Utụk Ndi Abasi Ama Oyom Enye Odu?

Ke ikọ kiet ibọrọ edi baba. Ẹyak nnyịn ise ntak.

ABASI okoyom kpukpru owo ẹnyene mme ukem ifet ndidara uwem ye inemesịt. Kaban̄a nte okobotde owo, nnyịn ikot ite: “Abasi ọdọhọ, ete, Ẹyak nnyịn inam owo isịn ke mbiet nnyịn, ẹtie nte nnyịn: yak mmọ ẹnyụn̄ ẹkara iyak ke akamba mmọn̄, ye inuen ke enyọn̄, ye ufene, ye ofụri isọn̄, ye kpukpru mme andinyọni eke ẹnyọnide ke isọn̄.” Ke ama okobot n̄kpọ ke isọn̄ ama, “Abasi okụt kpukpru se enye akanamde, ndien, sese ẹfọn eti eti.”—Genesis 1:26, 31.

Ndi Abasi ekeme ndidọhọ ke mfụhọ mfụhọ idaha utụk odude mfịn “ẹfọn eti eti”? N̄wan̄ansa-o, koro “Abasi edi ima.” (1 John 4:8) Ẹdọhọ ke enye ‘iten̄eke owo baba kiet enyịn’ ye nte ke “utom esie ọfọn ama: koro kpukpru usụn̄ esie ẹnende: Abasi akpanikọ emi mînamke ukwan̄n̄kpọ, enye edi eti ye edinen.” (Deuteronomy 10:17; 32:4; men Job 34:19 domo.) Ndien apostle Peter ekeberi ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.”—Utom 10:34, 35.

Sia Abasi amade ima, mîten̄eke owo enyịn, edide eti ye edinen, enye akpasan̄a didie obot mme owo ye ndammana utụk man mmọ ẹkûnyene unen ndidara inemesịt? Ndiyak asari odu ke ufọt mme owo nnyụn̄ nsịn mmọ ke idaha utụk ekpenen̄ede odu ke ntuaha ye edu esie. Enye okoyom kpukpru mmọ “ẹmana nte nditọisọn̄ ẹnyụn̄ ẹnyene ukem ukpono ye unen.” Edi, nte an̄wan̄ade mme n̄kpọ itiehe ntre mfịn. Ntak-a?

Ntak Utụk

Abasi ndikobot mme owo ndidi ukem iwọrọke ite ke enye okoyom kpukpru mmọ ẹdi ukem ke kpukpru n̄kpọ. Mmọ ẹkeme ndikpụhọde ke ndammana ukeme, mme udọn̄, ye ke ido. Mmọ ẹkeme ndikpụhọde n̄ko ke idaha ye udomo odudu ukara. Ke uwụtn̄kpọ, erenowo ye n̄wan idịghe ukem ke kpukpru n̄kpọ, edi Abasi okobot n̄wan nte “andinyan̄a” erenowo. (Genesis 2:18) Mme ete ye eka nte an̄wan̄ade ẹkpụhọde ke odudu ukara. Nte ededi, kpa ye mme ukpụhọde ẹmi, akana kpukpru owo—iren, iban, ye nditọwọn̄—ẹnyene mme ukem ifet ndiyụhọ mme akpan n̄kpọ oro ẹyomde kaban̄a inemesịt nte enọ Abasi. Akana kpukpru mmọ ẹnyene ukem ukpono ye idaha ke iso Abasi.

Kpasụk ntre, ẹma ẹnọ nditọ Abasi eke spirit, oro ẹkebotde mbemiso mme owo, nsio nsio utom ye mbiomo. (Genesis 3:24; 16:7-11; Isaiah 6:6; Jude 9) Kpa ye oro, ke ufọt se ẹkenọde mmọ, kpukpru owo ẹma ẹkeme ndidara mme n̄kpọ uwem oro Abasi ọnọde ye inemesịt ke ukem udomo. Mmọ ke ntem ẹkewụt unana asari Abasi ke utịbe utịbe usụn̄.

Ke mfụhọ, edibotn̄kpọ eke spirit kiet ikoyụhọke ye ndutịm unana asari Abasi. Enye ama oyom n̄kpọ awak akan se Abasi ọkọnọde enye, oyomde edikon̄ idaha oro okon̄de etieti. Ebede ke ndiyak ukwan̄ udọn̄ emi ọkọri, enye ama odomo idem ye Jehovah, emi nte Andibot enyenede unen ndinyene akakan idaha. Ọsọn̄ibuot eyen Abasi eke spirit emi nte ini akade ama atap mme owo man ẹyom n̄kpọ awak akan se Abasi ọkọnọde mmọ. (Genesis 3:1-6; men Isaiah 14:12-14 domo.) Ntem, eketie nte ẹma ẹbiat ndutịm Jehovah kaban̄a mme owo ndidara uwem ye inemesịt. Ọsọn̄ibuot spirit emi, ẹwụtde ke Ediyarade 20:2 (NW) nte “Devil ye Satan,” ama akabade edi ibak ibak andisịn nsọk nnọ utụk owo.

Ndi N̄kpọ Ẹyekpụhọde Tutu Amama?

Ke ikọ kiet ibọrọ edi ih!

Edi anie ekeme ndida mme ukpụhọde oro ẹyomde ndi? Nte eyịghe mîdụhe, ndusụk mme adausụn̄ ẹdide owo ẹmen̄wana ke ofụri esịt ke ediwak isua ikie ndinam ntre. Unen oro mmọ ẹkụtde edi esisịt, anamde ediwak owo ẹbiere nte ke idịghe ata idem n̄kpọ ndidori enyịn ke ẹyetre mfịna utụk owo tutu amama. Nte ededi, ẹwet ekikere Abasi ke Isaiah 55:10, 11: “Kpa nte edịm ye snow ẹtode ke enyọn̄ ẹsụhọde, ndien ifiakke ika do, tutu ẹbịt isọn̄, ẹnyụn̄ ẹnam enye afiari onyụn̄ etịbe, ẹnyụn̄ ẹda n̄kpasịp ẹnọ andisuan, ẹda udia ẹnọ andidia: kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”

Edi n̄kpọ ndọn̄esịt didie ntem ndifiọk nte ke Jehovah Abasi amatan̄a ete ke imọ iyosu akpasarade un̄wọn̄ọ imọ ndinọ mme owo ukem ifet ndinyene uwem ye inemesịt! Nte Abasi akpanikọ, enye obiom idemesie mbiomo ndisu se enye ọn̄wọn̄ọde. Ke inemesịt, enye enyene uduak ye odudu ndinam ntre. Didie ke enye edinam emi?

Ibọrọ ọkọn̄ọ ke Obio Ubọn̄ emi Jesus Christ ekekpepde kpukpru mme anditiene enye ndibọn̄ akam mben̄e: “Ete nnyịn emi odude ke heaven: . . . Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Ih, Obio Ubọn̄ Abasi edi n̄kpọ emi Jehovah edidade “[anuak] onyụn̄ ama kpukpru mme idụt ẹmi [ẹdude idahaemi], ndien enye ayada ke nsinsi.”—Daniel 2:44.

Ke idak ukara Obio Ubọn̄ heaven, obufa n̄kaowo ọyọwọrọ edi. Ke afan̄ emi, apostle John ekewet ke akpatre n̄wed Bible, Ediyarade, ete: “N̄kụt obufa enyọn̄ ye obufa isọn̄; koro akpa enyọn̄ ye akpa isọn̄ ẹma ẹbe ẹfep.” (Ediyarade 21:1) Kpukpru idiọk ikpehe utụk ẹyebe ẹfep—unana, udọn̄ọ, unana ifiọk, asari, ye mme ndutụhọ eke owo eken.a

Ke se ibede isua ikie, Mme Ntiense Jehovah ẹdụri ntịn̄enyịn mme owo ẹnọ Obio Ubọn̄ oro. (Matthew 24:14) Ebede ke n̄wed ye ke ọkpọkpọ un̄wam, mmọ ẹsịn̄ede idemmọ ke ndin̄wam mme owo ẹnyene ifiọk uduak Abasi nte ẹwetde ke Bible. Nte ededi, utom unọ ukpep mmọ eke ofụri ererimbot inọhọ mme owo idotenyịn ndidu uwem unana utụk ye inemesịt ke ini iso kpọt edi enye n̄ko ọnọ mme ufọn idem idahaemi ke nditre mfịna utụk. Ẹyak nnyịn ise nte edide ntre.

[Ikọ idakisọn̄]

[Se Ẹwetde ke Ikpọ Abisi ke page 5]

Abasi okoyom mme owo ẹnyene mme ukem ifet ndinyene uwem ye inemesịt