Loi e Tro Pala Hi Së a Anyimua Iwai Hmaca
1 Hapeu, hnei epuni kö hna hane kapa hnyawa la maca ka loi ngöne la kola xötrei traqa fë eje koi epuni hnene la ketre atr? Maine thaa hnei epuni kö hna canga kapa, haawe, drei la epuni a olene laka, thaa hna nue triji epuni kö hnene la itretre Anyipici Iehova, uti hë la hetrenyi thei epuni la ajane troa hane inine la Tusi Hmitrötr. Loi e troa mekune lai ngöne la itre ijine epuni a anyimua kuca la götrane hna ahnithe koi epuni troa cainöje ngön.
2 Kolo pala hi a saze la itre ewekë ngöne la mele ne la itre atr. Angatre a qëmeke kowe la itre jol, maine itre ewekë ka ajojezine la mele i angatr, me hnehengazone la itre ewekë hnei angatre hna drenge ka traqa kowe la nöje maine ngöne la fene hnengödrai pena; angatre fe a cile kowe la itre akötr, qa ngöne laka, elë catre la itre thupene mo, maine qa ngöne pena la aqane elë la itre mec ka solesol, maine kola thapa pena hnei meci la ketre atrene la hnepe lapa. Itre ewekë la, ka troa upi angatre troa thele troa atre la kepine matre kola traqa la itre akötre cili. Loi e tro së a wangatrehmekune hnyawa la itre ewekë ka ajolëne la mekune ne la itre atr, nge thupene lai, easë a hane ce thawa me angatre la maca ka troa akeukawane la mele i angatr.
3 Ketre Huliwa Jëne Iamele: Pane hane ju së mekune lo huliwa ne lo itre atr ka thele la itre ka mele pe qa ngöne la kola traqa la ketre ngazo atraqatr. Ngacama itre xane a thele ngöne la ketre götran, nge co hi la itre atr ka mele pe hna öhn, ngo thaa hna kucakuca kö la itre ka ithel, nge thaa tro jë kö lai a nue trije pena la huliwa hnene la hna mekune ka hape, tru catre kö hnei atr ka mele hna öhne hnene la itre xaa ka ithele ngöne la ketre götrane pena ha. Thaa ase pala kö umuthe la huliwa ne iamele hna upi së troa kuca. Ame ngöne la nöjei macatre, kola öhne pala hi la itre hadredre thauzane la itre atr ka ajane fe troa hane mele pe qa ngöne la “aköte atraqat.”—Hna ama. 7:9, 14.
4 “Tro ha mele angat’asë angete hëne la atesiwa i [Iehova NW].” (Rom. 10:13-15) Trenge ewekë la ka troa amamane hnyawa koi së isa ala caasi la enyipiewekëne la troa catre cainöjëne pala hi la maca ka loi. Nyimutre la itre nekönatre ka öhne la kola nyiqaane cainöje ngöne la teritoare së, nge enehila ijiji angatre hë troa hane trotrohnine me mekune hnyawa la pengöi angatre elany, memine la hnei angatre hna mekune troa kuca. Thatreine kö së troa canga qaja, maine tro ha nyihluei Iehova hnene la ketre atr. (Ate cai. 11:6) Nyimutre la itre ka icilekeu ekö, ka kapa enehila la nyipici. Ame la qa së, ke, thaa ene kö la troa amekötine la itre atr, ngo tro pe a nue ijine koi angatre troa drenge la maca me thepe angatre qa ngöne la fene celë ka ngazo. Tune la hna kuca hnene lo itretre drei Iesu ekö, loi e tro pala hi së a “tro” kowe la itre atr, me thele troa amejëne ngöne la itre hni la ajane troa drenge la maca ne Baselaia.—Mat. 10:6, 7.
5 Kola mama la ihnimi Iehova, ngöne laka, hna nue së pala kö troa cainöj. (2 Pet. 3:9) Pine laka, easë a aijijëne la itre atr troa anyimua drenge la maca ka loi, haawe, easë fe hi lai a amamane hnyawa la edraiëne la ihnimi Akötresie, me atrunyi Nyidrë.