Cainöje Jë Ngöne La Itre Gaa Hetre Atr
1 Hna wangatrehmekune hnei Paulo la menene la uati hmitrötre i Akötresie ngöne la huliwa ne cainöje i angeic, celë hi matre angeice a qaja ka hape: “Hnei Akötesieti hna acian.” Hnei angeice fe hna qaja ka hape: “Eëhuni a ce huliwa tro kö me Akötresie.” (1 Kor. 3:5-9) Celë hi ketre huliwa ka mingöming. Nemene la aqane tro së a amamane kowe la ka ala nyimu laka, easë a madrine troa itretre ce huliwa me Akötresie? Ene la troa cainöjëne la maca ka loi ne la Baselaia kowe la nöjei atr asë hne së hna iöhnyi memine ngöne la itre hnalapa trootro, me ngöne fe la itre xaa götrane menu ju kö.
2 Hna amekötine koi së troa “inine la nöjei nöj’asëjëihë.” (Mat. 28:19) Canga tro lai a nanazije hne së me mekune ka hape, co hi la hne së hna kuca ngöne la hna cainöje trootro, e thaa tru menu kö la itre atr hne së hna ithahnata memin. Ame pena ha ngöne la ketre götran, troa atraqatre la madrine së ngöne la hna cainöje trootro, e nyimutre la itre atr hne së hna iöhnyi memin, nge hne së hna ithahnata me angatr. Eje hi laka, ketre itupathi ka tru koi së lai, pine laka, isa qanyi së troa iëne la itre götrane gaa tru atrene matre öhnyi angatre me porotrike me angatr.
3 Itre Ceitune Ka Hetre Thangan: Ijije hi tro së a cainöje kowe la itre atr ngöne la hna maketr, ngöne itre park, me itre hna treqe kar. Ketre hane kö epuni hnëkë troa qaja la maca ka loi hune la itre kar? Hnene la lue temoë hna qeje tusi kowe la itre atr ka ce ti kar me nyidro, ngöne la nyidroti a tro troa sine la icasikeu göi cainöje trootro; Hnei nyidro hna ithahnatane la iatr ka amamane la paradraiso, hnine lo itus Connaissance, nge kola hane qeje pengöne ju fe la hna thingehnaeane hnei Akötresieti thatraqane la itre drai elany. Sesëkötre pi kö nyidroti la kola easenyi nyidro hnene la ketre nekö trahmany, me haine la itre hnei nyidroti hna qaja; thaa mekune kö nyidroti laka, troa hetre ka troa drei nyidro. Qëmekene tro angeice a uti qa hnine la kar, hnene la nekötrahmanyi hna xome la caa itus, me sipone troa wai angeice ngöne la hnalapa i angeic.
4 Nyimutre catre la itretre cainöje ka madrine ngöne la angatre a cainöje ngöne la nöjei ijin. Ame ngöne la ketre hnaipajö, hna tro hnene la ketre söre kowe la ketre magazë ka tru ne la götrane hnei eahlo hna mele ngön; hnei eahlo hna easenyine ju la itre atr ka lö qa hna itö nge thaa ka canga mekune kö troa bëeke kowe la itre hnalapa i angatr. Pëkö ca munëne la itre itusi hnei eahlo hna xometrongën, ase asë hi xome hnene la itre atr. Caa trahmanyi fe ka treqe kar ka kapa madrine la itre zonale qa thei eahlo. Ka hane sine nyidrë ekö la itre icasikeu, nge jëne la hna porotrik, kolo hmaca ha ahlëne la aja i nyidrë.
5 Ketre hnëqa ka tru la troa atrune la atresiwa i Iehova. Easë a amamane laka, thaa easë kö a kapa gufane la ihnimi gufa i Akötresie e hne së pala hi hna catre cainöj. Pine laka, “enehila la ijine kapa”, ene la ijine troa xatuane la itre xaa atr, haawe, loi e tro së a tro kowe la itre götrane gaa hetre atr, me hane thuemacanyi angatre la “dai ne mel” qathei Iehova.—2 Kor. 6:1, 2.