Nditre Mfịna Utụk

Andibot ọyọsọp ndida unana utụk oro mme owo ẹnen̄erede ẹyom ndi. Tutu ini oro, nnyịn ke nsụhọde n̄kaha imekeme ndinam mme usio-ukot nditre mfịna utụk oro afịnade nnyịn ye mme ubon nnyịn. Nte Nelson Mandela, akani adaibuot ukara South Africa, ọkọdọhọde, “se nnyịn idade se nnyịn inyenede inam, idịghe se ẹnọde nnyịn, anam owo kiet okpụhọde ye owo en̄wen.”

MBỤK ọsọn̄ọ ikọ esie. Odu ediwak iren ye iban ẹmi ẹkenọde ata esisịt n̄kpọ ke emana edi ẹmi, ebede ke ndida se mmọ ẹkenyenede nnam n̄kpọ, ẹkekụtde unen oro anamde mmọ ẹkpụhọde ye uke mmọ oro ekemede ndidi ẹma ẹnen̄ede ẹnyene enọ. Ke edide isio, mbon eken oro ẹkenọde n̄kpọ uwak uwak toto ke emana ẹma ẹtahade se mmọ ẹkenyenede ẹnyụn̄ ẹkpu ndida ofụri ukeme mmọ nnam n̄kpọ.

Da Se Afo Enyenede Nam N̄kpọ ke Ofụri Ukeme

Mme Ntiense Jehovah ẹnyene ọkpọsọn̄ udọn̄ ndin̄wam mme owo ẹnyene ifiọk ẹban̄a mme uduak Abasi ebe ke ukpepn̄kpọ Bible. Nte ededi, mmọ ẹfiọk ẹte ke man mme owo ẹnyene ọyọhọ ufọn ẹto ntọt Bible, ana mmọ ẹdiọn̄ọ ndikot n̄wed nnyụn̄ n̄wet n̄kpọ. Ke ntak oro, Mme Ntiense Jehovah ẹmekpep ediwak tọsịn owo ke mme itie duop ndikot n̄wed nnyụn̄ n̄wet n̄kpọ, esịnede owo 23,000 (etisịm ufọt ufọt iduọk isua 1990) ke idụt Edem Usoputịn Africa kiet kpọt. Ke etịn̄de aban̄a n̄wọrọnda n̄kpọ n̄kaowo oro Mme Ntiense Jehovah ẹnọde, San Francisco Examiner ọkọdọhọ ete: “Afo emekeme ndida mmọ nte nditọisọn̄ oro anade ẹkpebe. Mmọ ẹsikpe tax mmọ ifịk ifịk, ẹse ẹban̄a mbon udọn̄ọ, ẹn̄wana ye unana ifiọkn̄wed.”

Ke adianade do, ebede ke n̄kaiso unọ ukpep ke an̄wan̄wa utịn̄ikọ, Mme Ntiense Jehovah ẹmekpep ediwak tọsịn owo ke mme itie ikie ndikabade ndi mme etịn̄ikọ oro ẹdotde, ẹkemede nditịn̄ ikọ udọn udọn ke eferife. Ndusụk ke otu ediwak tọsịn ẹmi ẹdi mbon ẹmi ini kiet ko ẹkenyenede n̄kpọsọn̄ mfịna utịn̄ikọ. Da eren kiet otode South Africa ke uwụtn̄kpọ, emi ekewetde ete: “Ekek mi ama ọdiọk tutu n̄kabade edi owo emi mîtarake ido, nsiberide edem kpukpru ini ke mbon en̄wen nditịn̄ ikọ ke ibuot mi. . . . Ke ini n̄kesịnde enyịn̄ ke Ufọkn̄wed Utom Ukara Abasi n̄konyụn̄ nnyenede ndikot Bible ke iso ekpri otu . . . , mma n̄kek ekek tutu n̄kekemeke ndikụre se ẹkenọde nnam ke ini oro ẹkenọde. Ke mbono esop oro ama akasuana [ọnọitem] ama ọnọ mi eti item ke mfọnido. Enye ama ọnọ ekikere ete n̄kpep ndisikot n̄wed ikpọn̄ uyo ọwọrọ. Mma nnam emi, mbiatde ini ke usen ke usen ndikot Bible mi ye magazine Enyọn̄-Ukpeme uyo ọwọrọ.” Eren emi ama anam n̄kọri tutu idahaemi enye esitịn̄ ikọ an̄wan̄wa ọnọ otuowo ẹmi ẹwakde ẹsịm ediwak ikie, idem ediwak tọsịn.

Ndinyene Ukem Idaha ke Otu Nditọete

Kaban̄a ukpepn̄wed, usọbọ, ye idaha ndutịm uforo ye eke n̄kaowo, mme idaha ẹnen̄ede ẹkpụhọde ke otu Mme Ntiense Jehovah. Mme ukpụhọde ẹmi n̄kukụre ẹwụt mme anana-mfọnmma idaha ererimbot emi mmọ ẹdụn̄de. Edi ke edide isio ye mme otu ido ukpono eken, ekpere ndidi ẹsio mme asari eke orụk, eke n̄kaowo, ye eke ndutịm uforo ẹfep ke otu mmọ.

Mmọ ẹnam emi ebe ke ndisịn ofụri ukeme mmọ ke ndinam se mmọ ẹkpepde ẹto Bible. Mmọ ẹnyịme mme utọ edumbet Bible ẹmi ke ofụri esịt: “[Nsehe] nte owo esede; koro owo esede enyịn, edi Jehovah ese esịt.” (1 Samuel 16:7) “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) “Ẹkûda idiọk ẹsio owo usiene idiọk. Ẹsịn idem ẹkere ndinam ido eke enyenede ukpono ke enyịn kpukpru owo. Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo.”—Rome 12:17, 18; se n̄ko 1 Timothy 6:17-19; James 2:5, 9.

Sia ẹsọn̄ọde ẹyịre ke mme edumbet Bible ẹmi ẹsịnde udọn̄ ẹnọ edidianakiet mi, Mme Ntiense Jehovah inyịmeke utụk ekededi ke otu mmọ oro ọkọn̄ọde ke asari eke orụk, eke n̄kaowo, m̀mê eke ndutịm uforo. Ke uwụtn̄kpọ, mme n̄kpọ ẹmi inyeneke n̄kpọ ndinam ke ndibiere owo emi ẹkpenọde mme ifetutom ke esop Christian. Edinọ mme utọ ifetutom nte edinọ ukpep ye edise enyịn ọkọn̄ọ ofụri ofụri ke mme n̄kpọ eke spirit oro ẹnamde owo odot.—1 Timothy 3:1-13; Titus 1:5-9.

Ye mme owo ẹmi ẹma ẹkekụt ukụt ke mme utụk ẹtode ererimbot asari emi, edi inem inem n̄kpọ didie ntem ndikụt mbon en̄wen ẹnamde n̄kpọ ye mmọ nte nditọete iren ye iban ẹmi ẹnyenede ukem idaha ke iso Andibot mmọ! Martina ekeme ndisọn̄ọ emi. Ke ete esie ama ekesịn ubon, ẹkebọk enye ke ubon ubuene oro eka kpọt ọbọkde nditọ. Ẹkesiwak ndinam n̄kpọ ye enye nte owo emi ẹbịnde ẹfep ke n̄kaowo, enyene esisịt uko idemowo, ama onyụn̄ ọsọn̄ enye ndinyene eti itie ebuana ye mbon en̄wen. Enye ama ọkọri edu unana udọn̄. Nte ededi, mme n̄kpọ ẹma ẹkpụhọde ke enye ama ọkọtọn̄ọ ndikpep Bible onyụn̄ akabade edi kiet ke otu Mme Ntiense Jehovah. Enye ọdọhọ ete: “Nnyene ndisụk n̄n̄wana ye etikwo etikwo ekikere, edi idahaemi ami mmekeme ndiyọ mfịna emi ọfọn akan. Ukpono idemowo oro nnyenede ọmọkọri, ndien mmesitịn̄ ikọ ye n̄kponn̄kan uko. Akpanikọ ọmọnọ mi ekikere edidiọn̄ọ idem. Idahaemi mmọfiọk nte ke Jehovah ama mi ye nte ke odot ẹdu uwem.”

Nte otu mme Christian ofụri ererimbot, Mme Ntiense Jehovah ke se ibede idụt 230 ẹdara ndusụk udomo ukem idaha oro enen̄erede edi n̄wọrọnda ke ererimbot mfịn. Nte esop ido ukpono efen ekededi ekeme nditịn̄ ntre onyụn̄ ada mme akpanikọ ọsọn̄ọ oro?

Edi akpanikọ, Mme Ntiense Jehovah ẹtịn̄ ata idem n̄kpọ. Mmọ ẹnyịme ye unana ubiatini nte ke sia idide mme andito anana-mfọnmma n̄kann̄kụk, mmimọ ikemeke nditre utụk owo kpa nte mbon eken oro ẹma ẹkedomo ke ediwak isua ikie—ẹnyụn̄ ẹkpude. Nte ededi, mmọ ẹdat esịt nte ke otu mmimọ, mmimọ imanam ekese nditre akama-n̄kpa mfịna emi. Ndien ye ọkpọsọn̄ mbuọtidem ke un̄wọn̄ọ Abasi, mmọ ẹsak iso ẹse obufa ererimbot edinen ido emi utụk edidide n̄kpọ eset ke nsinsi.

Ih, ẹyesọp ndinam kpukpru okopitem owo ẹfiak ẹnyene ukem “ukpono ye unen” oro Andibot mmọ okoyomde mmọ ẹnyene ke akpa ifet. Nso inem inem ekikere! Ndien isan̄ emi enye edidi ata idem n̄kpọ!

[Ndise ke page 7]

Mme Ntiense Jehovah ẹn̄wana ye unana ifiọkn̄wed ebe ke ndikpep ediwak tọsịn owo ke mme itie duop ndikot n̄wed nnyụn̄ n̄wet n̄kpọ

[Ndise ke page 8]

Akpanikọ Bible an̄wam ẹtre asari eke orụk, eke n̄kaowo, ye eke ndutịm uforo