Hetre Gufa Së Koi itre Xan
1 Drenge hi Paulo aposetolo laka qâ i angeic troa cainöj kowe la itre xan. Atre hi nyidrëti laka hnei Akötresie hna aijijën troa mel la nöjei atr jëne la madra ka sisitria ne la Hupuna. (1 Tim. 2:3-6) Celë hi matre öni Paulo: “Ini ate xomi gufa göi angete Heleni, me ite xa nöj ; angete inamacan, me angete tha ’tein.” Hna catre thel hnei angeic troa huliwa matre të la gufa i angeic kowe la itre atr, jëne la hna ce thawa me angatr la maca ka loi.—Rom. 1:14, 15.
2 Tui Paulo, itre Keresiano enehila a thele ijine ka ijij troa ce thawa la maca ka loi me itre xaa atr. Pine laka eashenyi catr la “akötr atraqatr,” nyipi ewekë catr tro sa thele la itre atr ka hni ka ajan. Epi tro la nyipi ihnimi së koi angatr, a upi së troa catre kuca la huliwa ne iamele cili.—Mat. 24:21; Ezek. 33:8.
3 Të Jë Së La Gufa Së: Ame la sipu aqane troa ketr la itre atr, tre, jëne la hna cainöj ngöne itre hnalapa trootro. Maine nyimutre la itre atr ka paatre kö ngöne la teritoare së, makëne jë la itre hnalapa cili me bëeke hmaca ngöne la itre ijine ka nyimutre. Tro ha aijijë së troa ithanata memine la ka ala nyim. (1 Kor. 10:33) Ijije tro fe sa cainöj ngöne la itre götran hna salem, me itre gojenyi, me itre hnë mano, ngöne hna acili loto, me jëne telefon. Tro sa isa hnying ka hape: ‘Hapeu, ase jë kö ni trongën asë la nöjei jëne troa cainöj, göi troa ce thawa la maca ne mel?’—Mat. 10:11.
4 Drenge hi hnene la ketre pionie la enyipiewekën troa cainöj kowe la itre atr ne la teritoare i angeic. Ame ngöne la ketre uma, hna thinge qaluqalune pala hi la itre mamala, nge pë pala hi atren ngöne la kola cainöj. Ngo ame la ketre drai ne thaa angeice kö a cainöj, angeic a wanga atrehmekun la caa loto qëmekene lo hnalapa ka lapaa pë atren. Canga jea ju hi angeic, me hë. Hna sa hnene la caa trahmany matre nyiqaane ithanata ju hi lai uti hë la itre iwai thupen cememine hë la föi nyidrë. Thaa hmitre kö nge trahmany fe hë a hane inine la Tusi Hmitrötr; ame hë enehila ase fe hë bapataiso nyidrë. Atraqatre la ole i nyidrë la hna nyipi ewekën la hnëqa ne ti gufa hnene la trejine föe, ene la troa cainöj koi itre xan.
5 Pine laka easenyi hë la pun, ijine hi enehila troa të la gufa së kowe la itre atre xötreithi së jëne la isa aqane catre cainöje së.—2 Kor. 6:1, 2.