Xatuane Jë La Itre Wangadrapa Troa Atreine Mel
1 Ame la kola hape, troa inine la itre atr, ke, ene la tro së a ini angatre la hnei Akötresieti hna thele thei angatr. (Mat. 28:19, 20) Atraqatre la huliwa hna kuca ngöne la fene hnengödrai hnene la faifi milio nge sine lao Temoë i Iehova. Thatreine kö troa qaja ka hape, kola hetre thangane la huliwa cili pine laka, tru la hawa hna xom, me itre itusi hna hamën, maine itre etid hna kuca. Ngo easë a eatrëne la hne së hna mekune kow, e tro la itre atr a trotrohnine me trongëne la ini hnei angatre hna kapa.
2 Ame la troa xatuane la itre atr ngöne la ua, ke ene la troa “ateinëne la ite wangadrapa.” (Sal. 119:130) Troa ketr hmekuje la hni ne la itre atr, me hetre ajane troa trongëne la hna inin, e hnei angatre hna “trotrohnine” la aliene la hnei angatre hna inin. (Mat. 15:10) Pine laka, kolo pala hi a kökötre me hetre ecatrene la huliwa së, tro hë së a hetrenyi trootro la ajane troa ahmaloeëne la aqane tro së a ithahnatane me hamëne la ini ngöne la easë a cainöje trootro. Celë hi la kepine matre hnei Sasaiatri hna kuca la boroshüre Nemene La Hnei Akötresieti Hna Thele The Së? Ketre, pexeje la aqane qejepengöne hnene eje la itre ini ka tru hnine la Tusi Hmitrötr. Thaa qea menu kö la itre ini, thaa jole kö troa trotrohnine la itre hnaewekë, nge hmaloi e troa canga trotrohnine la itre ini hna hamën, celë hi kepine matre, troa tru hnei atr ka troa pi hane e.
3 Troa tro fë trongëne ngöne la treu eipereme me mei, la boroshüre celë memine la itre zonal. Hna amekötine laka, ngöne la epuni a hnëkë troa cainöje ngöne la wiik, epuni kö a amë la mecixeni göi itre zonal, nge ame pë hë ngöne la itre xaa drai ne la wiik, tro fë jë pë hë la boroshür. Hamëne jë la boroshüre kowe lo itre atr ka hane xome hë la itre itus. Mekune hnyawa kö laka, tro fe a hane hetre thangane eje fe kowe la itre nekönatr, memine lo itre atr ka ithahnatane kö la ketre qene hlapa, me itre ka thatreine hnyawa kö e tus.
4 Thele Jë La Itre Aqane Nyiqaane Ithahnata Ka Thaa Jole Kö: Maine easë a tro fë lo boroshüre Thele, amamane ju la götrane 2, ngöne lo hna qaja ka hape, “Nyine troa ini Tusi Hmitrötre la boroshüre celë.” Fe jë kowe la paragarafe 3 ne la götrane 3 me amamane la kepine matre nyipi ewekë kowe la atr troa inine la Tusi Hmitrötr. Amejëne jë la aja i angeice kowe la itre ini e hnine la boroshür; itre ini ka amamane la itre mekune qa hnine la Tusi Hmitrötr, ka thaa jole kö troa trotrohnin. Kuca jë la ketre iamacanyi nyine amamane laka, ketre madrine ka tru la troa etidi ngöne la boroshüre cili, nge hnyingë angeice ju ka hape, ajane kö angeice troa hane kapa la ixatua cili.
5 Loi e Troa Xomiujine La Etidi Matre Kökötre Ej: Ame la nyipi aja së, ke thaa ene hmekuje kö la troa kuca la nyimu etid—easë a ajane troa inine la itre atr ka troa catre cilëgöline la nyipi hmi. Ijije hi troa e asë la boroshüre ngöne la itre hnepe wiike ka xalaithe hi, nge jëne tro fe lai a etid ngöne la itus Connaissance. (Wange ju la itre mekune hna cinyihane fene götrane 31.) Loi e troa pane nyiqaane troa xatuane la hnainine troa atrehmekune la organizasio i Iehova. (Wange ju la itus Raisonner, götrane 273-4.) Amamane jë la enyipiewekëne la itre icasikeu ne la ekalesia, nge qaja jë ka hape, maine tro angatre a hane sine itre ej, tro hë angatre a trotrohnine hnyawa la aqane troa melëne la nyipi hmi.—Heb. 10:24, 25.
6 Eje hi laka, maine hne së hna catre xome la huliwa celë ka ketre pengöne kö, ngöne la treu eipereme me mei, haawe, tro hë së a kapa la madrine qa ngöne la hna hane xatuane la itre atr ka hni ka menyike troa “trotrohnine,” ke, celë hi jëne mele koi së.—Ite Edo. 4:5.