Loi e Troa “Cate” Ngöne La Huliwa Ne Cainöje i Nyipunie
1 Ame la easë a e laka, Paulo aposetolo a huliwa ngöne la traone e Korinito, a kola kuca la itre uma maano, ke, maine jë tro sa mekune ka hape, ma tro jë la huliwa i angeice a xome acone la traeme i angeice troa catre cainöj. Ngo, kola qaja ngöne Ite Huliwa 18:5 ka hape: “Hna catë Paulo hnene la wesi ula troa amamane koi angete Iuda, laka, Iesu hi la Keriso.” Pine nemene matre hna catre xome hnei Paulo la huliwa ne cainöj? Ngacama ala nyimu hë la itretre drenge ngöne la traone e Korinito, ngo kola qaja xeciëne hnene la Joxu laka, nyimutre pala kö la itre atr nyine troa xatuane ngöne la traone cili. (Ite Huliwa 18:8-11) Hapeu, eje fe kö the së la mekune celë, ene la troa hane catre xome la huliwa ne cainöj? Eje hi. Tru catre pala kö la itre atr ka ajane troa atre la nyipici, nge atreine hi tro sa cainöje koi angatr, me ini angatre la wesi ula.
2 Loi e Nyimutre La Itre Hawa Ne Cainöje Së e Treu Eiperem: Eje hi laka, ma aja i nyipunieti fe troa catre cainöjëne la maca ka loi ngöne la nöjei treu. Ngo ame ngöne la itre xaa treu, ke, kola pane ajane tro sa “cate” ngöne la huliwa ne cainöj. Kolo fe a qaja la treu Eiperem, ketre treu lai ka tru alien, ke, hmekune lo Drai Ne Amekunën. Hapeue la aqane mele i nyipunie, ijije fe kö tro nyipunie a hane pionie ka ixatua, maine pena troa akökötrene la aqane cainöje i nyipunie ngöne la itre treu Maaci me Eiperem? Nyimutre la itretre cainöje ka eatrëne la mekune celë, nge atraqatre la manathithi hnei angatre hna kapa. (2 Kor. 9:6) Maine nyipunieti a kuca asë la hnei nyipunieti hna atrein, ke, the thëthëhmine kö laka, ka madrine pala hi Iehova la huliwa hnei nyipunie hna kuca cememine la hni ka pexej. (Luka 21:2-4) Ngacama nyipunieti a isa kuca la hnei nyipunieti hna atrein, ngo loi e eje pala hi thei nyipunie la mekun, ene la troa “cate.” Nge, the thëthëhmine kö troa hamëne la rapore ngöne la pune treu, matre troa hane ce e nyipunieti fe memine la itre atrene la nöje i Iehova, ka catre cainöje ngöne la treu.
3 Loi e Troa Wange Hmaca La Itre Atr Ka Sine La Drai Ne Amekunën: Ame lo macatre hnapane ke, 4 952 la etrune la itre atr ka sine la Drai Ne Amekunëne e celë e Kaledonia. Wange jë pë hë së la macatre celë. Eje hi, kola mama ngöne la itre rapore laka, tru catre pala kö hnei huliwa nyine troa kuca, ke atraqatre la “meledrai.” (Mat. 9:37, 38) Qa ngöne lai, maine ijij, ke, wange ju matre troa vizitëne la itre atr ka hetre hni ne ajan, nge ka hane sine la Drai Ne Amekunën, matre troa xatua angatre ngöne la götrane ua. Thaa loi kö tro sa uthe trongëne la itre ijine troa vizitë angatr, ke, kolo lai a thuejëne ‘la ate ka angazon troa thapa la tenge ewekë ne la Baselaia hna traan e kuhu hni angatr.’ (Mat. 13:19) Maine tro nyipunie a canga vizitë angatr, ke, kolo lai a amamane laka, nyipunieti a “cate” ngöne la huliwa ne cainöj.
4 Catre Pi Troa Xatuane La Itre Ka Nanazije Ngöne La Ua: Ame e Febuare, ke, kola troa catre xatuane la itre ka nanazije ngöne la ua. Maine thaa hna wange pala kö la itre xan, ke, loi e troa ce wange hnene la itre qatre thupe matre troa vizitë angatr, qëmekene troa nyipune la treu Eiperem. Troa thele hnene la itre qatre thupe troa atrepengöne la itre jëne jole ka eje thei angatre isa ala caas, me wange la aqane troa isa hamëne la ixatua ka ijije koi angatr, matre tro hmaca angatre a hane catre nyihluei Iehova. Kola amamane jëne la ixatua hna hamëne cememine la ihnim, laka, troa eatrëne hnyawa hnene la itre qatre thupe, la hnëqa i angatr, ene la troa thupëne la “hnënge mamoe i Akötesie.” (1 Pet. 5:2; Ite Huliwa 20:28) Ijije fe troa huliwane hnene la itre qatre thupe la itre mekune nyine ixatua, hna hamëne ngöne La Tour de Garde ne 15 Semitrepa 1993, götrane 22-3, ngöne la angatre a troa wange la faifi lao kepine ka ajolëne la itre ka nanazije ngöne la ua. Ame la ewekë hna ajan, ke, ene la troa hetrenyi hmaca la aja thei angatr, troa xome la huliwa ne cainöj e treu Eiperem.
5 Loi e Troa Xatuane La Ka Ala nyimu Troa Itretre Cainöje Hna Thaa Bapataisone Petre Kö: Hapeue la itre nekö i nyipunie, ijije kö tro nyudrene a hane nyiqaane cainöjëne la maca ka loi? Nge ame tune kaa itre xane hnei nyipunieti hna etidi kow, maine hna kapa la aja i angatre hnene la itre qatre thup, ke, hapeu matre hane fe angatre nyiqaane cainöj, e treu Eiperem, ketre treu ka lolo catr? Maine kola kökötre ngöne la ua hnene la ketre atr, nge hnei angeice hë hna etidine la boroshüre Thele, memine la itus Atrehmekune, ke, ijije troa sisedrëne la etidi angeice memine la hnaaluene itus—maine itus Parole de Dieu, Paix véritable maine pena Unis dans le culte. Ame la aja së, ke, ene la troa xatuane la hnainine troa hetrenyi la wangatrehmekune ne la nyipici, mate troa aijijë angeice troa ketre atre cainöje thaa hna bapataisone petre kö, me hane saene ngöne la mele i angeice me xome la bapataiso, matre ketre Temoë i Iehova angeice elany.—Efe. 3:17-19; 1 Tim. 1:12; 1 Pet. 3:21.
6 Tro la aqane ihnimi nyipici nyipunie kowe la itre hnainin, a xatua angatre troa xome la nyipici nyine tulu ne la mele i angatr. Hnene la ketre Temoë trahmanyi hna öhne la lue trefëne ka qatre hë, nge ka ajane troa inine la Tusi Hmitrötr. Ngo, köni wiike ne uthe lapaane hnene la lue trefëne la etidi nyidro. Haawe, nyiqaane jë hë nyidroti la etid, ngo thaa hna eatrëne hnyawa kö hnene la lue trefëne la etidi nyidro ngöne la nöjei wiik. Ngo ame hë thupen, kökötre ju pë hë la föe uti hë la bapataiso eahlo. Önine lai Temoë ka hape, “Thupene la hna bapataiso eahlo, eahlo a treije hnei madrin, ene pe hane jë fe hi ni treije me föe i eni.” Eje hi laka, troa atraqatre la madrine së, e hne së hna “cate” cainöjëne la maca ka loi!
7 Kola amamane hnene la hna perofetane hnei Tusi Hmitrötr, me itre ewekë ka traqa e cailo, laka, easenyi hnyawa ha la pune la fene celë. Enehila hi la ijine tro la nöjei atrene la nöje i Akötresie a “cate” troa qaja trongëne la maca ka loi koi itre xan. Paulo aposetolo a qaja xeciëne koi së ka hape, “tha gufa kö la huliwa [së] kowe la Joxu.”—1 Kor. 15:58.