la itre hmi ka ngazo.” Troa amamane ngöne la ijine kola nyipune la icasikeu la foa lao götrane pepa hne së hna troa nyipiewekën’atrun pine laka itr’ej’a troa hamëne la Itre Ithuemacanyi Ne La Baselaia. Troa hamëne la aliene la ithuemacanyi cili ngöne la fene hnengödrai asë qaane drai 24 Eipereme utihë e 14 Mei; köni wiik.
2 Kola isa hnyinge la itre atr ngöne la nöjei götrane ne la fene hnengödrai. Pë ju pëhë hna tha ketr hnene la itre jole enehila. Celëhi matre nyipiewekë la Itre Ithuemacanyi Ne La Baselaia kowe la itre atr ka thele troa atre la kepine la itre ewekë ka traqa enehila; kola troa amamai angatre laka wesiula i Akötresie la trepene la mele ne la atr. (Sal. 119:105) Loi e tro së a isa hetrenyi la itre ithuemacanyi cili ngöne la ijine kola troa hamën, e drai 23 Eiperem. Nyipiewekë troa hnëkë hnyawa kowe lai köni wiike cili, pine laka tru la huliwa.
3 Catre Jë Së Troa Cainöj: Matre hnëqai drei troa trofë trongëne lai ithuemacany? Ejehi laka, koi nöjei atre cainöj’asë; nyipiewekë tro së isa ala casi a isa hnëkë hnyawa kowe lai huliwa cili! Nge, tuneka fe lo itre ka ini Tusi Hmitrötr, lo itre ka majemine sine la itre icasikeu ne la ekalesia? Alanyimu la itre ka ce hmi me easë, nge mama ha laka ajane fe angatre troa kökötre ngöne la nyipici. Nge, e maine angatre hë a melëne la itre tulu ka meköti qa hnine la Tusi Hmitrötr, ke, hapeu, ijije kö troa hane hë angatr’a itretre cainöjëne la Baselaia? Celëhi matre nyipiewekë tro la ka ini a ce ithahnatane lai memine la hna inin, matre waipengöi angeic maine hetre aja i angeice jë hë troa hane trofë la maca ka loi; Thupene lai, tro la lue qatre thup’a ce wange memine la hna inine lo itre mekune ka eje hnine la itus Organisés pour bien remplir notre ministère, götrane 99. Maine ase hë tro thenge la itre hna amekötine cili, nge kola öhne laka ijije troa hane cainöj, upi angeice jë hë troa hane catre cainöje ngöne lai ijine cili. Ame koi itre hna inine ka tha cainöje petre kö, ke, loi e tro angatr’a hane trofë lai Itre Ithuemacanyi Ne La Baselaia kowe la itre atr hnei angatre hna atre hnyawa, maine kowe la itre sinee i angatre pena, ngöne lai ijine cili.—Wangeju La Tour de Garde ne 15 Nofeba, 1988, götrane 17, paragarafe 8.
4 Ijiji easë asë hi troa kuca la huliwa celë; tha ka jole kö. Loi e tro la itre keme me thin’a hane amamane la itre xaa aqane troa ithahnatane la Itre Ithuemacanyi Ne La Baselaia ngöne lo ijine angatr’a inine la Tusi Hmitrötre memine la itre atrene la fami; tro angatr’a hnëkë hnyawa matre hetre thangane ngöne la kola troa cainöje trootro. Tha loi kö troa qea maine tru pena la nyine troa qaja. Thupene la hne së hna ibozu, hamëne pi lai Itre Ithuemacanyi Ne La Baselaia kowe lai atr, nge upi angeice jë fe troa hane e. Nge, maine ajane hi angeic, ke, wange ju matre bëeke hmaca troa hamëne la itre xaa mekune ka ijij. (1 Kor. 3:6, 7) E maine ajane së troa hetre thangane la hne së hna hnëkë, ke, ahopatrene ju la aqane tro së a nyiqaane ithahnata, nge huliwaane hnyawane ju.
5 “Tru la huliwa së” ngöne la treu Eiperem me Mei. Hnine la sinetrongene la Huliwa Ne Baselaia ne la treu hnapin, ke, troa hamëne la ketre ithuemacany, ame la taan, ke, “Catre Jë Troa Huliwa i Joxu, Palahi.”—1 Kor. 15:58.