Loi e Tro Sa Catre Thipetrije La Itre Ewekë Hne Së Hna Fedre Kow
1 Qaane hë ekö, hnei Satana hna atimekëne la itre hni memine la itre mekun ne la nöjei atr, jëne la itre ini ka thoi memine la iamenu. Hnei angeice hna haöthe la fen hnene la itre ini ka thoi, tune la Tirinite, memine la hna hape, thaa ka meci kö la u, nge hetre ifereno. Angeice hi la ka ukune la itre atr matre tro angatr a luelue laka, ka mele la Atre Xupi së, nge thaa Nyidrëti kö la Atrekë Ewekën la Tusi Hmitrötr. Ame la iwangatrehmekunyi atr me isi pi nöj, tre, itre xaa jole lai ka sawa la itre atr troa kapa la nyipici. (2 Kor. 4:4) Tune kaa la aqane tro sa uligötrane la itre ini hna fedre catre kow?—2 Kor. 10:4, 5.
2 Itre Aliene Hni Angatre Fe Hna Hane Ketr: Ame la itre ini hna lapa fë hë hnene la itre atr, tre, ijije tro itre ej a ketr la itre aliene hni angatr. Ame la itre xan, tre, hna lapa fë hë la itre ini ka thoi qaane lo nekönatre petre kö angatr. Maine easa ajane troa xatuane la itre atr cili, nyipi ewekë tro sa ithanata cememine la metrötre ngöne la easa qaja la itre ewekë hnei angatre hna mejiune kow.—1 Pet. 3:15.
3 Ijije tro sa amamane la metrötre së kowe la itre atr cili jëne la kola aijijë angatre troa qeje pengöne la hnei angatre hna mejiune kow memine la kepine lai. (Iako. 1:19) Maine jë angatr a lapa fë hnyawa la ini ka hape, ame la u, tre, thaa tro kö ej a mec pine laka, hetre sinee i angatr ka mec nge tru la aja i angatre troa iöhnyi hmaca me itre ej. Maine pena angatr a atrune la itre feet ka tru pine laka, hetre ijine i angatre troa ce lapa memine la hnepe lapa i angatr. Ame la easa drenge la angatr a fe la itre mekune i angatr, tre, celë hi ka troa xatua së troa trotrohnine la itre aliene hni i angatr nge xatua së mina fe troa sa hnyawa.—Ite edomë 16:23.
4 Loi e Troa Nyitipu Iesu: Hnei Iesu hna hamëne la ketre tulu ka sisitria thatraqai së ngöne la nyidrëti a sa lo itre hnying ne la ketre atr ka atrepengöne hnyawa la Trenge Wathebo. Thaa hnei Iesu kö hna qaja koi angeice la nyine troa kuca, ke, maine jë tro angeic a thipetrije itre ej pine laka, fedre catre angeice kowe la itre hnei angeice hna mejiune kow, tre, hna lapa fë hë e kuhu hni angeic. Ngo hnei Iesu pe hna xome pala hi la Itre Hna Cinyihan, me nue angeice troa qaja la mekuna i angeic, me xatua angeice mina fe troa thele ewekë jëne la ketre ceitun hnei nyidrëti hna xom.—Luka 10:25-37.
5 Ame la Wesi Ula i Akötresie, tre, ijije tro ej a ukune la itre atr troa nuetrije la itre ini hna hamëne hnene la itre hmi ka thoi. (Heb. 4:12) Maine easa qeje pengöne hnyawa la nyipici kowe la itre atr ka drei së cememine la hni ka menyik, eje hi lai laka, ijije tro sa ketr la itre hni angatr, nge xatua angatr mina fe troa thipetrije la itre ini hna mejiune kow me hane kapa la nyipici, ene la ka troa nue amaca angatr.—Ioane 8:32.