Itre Iwaihmaca Ka Hetre Thangane Ka Loi Jëne La Aqane Ini Ka Maca
1 Ketre götrane ka nyipiewekë, me ka thuemadrine la itre iwaihmaca ngöne la huliwa ne cainöje trootro. Pine nemene matre loi e tro së a bëeke hmaca troa wange la itre atr ka ajane troa drei së? Hna qaja trongën, me atrune la atresiwa i Iehova, jëne la hna inine la nöjei atr, nge tro la xoue Akötresie a xatua angatre troa öhne la nyipi aliene la mel. (2 Kor. 2:17–3:3) Maine hne së hna wangatrune la ehmitrötrene la atresiwa i Iehova, memine la etrune la mele ne la itre atr, ejehi laka tro ha hetrenyi the së la ajane troa hnëkë hnyawa qëmekene troa bëeke hmaca.
2 Tro la ka ini a xatuane la hnainine troa kökötre qa ngöne la trepene hna amë hë. Tune la monitör, kola akökötrene la atrehmekune ne la hnainine e nöjei drai, hawe, loi e tro fe së a sisedrëne lo xötrei iöhny, memine lo itre mekune hna ithahnataane hë. Tro lai a hetre thangane e troa sisedrëne la itre mekun, me troa kökötre ngöne la atrehmekun.
3 Ngöne la epuni a bëeke hmaca thupene la hna amë pe lo boroshüre “Dieu se soucie-t-il vraiment de nous?,” ke, qaja ju ka hape:
◼ “Ame lo traqa hnapane ni, ke, hne so hna ithahnataane lo ‘ite drai hnapin’ hna qaja ngöne la Tusi Hmitrötr, memine fe lo aliene itr’ej koi së enehila. Maine jë epuni a thele la kepine matre eahuni a qaja ka hape easë a melëne la itre drai hnapin. (2 Tim. 3:1) Hnene la itretre drei Iesu hna ajane catrëne troa atrepengöne la ewekë celë. [E jë la Mataio 24:3.] Ngöne la Iesu a sa la hnyinge celë, ke, hnei nyidrëti hna qejepengöne la itre ewekë ka traqa, nge hne së hna melëne enehila. Kola qaja la itre akötr, me iangazo ka tha hane kö traqa tune ekö.” Amamane ju la aliene la hatrene hna qejepengöne ngöne la paragarafe 3 me 4 ngöne la götrane 19. E maine ajane hi, ke, amamane ju la itre xaa aliene la hatrene ngöne la paragarafe 5 utihë 8 ngöne la götrane 20. Ce wange ju troa iwaihmaca, me sa la itre hnyinge hna qaja ngöne la icetröne lai boroshür.
4 E epuni a sisedrëne la aja kowe la boroshüre “Quel est le but de la vie—Comment le découvrir?,” ke, qaja ju ka hape:
◼ “Eni a ajane catrëne troa qejepengöne koi nyipë la aliene la mele së. Ka xeci koi ni laka caasi hi la mekune së, ka hape aja i Akötresie tro së a mele e celë fen, ngöne la manathithi me tingeting, ngo tha ene kö la troa mele hnine la fene hnengödrai ka tune la; fene hnengödrai ka zine la gomegom. Hapeue la mekune i nyipë, tro kö Nyidrëti a aeatrëne asë la itre hnei Nyidrëti hna thingehnaean?” Nue pi troa sa. E jë la Isaia 55:11, nge thupene lai ithahnataane jë la itre mekune ngöne la paragarafe 25 utihë 27 ngöne la götrane 30. Qaja ju ka hape ame la aqane kuca ka sisitria matre öhne la nyipi aliene la mel, ke, ene la troa isa inine la Tusi Hmitrötr.
5 E epuni a ajane troa xötrethenge la aja hna amamane kowe la boroshüre “Epi thatraqai epuni la mel ka tha ase palua kö!,” ke, amamane hmaca ju, nge qaja ju ka hape:
◼ “Hne së lo hna ithahnataane lo ketre iatr ngöne la icetröne la boroshüre celë, kola amamane la emingömingöne la ketre fene hnengödrai. Eni a ajane troa qaja koi nyipë la kepine matre nyipi ewekë catre tro la itre atr ka ajane troa hane mele e cili a lapaune koi Iesu Keriso.” Fe jë kowe la iatr 41, nge e jë la Isaia 9:6. Amamane ju lai iatr 62, nge e jë la Ioane 3:16, nge amamane hnyawaane ju fe la enyipiewekëne la troa drengethenge. Qejepengöne ju laka Itretre temoë i Iehova a xatuane la itre atr troa atre la aqane troa hetrenyi la lapaune jëne la troa inine la Tusi Hmitrötr, me tupathe troa mele thenge la itre eamo.
6 Thupene la nöjei iwaihmaca, ke, loi e troa waipengö së hnyawa me lapa mekune la aqane tro së a maca hnyawa ngöne la götrane celë. Isa thele ju, me hnyinge ka hape: Hapeu, hnenge kö hna mekune hnyawaane la ewekë nyine troa qaja? Hnenge kö hna wangatrune la hnei Tusi Hmitrötre hna qaja? Hnenge kö hna eköthe qa ngöne lo trepene hna amë pe ngöne lo xötrei iöhny? Hnene kö la aqane trofënge hna thuejëne kowe la ini Tusi Hmitrötr? E ka loi hi la itre mekune qa ngöne la itre hnyinge celë, ke, kola hape epuni a catre troa maca ngöne la epuni a inine la Wesiula i Akötresie kowe la itre atr.