Hane Kö Epuni Xom La Boroshür Thele Troa Nyiqaane Ini Tus?
1 Hane kö epuni atrehmekun laka, maine tro epuni a ithanatan pala hi la Tusi Hmitrötr memin la ketre atr, jën la ketre itus, ngacama xoxopatre hi, ngo epuni hi lai a etid me angeic? Ketre, maine kola ithanata ngöne la qene qëhnelö, maine ngöne telefone pena, ngo kolo hi lai a etid. Tune kaa matre troa pane thel troa nyiqaane etid jën la boroshür, Thele, ngöne la treu Mei me Juun?
2 Hnëkë Jë Matre Hetre Thangan: Ame ngöne la kola tro fë la boroshür Thele, loi e thaa tro kö a jol koi së la mekun hne së hna ajan troa ithanatan. Maine epuni a troa iwai hmaca, mekune ju lo itre hnei epuni hna ithanatan ngöne lo kola xötrei cainöj. Thele jë ka hape: ‘Nemen la itre paragaraf hnine la boroshür hnenge hna troa wangatrune hnyawa, matre troa eköth la itre nyine troa ithanatan, me eatrongën la itre atr matre troa nyiqaane etid me angatr?’ Maine epuni a cainöj ngöne la itre hnalapa trootro, wange ju la itre topik hna troa pi ithanatan hnene la itre thöth, me ketre qatr, me ketre trahmany, maine ketre föe pena. Wange hmaca ju la itre mekun ka tru ne lai boroshür, me iën la ketre taan mekun hna ajan troa ithanatan. Thupen la hna pane mekun la ketre aqane troa nyiqaane ithanata, anyimua amexeje jë ej. Celë hi ketre aqane tro lai a hetre thangan ka loi, ngöne la hna cainöj.
3 Kola hamën hnene la sinetrongen la Huliwa Ne Baselaia ne Januare 2002, la eitr la “Itre Mekun Göi Troa Tro Fë La Boroshür Thele.” Kola amaman hnene la itre mekun hna eköhagen, hna hape, “Troa Qaja Mekötin,” ej a amaman la aqane troa nyiqaan etid jën la boroshür. Maine jë atreine fe hi tro epuni a hane xom la pane mekune celë:
◼ “Atre fe hi nyipunieti laka, atreine hi troa sa ngöne la itre hnepe menetr, la ketre hnying ka tru ngöne la Tusi Hmitrötr? Drei la ketre ceitun, pine nemen matre nyimutre la itre hmi ka uun ka hape, itre Keresiano angatr? Hane hë epuni hane hnyinge tune lai?” Thupen la hna sa hnene lai atr, fe jë kowe la ini 13, nge ithanatane jë lo lue pane paragaraf. Maine ijij la traem, e jë me ithanatan la caas maine lue xötr. Thupene lai, e jë la hnying e caha hune lai boroshür, nge qaja jë ka hape: “Ame pë hë cahu itre mekun munëne pe, tre, kola amaman hnyawa la faifi lao hatren nyine troa atrehmekun la nyipi hmi. Eni a madrin troa bëeke hmaca, troa ce wang me epun la itre mekune cili.”
4 Loi e Troa Catr: Thele jë la nöjei ijin troa inin la Tusi Hmitrötr, jën la boroshür Thele. Sipo Iehova jë troa amanathithin la huliwa së. (Mat. 21:22) Maine tro sa catr ngöne la huliwa cili, eje hi lai laka, tro hë së a hetrenyi la madrin troa xatuan la ketre atr troa kapa la maca ka loi!