Itre Etid Ka Hetre Thangane Ka Loi
1 Hna hnyinge hnene la Eunuka atre Athiope thupene la hnei Filipo “hna amamane koi angeice la maca ka loi Iesu”; öni angeice koi Filipo ka hape: “Hape u ngazo troa bapataiso ni?” (Ite Huliwa 8:27-39) Ame kowe la Eunuka, hetre hni ne ajane i angeice hë kowe la Itre Hna Cinyihane hna hamëne hnei Akötresie jëne la uati hmitrötre i Nyidrë, matre ame hë e thupene la hnei Filipo hna hamë ixatua ngöne la ua, haawe, ijije hë kowe la eunuka troa hane ketre atre drei Iesu. Ngo thaa xeci kö e kuhu hni ne la itre atr ka alanyimu laka, nyipi ewekë troa trotrohnine la Tusi Hmitrötre ke nyine loi lai koi angatr.
2 Easë pe a olene koi Iehova laka, hnei Nyidrëti hna hamëne jëne la organizasio i Nyidrë la boroshüre ka hnyipixe, hna hape, Un livre pour tous; kola ithuecatre kowe la itre atr troa kapa la maca ne la Tusi Hmitrötre thatraqai së enehila. Kola enijëne hnene la ithuemacanyi e hnine la boroshüre la itre atr ka hni ka menyik, maine jë ka inine hë la Tusi Hmitrötr, ngo thatre pengöne hnyawa kö la Wesiula i Akötresie. Sisitria catre la boroshüre celë pine laka, ketre jiane huliwa hna hnëkëne göi troa upe la atr troa goeëne la aliene la Tusi Hmitrötr.
3 Troa ketre ixatua ka tru koi së ngöne la easë a xejë la ketre etid, e hne së hna pane wange hmaca lo itre mekune ka lolo e hnine la sinetrongene la Huliwa ne Baselaia ne treu juun 1996; kola amamane hnyawa la aqane troa hetre thangane ka loi la etid hna kuca ngöne lo itus Connaissance. Goeëne jë ngöne la itre ijine etidi epuni memine la hna inin, la aqane kökötre angeice ngöne la atrehmekun, ketre matre atreine epuni troa atrehmekune hnyawa la itre götrane ka loi troa pane ce ithahnatane me angeic. Xatuane jë la hna inine troa canga hnëkëne la etidi angeic, me xome la itre mekene tusi hna amekötine ngöne la itre ini hna troa ce wang. Loi e tro angeice a ketre qaja la itre mekune, thaa tro kö a e goeëne la hna cinyihane hnine la itus, hatrene hi lai laka, hna ketr la hni angeice hnene la nyipici. Kola mama fe laka ame la itre hna inine ka canga kökötre ngöne la nyipici, ke angatre hi lo itre ka e la itre itusi hna hamëne hnei sasaiatri, me hane sine pala hi la itre icasikeu i ekalesia. Xatuane jë fe la ka etid troa hane qaja la hnei angeice hna inine ngöne la nöjei ijin, kowe la itre xaa atr. Amamane hnyawa jë koi angeice cememine la hni ka menyik, la nyine tro angeice a kuca matre troa kökötre ngöne la götrane la ua. Thaa loi kö e tro së a sisedrëne la etidi memine la itre atr ka qea ha hna ini tus, ngo kolo pala hi a luelu. Loi e tro la hna inine a thele troa akökötrene la atrehmekune i angeice, me ketre cilëgöline la nyipici, me hane mekune troa nyihluei Akötresie me xome la bapataiso.
4 Ngöne la itre xaa hnalapa, nyimutre la itre atrene ka etid, kola isa inine la Tusi Hmitrötre kowe la itre atrene la fami. Ngo, ka nyipi loi kö e troa ce etidi la fami, matre troa iakeune hnyawa la itre atrene la fami ngöne la götrane la ua.
5 Hna amekötine hnei Iesu tro së a inine la nöjei atr asë. (Mat. 28:19) Maine easë a ajane troa hetre thangane la huliwa së, nyipi ewekë tro së a inine la Tusi Hmitrötre kowe la itre atr; itre etidi lai ka troa xatuane la itre hna inine troa kökötre uti hë la angatre a hane isa hnyinge tune lo eunuka ka hape, “Hape u ngazo troa bapataiso ni?”