Loi e Tro Epuni a Itretre Inine La Wesiula i Akötresie—Huliwaane Jë La Itre Boroshür
1 Am’asë hi la nöjei ka nyihlue i Iehova, ke, hnëqa i angatre troa hane inine la Wesiula i Akötresie kowe la itre xaa atr. Troa mama hnyawa la etrune la hnëqa celë e hne së hna mekune hnyawa laka hne së hna kapa qa thene la atr ka tru musine e koho hnengödrai, me e celë fen, la hnëqa ne “inine la nöjei nöj’asëjëihë . . . ini angate jë.” (Mata. 28:18-20) Hawe, nyipiewekë tro së a itretre ini atr, matre ijije troa hane cainöjëne la maca ka loi!—2 Tim. 2:2.
2 Hna aijijë së e treu Ogas, troa hane inine la itre atr, ngöne la easë a troa trofë la itre boroshür. Loi e tro së a xome la itre xaa mekune ne Tusi Hmitrötre e hnine la itre boroshüre me hnëkëne la itre mekune ka troa xatua së troa nyiqaane la porotrik.
3 Ame la easë a trofë la boroshüre “Dieu se soucie-t-il vraiment de nous?,” ke, qaja ju ka hape:
◼ “Hne huni hna ithahnata memine la itre ka lapa ezi epun, me öhne laka hna ketri angatre hnene la itre ihumuth, me itre ewekë ka iakötrë ka traqa nyine apatrene la ketre baselaia, me itre iangazo, a kola elë trootro enehila. Hapeue la mekune i epun, pine nemene matre ketre jole lai ka tru enehila? [Nue pi troa sa.] Ketre götrane lai ka sisitria koi së, ngöne laka hnei Tusi Hmitrötre hna perofetaane hë ekö la ewekë celë nge ka troa eatr. [E jë 2 Timoteo 3:1-3.] Trotrohniine hi nyipë laka ewekë lai ka traqa ngöne la ‘ite drai hnapin.’ Kola hape kola troa nyipune la ketre ewekë. Hapeue atre fe hi epuni la ewekë cili?” Nue pi troa sa. Fe jë kowe la götrane 22, nge amamane jë la iatr, nge ithahnataane jë la caasi maine lue mekene tusi hna fejane ngöne lai götran. Ce wange ju matre bëeke hmaca troa qejepengöne la kepine matre easë a lapaune laka easenyi catre hë la tro së a kapa la itre manathithi celë.
4 E epuni a troa trofë la boroshüre “Quel est le but de la vie—Comment le découvrir?,” ke, qaja ju ka hape:
◼ “Nyimutre la itre atr ka akötr, ngöne la angatr’a tupathe troa thele la nyipi aliene la mel. Ejehi laka, xalaithehi la itre atr ka madrin, ngo alanyimu pe kö la itre ka akötre me hleuhleu ngöne la mele i angatr. Hapeue la mekune i epun, eje kö la mele hnei Akötresieti hna hnëkëne koi së? [Nue pi troa sa.] Tusi Hmitrötr’a amamane laka Akötresieti a ajane tro së a mele ngöne la fene ka tune la.” Amamane ju la iatr ngöne la götrane 21, nge fe jë kowe la götrane 25 me 26, paragarafe 4-6, nge qejepengöne ju la hna thingehnaeane hnei Nyidrë. Qaja jë la hnyinge celë thatraqane la ketre iwaihmaca : “Kola mama tuneka koi së laka tro Akötresieti a aeatrëne la itre hnei Nyidrëti hna thingehnaean?”
5 E epuni a ajane troa trofë la boroshüre “Epi thatraqai nyipunie la mel ka tha ase palua kö e celë fene hnengödrai!,” me amamane la iatr ngöne lai cetrön, nge hnyinge ju ka hape:
◼ “Hapeu, ajane fe kö epuni troa hane mele ngöne la ketre fene hnengödrai ka tune la, a ka tiqa hnei atr ka madrin? [Nue pi troa sa.] Tusi Hmitrötr’a qaja koi së ka hape Akötresieti a hnime la nöjei atr, me mele madrine epine palua e celë fen.” Fe jë kowe la iatr naba 49, nge e jë la caasi qa ngöne la itre mekene tusi hna fejan. Thupene lai, amamane ju la iatr naba 50, nge qejepengöne ju la nyine tro së a kuca e easë a ajane troa hane mele ngöne la paradraiso celë. Ce wange ju la ijine troa bëeke hmaca matre troa iwaihmaca, me ithahnataane la kepine matre nyipi ewekë catre troa lapaune koi Iesu Keriso.
6 Iehova a madrine la kola mama the së laka ‘tropane la huliwa së jëne la easë a isa wai së kö memine la aqane ini.’ (1 Tim. 4:15, 16) Troa ketre ithuecatre ka tru koi së la itre boroshüre ngöne la easë a catre xatuane la itre ka ajane troa drenge “la maca ka loi.”—Isa. 52:7.