Porogaram Ka Hnyipixe Ne La Asabele Ka Ketre Pengön Ka Caa Drain
1 Ame enehila, kola wangatrun hnene la itre atr ne fen, me ihul hnene la televizio me itre xaa ewekë ka tun, troa hetrenyi la itre mo ngöne la götrane la ngönetrei, ngo ame Wesi Ula i Akötresie, tre eje a xatua së troa “Mana Ngöne La Nöjei Huliwa Ka Loi.” (1 Tim. 6:18) Celë hi taan mekun ne la asabele ka ketre pengön ka caa drain, hna troa nyiqaane sin e Semitrepa 2002. Nemen la ithuecatr hne së hna troa kapa, ngöne lai asabele cili?
2 Tro la atre thupën la sirkoskripsio a qejepengöne la alien la xötrehnëewekë hna hape, troa “Trena mo Qa Ngöne La Aqane Waiewekë i Akötresie,” nge tro angeic a ithanata memine la itre xaa trejin ka thele troa hetrenyi la itre mo ngöne la götrane la ua. Ame ngöne la pane cainöj ne la drai, tro la atre cainöj ka iwai a amaman la aqane kuca hnyawa hnene la nöje i Akötresie la itre “Huliwa Ka Lolo Ngöne La Hneijine Menue Celë.” Tro ha ketre ithuecatr ka tru koi së troa wangatrun la aqane tro së a hane xome hnyawa la huliwa ne menue, hna ahnithe koi së hnei Akötresie troa kuca enehila.
3 Drei la madrine së, ngöne la easë a öhne la itre thöth Keresiano, kola nyenyape thele la itre trenga mo ngöne la götrane la ua! Kolo hi lai a atrunyi Iehova me xatuan la itre thöth troa amë la trepen thatraqan la itre hnëqa elany, ngöne la huliwa i Akötresie. Ame la cainöje hna hape, “Ithuecatre Jë Kowe La Itre Thöth Troa Kuca La Itre Huliwa Ka Loi Me Atrunyi Iehova,” ke, kola troa amamane hnyawa la itre huliwa ka lolo ngöne la nöj, hna kuca hnene la itre thöth Keresiano.
4 Nemen la eloin la troa thele troa kuca la itre huliwa ka lolo? Troa ithanatane lai hnene la atre cainöj ka iwai, ngöne la cainöj tixenuë, hna hape, “Catre Pi Troa Kuca La Itre Huliwa Ka Loi, Nge Troa Kapa La Itre Manathith Qaathei Iehova.” Tro nyidrë a xom la foa lao götran, jën tro sa kapa la itre manathith ka nyimutre: (1) Easë isa ala caas, (2) Hnine la hnepe lapa, (3) hnine la ekalesia, me (4) ngöne la organizasio e cailo fen.
5 Ame koi itre ka nue hë la mele i angatr koi Iehova, tro hë angatr a thel troa hane xom la bapataiso. Maine ijiji epuni fe hë troa hane bapataiso, loi e troa wang la qatre thup perezida matre troa nyiqaane wang la nyine troa kuca.
6 Ame hë la kola atre la ijine tro epuni a asabele, canga wange jë la itre nyine troa kuca, matre thaa tro kö a trian lai drai ne asabele. Tupathe jë troa canga traqa, matre troa hane nyitrepen la icasikeu hnene la nyima memine la thith. Maine tro së a traqa me drenge hnyawa la itre ini hna troa hamën ngöne lai drai ka pexej ne asabele, eje hi lai laka, tro ha acatren hnyawa la lapaune së, me xatua së troa hane catre xom la gojeny ka troa atrenamo së, ngöne laka, easë a trongën la aqane waiewekë ne la Akötresi së, ene Iehova.