Tha Tro Pi Kö Sa Hmaca Troa Cainöj
1. Easa atre tune ka laka, tha mano kö cainöje lo itretre cainöj ne la hneijine i Iesu?
1 Ame lo itretre cainöj ne lo hneijine i Iesu, tre, “tha mano kö” angatre cainöjëne la maca ka loi koi nöjei atr. (Ite hu. 5:42) Celë hi matre, maine angatr a cainöje ngöne itre hnalapa trotro, nge ixelë ju hi angatre memine la itre xa atr e kuhu gojeny, tha hnei angatre kö hna nue pë hë la itre atre cili. Ketre tha hnei angatre fe kö hna nue la ketre ijine ka sisitria troa cainöje ngöne la nöjei ijin, tune la troa itö ewekë ngöne la ketre setroa thupene la hna cainöje trotro. Tui Iesu, tha hnei angatre kö hna mekune laka, tro hë angatre a mano qa hna cainöj.—Mar. 6:31-34.
2. Nemene la aliene la troa mele thenge la ëje hne së hna xom?
2 Loi e Tro Pala Hi Sa Hnëkë: Ame la ëje hne së hna xom, ene la Itretre Anyipicine i Iehova, tre, tha eje kö a qeje pengöne la nyine tro sa kuca; ngo eje pe a qaja la pengö së. (Is. 43:10-12) Qa ngöne lai, ngacama tha easë kö a cainöje ngöne itre hnalapa trotro, ngo ka hnëkë pala hi së troa cilëgöline la mejiune së. (1 Pet. 3:15) Hapeu, epuni kö a canga mekune la itre nyine troa ce ithanatane memine la itre atr? Epuni fe kö a hane xome trongëne la itre xa itus, matre troa hamëne kowe la itre atr ka hetre hni ne ajan? (Ite edomë 21:5) Hapeu, epuni hi a cainöje ngöne itre hnalapa trotro, maine epuni fe a thele troa cainöjëne la maca ka loi ngöne la itre xa götran?
3. Pine nemene matre tha loi kö troa qaja ka hape, troa “iëne la aqane troa cainöj”?
3 Tha Tro Kö a “Ië”: Hne së hna majemine ekö troa qaja ka hape, “troa iëne la aqane troa cainöj” matre troa qeje pengöne la cainöje e cahu gojeny, me ngöne la itre hna acili loto, me itre hnë huliwa i maseta, me itre xane ju kö. Ngo pine lai hna ithanata cili, kösë lo itre xa ka cainöje hë a xome lai ceitu me ketre huliwa ka ketre pengön, maine huliwa nyine tro hi a kuca e hetre ijin. Hnei Paulo aposetolo hna qaja ka hape, hnei nyidrëti hna cainöje “qëmeke ne la nöj” me ngöne itre hnalapa trotro. (Ite Hu. 20:20) Qa ngöne lai, ka meköti kö troa qaja ka hape, tro sa cainöje “qëmeke ne la nöj” hune la tro sa “iëne la aqane troa cainöj.” Nyipici laka pane huliwa së la troa cainöje ngöne itre hnalapa trotro, nge ketre aqane cainöje lai ka hetre thangane catr e pi tro sa ketre la itre atr jëne la maca ne la Baselaia. Ngo ame la hna thele troa ketr hnene la itretre pane cainöj ekö, tre, tha ene kö la itre uma, ngo itre atr pe. Celë hi matre, angatre a xome la nöjei ijine ka ijij matre troa qaja la nyipici qëmekene la nöjei atr; e cahu ju hë gojenyi maine ngöne itre hnalapa trotro pena. Epi tro fe sa hetrenyi la aqane wai ewekë cili, matre troa xome hnyawa la huliwa ne cainöje së.—2 Tim. 4:5.