Loi e Troa Wang’Asë Hmaca Lo Itre Atr Ka Kapa Lo Itre Boroshür

¹ Hnei Paulo aposetolo hna ithuecatre koi angetre Filipi qa ngöne la hna ‘cia hmaca la mekune i angatr koi nyidrë.’ (Fil. 4:10) Maine tro së a xomi tulu thei angatre ngöne la huliwa ne cainöje trootro, ejehi laka, tro fe a ‘cia la mekune së’ kowe la itre atr hne së hna cainöje kow, hawe troa canga kuca la itre iwaihmaca.

² E maine hnei epuni hna amë pe lo boroshür “Musi ka troa hamëne hmaca la Paradaiso,” ke, loi e tro epuni a qaja ka hape:

◼ “Hnenge hmaca hna mekune lo porotrike i nyiso lo ketre drai, nge mekune hmaca ju hi ni la lue mekene tus, hnenge hna ajane troa ce e me nyipë. Ma mekune palakö nyipë lo hnei nyiso hna ce ithahnataan, laka tro Akötresieti a musinëne la fen’asë. Hna thingehnaeane hnene la Tusi Hmitrötr, laka tro Iehova Akötresie a aeatrëne lai mekune cili. [E jë la Daniela 2:44.] Hapeu, lapaune fe kö epuni kowe la hna thingehnaeane celë? [Nue pi troa sa.] Hanawange la aqane qejepengöne hnei Akötresie la atreine i Nyidrë troa aeatrëne la itre hnei nyidrëti hna thingehnaean. [E jë Isaia 55:11.] Hapeu, tha kolo kö la a thuecatre së troa mejiune kowe la Baselaia i Akötresie? Ngo eue la tro Akötresieti a aeatrëne la itre hnei nyidrëti hna thingehnaean?” Qaja ju ka hape tro epuni a sa la hnyinge celë ngöne la ketre ijine epuni a iwaihmaca.

³ Hanawange la ketre nyine tro epuni a qaja ngöne la ketre ijine epuni a trofë la boroshür “E Meci Hë La Atr Hne Së Hna Hnim”:

◼ “Hnenge hna thele ijine troa bëeke matre troa ithahnataane la pengöne la atr ka meci hë hne së hna atre.” Ame la epuni a amamane la iatr, götrane 30 qaja ju fe ka hape: “Mekune hi nyipë la manathithi hna amamane ngöne la iatre celë, ene la kola amelene hmaca la itre atr, nge angatre hmaca a iöhnyi memine la itre sinee i angatre hnei angatre hna hnim? Qëmekene lo nyiso a inu, hnenge lo hna hnyingë nyipëti ka hape eka la hna troa mele hmaca hnene la itre atr, e koho hnengödrai, maine e celë fen. Maine jë, hnei nyipë hna e la hna qaja hnene la Tusi Hmitrötre ngöne la götrane 26 ne lai boroshüre celë.” Ithahnataane ju la itre mekune ka tru ngöne la hnaakönine utihë la hnafaifine paragaraf, nge e jë la Ioane 5:​21, 28, 29. E ijije hi la traem, ke, e jë fe la itre mekene tusi hna fejane ngöne lai götrane cili.

⁴ Hane fe kö epuni nyiqaane inine la Tusi Hmitrötre kowe la ketre atr jëne la boroshür “Voici, je fais toutes choses nouvelles”? Ame la kola iwaihmaca, ke, tupathe ju troa kuca tune la:

◼ Amamane hmaca ju la götrane 30, nge hnyingëne jë: “Nemene la ka amamane ka hape ame la Tusi Hmitrötr, ke, ketre itusi ka ketre pengöne kö?” Fe jë kowe la itre götrane 3 me 4, nge ce wange ju la itre paragarafe 1-4, memine fe la iatr ngöne la icetröne lai boroshür. E jë la caasi maine lue mekene tusi hna fejane ngöne la itre hna qejepengöne ngöne pune götrane pepa ngöne la paragarafe 4. Qejepengöne ju laka ame la Tusi Hmitrötr, ke, eje hmekujehi la itusi ka hamëne la mejiune ka sheming. Ce wange ju la ijine matre troa iwaihmaca. E thupene la hnaakönine iwaihmaca, nge kolo palahi a etid, hawe, ketre etide hë lai ka hnyipixe nyine fejane ngöne rapor!

⁵ Loi e troa amamane la aliene la boroshüre “Le nom divin qui demeure à ja­mais,” qaja ju ka hape:

◼ “Ame lo ketre traqa ni, ke, hnenge hna amamai nyipëti la atresiwa i Akötresie hnine la Tusi Hmitrötr. Ame ngöne la hmi së, ke, jëne mele la troa atre, me qaja atrune la atresiwa i Iehova.” Fe jë kowe la götrane 31, ce wange ju la itre mekune ka tru ngöne la foa lao paragarafe hnapin, nge e jë la Ioane 17:3 me Mika 4:⁠5. Qejepengöne ju laka easë a ajane troa inine la Tusi Hmitrötre kowe la itre atr, matre jëne tro angatre lai a hane atre la aqane troa atrune la atresiwa i Akötresie, me aqane tro fe së a kapa la itre manathithi ngöne la paradraiso e celë fen.

⁶ Loi e troa cia palahi the së la mekune kowe la itre atr hne së hë hna ithahnata memin, kola hape tha tro kö a thëthëhmi angatr. Hawe, catre jë troa bëeke hmaca, nge hnëkëne jë la ketre mekune nyine ixatua angatr. E tro së a inine la nöjei atr tro angatr’a hane itretre drei Iesu, easë lai a amamane ka hape ketre atr së ka “hete wen” ka loi.​—⁠Mata. 13:⁠23.