Loi e Tro Nyipunieti a Isi Cememine La Inamacan
1. Nemene la aqane tro sa trongëne ngöne la huliwa ne cainöj la hna qaja ngöne 1 Korinito 9:26?
1 Hnei Paulo aposetolo hna cinyihane ka hape: “Ini a nyenyape tun, tha luelue kö ; ini a ishi tun, tha tune kö la ate lepe la eny.” (1 Kor. 9:26) Paulo a qaja e celë ka hape, hnei nyidrëti pala hi hna catre nyinyape thele me amë panëne la itre aja ngöne la götrane la ua. Ngo nyidrëti mina fe a qaja la ketre aqane troa tro fë la huliwa ne cainöj. Ame la aja së, tre, ene la troa “ishi” matre tro pala hi a kuca la huliwa ka loi. Nemene la aqane tro sa amamane laka easa isi?
2. Tro sa nyitipu Paulo tune ka memine lo itre sine ce huliwa me nyidrë, ngöne la aqane iëne së la drai memine la götrane hnë tro sa cainöj?
2 Cainöje Jë Ngöne La Itre Götrane Ga Tru Atr: Ame ngöne lo hneijine i Iesu, hnei Paulo memine lo itre xa sine ce huliwa me nyidrë hna cainöje ngöne la itre götrane ga tru atr. (Ite hu. 5:42; 16:13; 17:17) Qa ngöne lai, maine ame e hej, tre, ala nyimu catre kö la itre atr e koilo itre hnalapa i angatr, hawe, ketre ijine ka sisitria lai troa cainöje ngöne itre hnalapa trotro. Nge tune ka fe, ngöne la itre hna itreqe kar e hmahmakany me e hnaipajö hej, ngöne la kola tro troa huliwa hnene la itre atr, maine bëeke hmaca kowe la itre hnalapa i angatr? Eue la kola tiqa hnei atr, la itre setroa ne la teritoare së? Maine tro sa cainöje e cahu gojenyi ngöne la itre ijine cili, eje hi lai laka, tro ha hetre thangane la huliwa së.
3. Tro sa isi tune ka cememine la inamacan, ngöne la aqane huliwane së la teritoare së?
3 Huliwane Jë La Teritoare Cememine La Inamacan: Nyipi ewekë mina fe tro sa isi cememine la inamacan, ngöne la aqane huliwane së la teritoare së. Hanawange la ketre ceitun, maine troa ce tro hnene la ka ala nyimu troa cainöje ngöne la teritoare ka cas, tre, ma troa tru la traeme me trenge catre ka luzi hnene la hna pane thue huliwa i angatr. Ka lolo catre ju kö e troa thawa la gurupe cili. Ka tune mina fe ngöne la kola troa cainöje ngöne la itre götrane ka nanyi qa ngöne la traon laka, maine easa ajane troa canga umuthe la teritoare së, nge hetre ijine troa ithanata kowe la itre atr, nyipi ewekë troa ce ti loto, matre co ju hi la loto hna xom a tro cili. Hapeu, ijije kö tro sa xome la ketre teritoare ka tha nanyi kö qa ngöne la hnalapa së, matre tha tro kö a aluzi traeme menu?
4. Nemene la ka troa xatua së troa maca troa “axena at”?
4 Hnei Iesu hna aceitunëne la itre atr ka cainöje trotro me itre ka “axena at.” (Mar. 1:17) Ame la atr ka nyi ie, tre, tha angeice hmekuje kö a tro menu, ngo angeic a trongene troa bëeke fë ie kowe la hnalapa i angeic. Hawe, ame la atr ka atreine nyi ie, tre, angeic a treqene hnyawa la ijine ka ijij, me thele la götrane ga tiqa hnei ie. Kola mama hnyawa e celë, laka angeic a catre troa ujë cememine la inamacan. Epi tro mina fe sa hane ujë tune lai ngöne la huliwa ne cainöje së.—Heb. 6:11.