Ẹditọn̄ọ Ndisuan N̄wedikot Editi ke April 2
1. Ini ewe ke nnyịn idisuan n̄wedikot Editi isua emi, ndien nso idi ufọn ubịnikọt oro ẹsinamde kpukpru isua mi?
1 Ọtọn̄ọde ke April 2 esịm April 17, iyasuan n̄wedikot ata akpan edinam eke isua, oro edi, Editi n̄kpa Christ. Ke ini edem, ediwak mbon oro ẹnyenede udọn̄ ẹma ẹnam n̄kpọ ẹban̄a ikot eke isua ke isua emi. Ke uwụtn̄kpọ, n̄wan kiet ama okot n̄kọk itieutom ke usen Editi onyụn̄ ọdọhọ ete: “Ami ndisụk nsịm ufọk edi emi, ndien mmokụt n̄wedikot ke idak enyịnusụn̄ mi. Mmoyom ndika, edi ndiọn̄ọke ini.” Eyenete oro ọkọbọrọde ikot esie ama asian enye ebiet oro ẹwetde ini ke n̄wedikot oro. Ke utịt nneme oro, n̄wan oro ama ọdọhọ enye ete, “Mmọn̄ n̄ka edinam mbufo oro mbubreyo emi!”
2. Nso ke ikpetịn̄ ke ini inọde owo n̄wedikot?
2 Nte Idisuande N̄wedikot Emi: Sia inyenede esisịt ini ndisuan n̄wedikot emi ke ofụri efakutom nnyịn, ọkpọfọn inam nneme nnyịn edi ibio ibio. Imekeme ndidọhọ: “Mmọkọm-o. Iyom ndinọ fi ye ubon fo ikot ẹdidụk ata akpan edinam oro ẹsinamde kpukpru isua, emi ẹdinamde ke ofụri ererimbot ke Sunday, April 17. [Yak n̄wedikot nọ enyeneufọk.] Usenọfiọn̄ oro ke ẹdifiak ẹti n̄kpa Jesus. Ẹyenọ utịn̄ikọ Bible mfọn oro edinamde an̄wan̄a nte nnyịn ikemede ndibọ ufọn nto uwa ufak Christ. Ke n̄wedikot emi, ẹwụt ebiet ye ini oro ẹdinịmde mbono emi ke n̄kann̄kụk nnyịn.”
3. Didie ke ikeme ndikot adan̄a ediwak owo nte ikekeme?
3 Edieke efakutom esop mbufo okponde, mbiowo ẹkeme ndidọhọ mbufo ẹnịm n̄wedikot ke ebiet oro mbon en̄wen mîdikwe ẹnọ mbon oro mîsidụhe ke ufọk. Kụt ete ke omokot mbon oro esifiakde aka ebịne, iman fo, nsan̄a utom, nsan̄a ufọkn̄wed, ye mbon en̄wen oro afo emehede. Ke ini etienede asuan n̄wedikot ke mme utịturua, dian enye ye magazine nọ ke ini odotde ndinam ntre. Ndi emekeme ndinam utom usiakusụn̄ unọ un̄wam ke ọfiọn̄ April man enen̄ede anam ekese ke ini inem inem ubịnikọt emi?
4. Ntak emi iyomde mbon oro ẹnyenede udọn̄ ẹtiene nnyịn ẹdidụk Editi?
4 Ke akpanikọ, mbon oro ẹnyenede udọn̄, emi ẹdidụkde edinam emi, ẹyebọ okopodudu ikọ ntiense! Mmọ ẹyekop ẹban̄a akwa ima oro Jehovah akamade nnyịn ke ndinọ ufak. (John 3:16) Mmọ ẹyedifiọk nte Obio Ubọn̄ Abasi edinamde ufọn inọ ubonowo. (Isa. 65:21-23) Ẹyesịn udọn̄ ẹnọ mmọ ndika mbịne mme adaidaha n̄kọdọhọ ẹn̄wam mmimọ inyene ukpepn̄kpọ Bible man ifiọk n̄kpọ efen efen. Akam nnyịn edi yak ediwak mbon oro ẹnyenede eti esịt ẹyere ikot emi ẹnyụn̄ ẹtiene nnyịn ẹdidụk Editi!