Xome Jë La Itre Boroshüre Matre Troa Fe La Mekune Memine La Hni Ne La Itre Atr
1 Loi e troa tro fë la nyipici, matre troa fe la mekune memine la hni ne la itre atr. Ame la Iesu a qaja la nyipici kowe la itre atr, nyidrëti a iëne la itre topike hna pi ithahnatane hnene la itre atr, nge ka troa ketr la itre hni angatr. (Luka 24:17, 27, 32, 45) Troa hetre thangane ka loi la huliwa ne cainöje së, e hne së hna thele troa atre la itre hna ajane hnene la itre atr ngöne la götrane la ua.
2 Ame la itre boroshür, celë hi itre jiane huliwa lai ka lolo nyine tro së a tro fë, pine laka, itre eje a troa ketr la mekune memine la hni ne la itre atr hne së hna iöhnyi memine ngöne la hna cainöj. Loi e tro së a canga mekune la nyine tro sa qaja kowe la itre atr ka troa kapa la ithuemacany, ka eje e hnine cahu itre boroshüre hne së hna troa trofë e treu ogas:
—Dieu se soucie-t-il vraiment de nous? Nyimutre la itre atr ka akötre pine la itre thupene mo, maine hna ahleuhleune pena hnene la itre hace ka tru, tro hë angatre a madrine la ithuemacanyi ka lolo, ene laka, tro ha paatre la akötre elany.
—Quel est le but de la vie? Comment le découvrir? Tro la itre thöthi ka thele mekune thatraqane la mele i angatre elany, a kepe thangane la itre mekune nyine ixatua hna hamëne hnei Tusi Hmitrötr, ngöne la boroshüre celë.
—Nemene La Hnei Akötresieti Hna Thele The Së? Kola qeje pengöne hnyawa hnene la boroshüre celë la aja i Akötresie, nyine troa kuca hnene la itre atr asë. Atreine hi tro sa xome eje matre troa nyiqaane inine la Tusi Hmitrötr, memine lo itre atr ka drei së ngöne la easë a bëeke hmaca troa wai angatr.
—E Meci Hë La Atr Hne Së Hna Hnim. Nyimutre la itre ka cilëne la huliwa ne kele wezipo, ka madrine troa xome la itre boroshüre me hamëne itre eje kowe la itre hnepe lapa ka hnëmecine la ketre sinee ka mec. Hnene la itre trejine ka cainöje ngöne la itre hna kele wezipo hna xome la boroshüre celë, matre troa xatuane la itre ka hleuhleu trene sinee ka mec. Hnene la lue trejine föe hna cainöje kowe la ketre hnepe lapa ka ala seven, angatre a thithi ngöne la hua. Hetre thangane ka loi pi hë la ithuemacanyi hna hamëne qa hnine la boroshüre, pine laka, ame ju fe kö lai drai thupen, kola nyiqaane inine la Tusi Hmitrötre memine la thin!
—Doit-on croire à la Trinité? Atreine hi troa kapa hnene la ketre atr ka hmi catr, la nyipici hna qeje pengöne hnyawa ngöne la boroshür, ngöne lo aqane trongene la ketre ini ka tru hna hamëne hnene la itre hmi ne la Chrétienté.
3 Loi e tro së a thele troa e me trotrohnine hnyawa la aliene la nöjei boroshüre asë, me wange la aqane tro së a huliwane itre eje ngöne la teritoare së. Goëene ju la itre aqane nyiqaane ithahnata, hna hamëne ngöne la götrane hnapine ne la Huliwa ne Baselaia ne julai 1998. Epi tro Iehova a amanathithine la aqane catre thele së troa ketr la itre mekune memine la itre hni ne la itre atr.—Mareko 6:34.