Aqane Troa Huliwan La Itre Video Nyine Nyiqan Ini Tus

Foa lao video i easë nyine nyiqane ini Tus. Pine nemen matre kuca jë së la itre video cili?

• 

  Hnauëne La Troa Inine La Tusi Hmitrötr? (ka qea) tro la video celë a thue aja kowe la atr troa atre la Tusi Hmitrötr, ngacama angeice hë ngöne la ketre hmi. Ej a ithuecatr kowe la atr troa ithel e hnine la Tusi Hmitrötr matre sa la itre hnying ka tru göne la mel, me amamane la itre ini ne la Tusi Hmitrötr. Eje fe a amaman la aqane troa nyialiene la pepa ne sipo matre ini Tus.

• 

  Hnauëne La Troa Inine La Tusi Hmitrötr? (ka hopatr) ceitune hi la video celë memine lo video e caha hun, ngo hna ahopatrene pe. Ka loi la video celë kowe la itre atr ka trene jol.

• 

  Nemene La Aqane Trongene La Ini Tusi Epun? ej a thue aja kowe la atr troa ini Tus me sa la itre hnyinge i angeic göne la aqane trongëne la ini Tus, tune la troa nyialiene la pepa ne sipo.

• 

  Hane Hi La Aqane Ini Tusi Hmitrötr troa amamane la video celë kowe la atr ka nyiqane ini Tus. Ngacama kola upi së troa goeëne la video celë ngöne lo Itus Gojenyi Kowe La Nyipi Mel! götrane 2, ngo ijije fe troa goeëne ngöne la kola inine la boroshür Gojenyi Kowe La Nyipi Mel! Tro la video celë a qejepengöne la itus memine la aqane trongene la ini Tus.

Isa hetre huliwane kö la itre video celë. Nge hetre ijine troa amamane me iupi fë itre ej. Loi e tro la ka cainöj a atrepengöne hnyawa la itre video celë matre atreine huliwan itre ej ngöne la hna cainöj.