Qaja Jë Kowe La Itre Xan La Mejiun Ne La Baselaia

¹ Ame ngöne la itre drai tixenuë celë, nyimutre catre enehila la itre atr ka pëkö mejiun. (Efe. 2:12) Ame itre xan, tre, angatr a amë menune la mejiune i angatr kowe la itre mo ne fen, maine kowe la itre atr ka cilëne la itre mus, me kowe la Sias, me kowe la itre xaa ewekë ju kö. Drei la madrine së laka hetre nyipi mejiune së kowe la drai elany, ketre mejiune hna aceitunën me ketre “iuhni ne la u, ka tha uke me ka cat”!—Heb. 6:19.

² Tro ha paradraiso hmaca la fene elany, ngöne la kola troa musi la Baselaia i Akötresie. Troa amelene hmaca la itre sinee së ka meci hë. (Ite hu. 24:15) Pë hmaca kö troa hetre jiin, me thiina ka thaa meköti kö, me itre sine mec, me qatr, me mec. (Sal. 9:18; Mat. 12:20, 21; Hna ama. 21:3, 4) Celë hi itre xaa hnei Iehova lai hna thingehnaeane ka troa eatr ngöne la itre drai ka calemi. Nemene la igötranene la mejiun, hne së hna thele hnyawa?

³ Troa Cainöjëne La Maca Ka Loi: Thaa tro kö sa xenicipane la mejiune hne së hna kapa. Kola upi së hnene la ihnimi së koi Akötresie me kowe la itre atr ka lapa ezi së, troa xötrethenge la tulu i Iesu me “troa cainöjëne la maca ka loi koi ite pë ewekë ; me upi ni troa aloine la itete thë fë hni, me troa thinge mele koi ite po, me ahlëne la ite timek, me nue angate hna hutratulup.” (Luka 4:18) Hnei Paulo hna cainöjëne la maca ka loi ngöne la hna maaketr, me ngöne la itre götrane gaa tru atr. Hnei nyidrëti hna nue la mele i nyidrë troa cainöj. (Ite hu. 18:5) Ame la troa xome la tulu i nyidrë, ene la troa catre ngöne la huliwa ne cainöj, tre, kolo hi lai a thupëne wanga tro la itre “mekumekune la ite ewekë ne fen, memine la iaö ne la tenga mo” a ananazijëne la mejiune së itre Keresiano.—Mar. 4:19.

⁴ Thaa tro kö a puje la mejiune së kowe la Baselaia, ngöne la easa iöhnyi memine la itre atr ka sixele ma drei së, maine ka pëkö hni ne ajane kowe la maca ne Baselaia, maine ka amamane pena ka hape ka icilekeu me easë. Loi e “tro sha xome catëne la hmi ne la mejiune shë mate tha luelue kö.” (Heb. 10:23) Thaa tro pi kö sa “hmahma ene la maca ka loi.” (Rom. 1:16) Kola mama hnyawa laka, maine thaa tro kö sa luelue ngo tro pe sa catr, haawe, tro ha upe la itre xaa atr troa drei së.

⁵ Maine nyipici laka easa troa amamane kowe la itre atr la aqane eatre la itre hna perofetane hnei Tusi Hmitrötr, ngöne la itre engazone la fene enehila, ngo ame pe, tre, tro sa mekune hnyawa ka hape, thaa itre atr ka qejeqeje ngazo kö së. Ngo ame la huliwa ne cainöje së, tre, hna eköthe hune la mejiune ne la Baselaia, ene la maca ka loi ne la Baselaia i Akötresie. Catre pi së troa cainöjëne la maca ka loi cili, cememine la aja ka eje e kuhu itre hni së troa “mekune catëne la mejiune uti hë la pun.”—Heb. 6:11.