Sɔɔmɔ Kpeei Kɛha January
Otsi ni Jeɔ Shishi January 6
10 min: Asafoŋ adafitswai. Adafitswai ni ahala kɛjɛ Wɔ Maŋtsɛyeli Sɔɔmɔ lɛ mli. Wiemɔ September shiɛmɔyaa he akɔntaabuu kɛha maŋ lɛ kɛ nyɛ asafo lɛ he.
20 min: Kristofoi Ayookpeemɔi ni Ŋmɛɔ Pɛpɛɛpɛ. Wiemɔ ni onukpa kɛbaaha ni jɛ October 1, 1984 Buu-Mɔɔ lɛ baafai 14-25 (April 15, 1984 Watchtower lɛ baafai 10-21), kɛ September 1, 1996 nɔ̃ lɛ baafai 22 kɛ 23 lɛ kukuji 11-14 ni wieɔ saji otii nɛɛ ahe: (1) Gbalashihilɛ ji gbɛjianɔ ni yɔɔ miishɛɛ ni yɔɔ krɔŋkrɔŋ ni Nyɔŋmɔ to, ni no hewɔ lɛ Kristofoi haa ehiɔ shi nakai. Mɛi ni ekpaŋ akɛ amɛbaabote gbalashihilɛ mli lɛ baakpɛ yiŋ yɛ nɔ̃ gbalashihilɛ ni amɛtaoɔ he (kusum naa nɔ̃ loo maŋ nɔ̃), agbɛnɛ hu, kɛji akɛ akɛ okpɔlɔŋmɛɛ loo henaabuamɔ baafata he. Esaaa akɛ mɛi krokomɛi wieɔ shiɔ nɔ ni amɛhala lɛ. (Okɛto Romabii 14:4 he.) (2) Nilee yɛ mli akɛ aaaha mɛi fioo aba nifeemɔ lɛ shishi, koni akwa “shihilɛ lɛ mli hewoo” ni kɔɔ ayemforo atade sɛɛ kakadaŋŋ kɛ ayemforo atadei ahe lɛ. (Yes. 61:10; 1 Yoh. 2:15-17) (3) Yɛ be mli ni kusumii ni bɛ hwanyaŋŋ ni yɔɔ ni akɛaatsu nii lɛ sa lɛ, maŋ nibii ni afɔɔ feemɔ ni fiteɔ shika babaoo loo efiteɔ be babaoo ni akɛaatsu nii waa kɛmɔ shi lɛ he ehiaaa. Esa akɛ suɔmɔ he nɔ ko ni ayemforowu lɛ kɛ ayemforo lɛ aaajie lɛ kpo lɛ afee nɔ ni woo yɔɔ mli. (Mat. 5:16; Kol. 3:17) (4) Ekãaa mɛi enyɔ lɛ anɔ doo akɛ amɛto “henaabuamɔ kɛha nɔ ko yeli” he gbɛjianɔ akɛ yookpeemɔ lɛ fã, shi kɛ amɛaafee nakai lɛ, no lɛ hiɛshikamɔ he miihia yɛ hei ni kɔɔ niyenii, dãai, lala kɛ joo fɛɛ joo he. (1 Kor. 10:31, 32) (5) Esaaa akɛ mɛi enyɔ lɛ awekumɛi loo nanemɛi nyɛɔ mɛi enyɔ lɛ anɔ koni amɛfee nibii kɛteke nɔ, shi moŋ amɛye amɛbua amɛ ni amɛkɛ yiŋkpɛɛ kpakpa atsu nii. Yookpeemɔ shishi ni ayaa beni afɔko nine atsɛko mɔ lɛ jeee suɔmɔ loo mumɔŋ dalɛ he okadi. (Heb. 5:14; Bɔf. 20:35; Mat. 7:12) (6) Esaaa akɛ mɛi ni yɔɔ nii fioo ko pɛ lɛ bɔɔ mɔdɛŋ akɛ amɛkɛ mɛi ni amɛshihilɛi baaŋmɛ gbɛ ni amɛfee yookpeemɔ ni da lɛ aaashi akaŋ. (Gal. 5:26) (7) Yɛ be mli ni onukpai yeɔ amɛbuaa Kristofoi gbalashihilɛ mli hefatalɔi lɛ, esa akɛ ehi amɛ jwɛŋmɔ mli akɛ, kɛ nɔ ni afeɔ lɛ eteee shi ewooo Ŋmalɛ naa shishitoo mlai lɛ, ehe ehiaaa ni amɛbu mɔ aŋkro lɛ henilee ni ekɛtsuɔ nii lɛ fɔ. (1 Kor. 1:24; File. 8, 9) (8) Yɛ be mli ni esa akɛ wɔ fɛɛ wɔkwa mɛi krokomɛi anane tɔ̃tɔ̃mɔ yɛ saji ni kɔɔ henilee he po mli lɛ, ŋmalɛ fiii sɛɛ nakai nɔŋŋ hu akɛ wɔɔnyɛ mɛi krokomɛi anɔ ni amɛfee nii yɛ wɔ henilee lɛ naa.—Rom. 14:1-4, 21, 22.
15 min: “Wɔsa ni Awula Wɔ Koni Wɔtsɔɔ Mɛi Krokomɛi Anii.” (Kukuji 1-6) Wiemɔ kukuji 1-2 lɛ he saji kuku, ni oma bɔ ni ehe hiaa akɛ wɔɔna hekɛnɔfɔɔ akɛ, wɔbaanyɛ wɔtsɔ Yehowa yelikɛbuamɔ nɔ wɔtsɔɔ mɛi krokomɛi anii kɛmɔ shi lɛ nɔ mi. Ha shiɛlɔ kɛ shiatsɛ kui sɔrɔtoi enyɔ afee shiɛmɔ wiemɔi ni yɔɔ kukuji 3-6 lɛ he nɔkwɛmɔ nii, koni kuu fɛɛ kuu afee bɔ ni amɛaafee klɛŋklɛŋ saramɔ kɛ sɛɛsaramɔ he nɔkwɛmɔ nii amɛtsɔɔ.
Lala 14 kɛ naagbee sɔlemɔ.
Otsi ni Jeɔ Shishi January 13
13 min: Asafoŋ adafitswai. Shika he akɔntaabuu. Maa woji tɛtrɛbii heei lɛ amli saji ni abaanyɛ akɛgba sane lɛ he saji otii anɔ mi. Okɛ gbɛtsɔɔmɔi ni tsɔɔ bɔ ni wɔɔfee wɔjie wɔhe kpo wɔtsɔɔ, beni wɔbɛŋkɛɔ mɛi, bɔni afee ni wɔye amɛ odase trukaa lɛ aha. Ha toibolɔi agba wiemɔi ni amɛkɛtsu nii kɛje shishi yɛ be mli ni amɛkɛ mɛi krokomɛi wieɔ yɛ shwapoi anaa, gbɛjegbɛ nɔ, yɛ shwɛmɔ he, tsɔne ni maŋbii taraa mli lɛ mli, kɛ ekrokomɛi lɛ ahe sane. Tsɔɔmɔ otsi lɛ naagbee lɛ shiɛmɔyaa he gbɛjianɔ ni ato.
15 min: “Wɔsa ni Awula Wɔ Koni Wɔtsɔɔ Mɛi Krokomɛi Anii.” (Kukuji 7-9) Gbaa sɛɛsaramɔi ahe niiashikpamɔ ni anaa yɛ 1995 Yearbook lɛ baafa 45 lɛ he sane, ni oma bɔ ni ehe hiaa ni adi miishɛɛ fɛɛ ni anaa lɛ sɛɛ lɛ nɔ mi. Ha shiɛlɔ ni he esa afee shiɛmɔ wiemɔi ni yɔɔ kukuji 7-8 lɛ he nɔkwɛmɔ nii. Eyɛ mli akɛ akɛ woji krokomɛi ha kɛjɛ shishijee moŋ, shi esa akɛ wɔbɔ mɔdɛŋ waa akɛ wɔkɛ Nilee wolo lɛ aaafee nikasemɔi yɛ sɛɛ mli. Wo mɔ fɛɛ mɔ hewalɛ koni eto be ko he gbɛjianɔ yɛ otsi ni baa lɛ mli koni ekɛfee sɛɛsaramɔi.
17 min: Be Eshɛ ni Akɛbaafee Advance Medical Directive/Release Card lɛ Ehee. Onukpa ni he esa agba bɔ ni ehe hiaa ni aŋmala wolo lɛ nɔ nii fɛɛ ni ahiɛ yɛ bei fɛɛ mli lɛ he sane. Nɛkɛ wolo nɛɛ wieɔ ehaa bo yɛ be mli ni onyɛɛɛ owie oha ohe, beni sane ko enina bo trukaa lɛ. (Okɛto Abɛi 22:3 he.) Okɛ gbɛtsɔɔmɔi krokomɛi ni jɛ January 1996 Wɔ Maŋtsɛyeli Sɔɔmɔ lɛ baafa 2 lɛ mli lɛ afata he. Sanesɛɛkɔmɔ ni akɛtsuɔ nii yɛ saji ni atsɔɔ mli fitsofitso nɛɛ amli lɛ baaha nɔ̃ kpakpa ajɛ Yehowa ŋɔɔ aba.—Abɛi 16:20.
Lala 15 kɛ naagbee sɔlemɔ.
Otsi ni Jeɔ Shishi January 20
10 min: Asafoŋ adafitswai. Tĩi “Kpokpaa nɔ Kpee He Gbɛjianɔtoo Hee” lɛ Mli.
15 min: “Abaahere Gbɔmɛi Sɔrɔtoi Fɛɛ Yiwala.” Sanebimɔi kɛ hetooi. Ha toibolɔi agba niiashikpamɔi komɛi ni tsɔɔ bɔ ni amɛfee ni amɛha ni gbɔmɛi ni jɛ shihilɛi sɔrɔtoi amli lɛ here sane lɛ nɔ jogbaŋŋ lɛ he sane kuku.
20 min: Odaseyeli Kɛtsɔ Jeŋba Kpakpa Nɔ. Onukpa ko kɛ gbekɛbii enyɔ loo etɛ agba sane. Sanegbaa lɛ damɔ November 1, 1987 Buu-Mɔɔ lɛ baafai 20-30 (August 15, 1987 Watchtower lɛ baafai 10-20) nɔ. Akɛ niiashikpamɔi fɛɛ ni aŋma kɛ nyɛ asafo lɛ mli niiashikpamɔi fɛɛ hu ni tsɔɔ bɔ ni mɛi ni naa enɛ lɛ ena gbekɛbii Kristofoi ajeŋba kpakpa lɛ he miishɛɛ waa amɛha lɛ afata he.
Lala 23 kɛ naagbee sɔlemɔ.
Otsi ni Jeɔ Shishi January 27
5 min: Asafoŋ adafitswai.
10 min: Sanebimɔ He lɛ ni woloŋmalɔ lɛ baatĩ mli.
15 min: “‘Wɔshiɛɔ Wiemɔ Lɛ.’” Sanebimɔi kɛ hetooi. Okɛ saji komɛi ni tsɔɔ nɔ hewɔ ni wɔhiɛ sɔɔ sɛɛnamɔ ni yɔɔ Nyɔŋmɔ Wiemɔ lɛ mli lɛ waa diɛŋtsɛ lɛ afata he.—Kwɛmɔ March 22, 1984 Awake! lɛ baafai 9-11.
15 min: Tĩi Wolo ni Akɛbaatsu Nii yɛ February Mli lɛ Mli. Tsɔɔmɔ wolo lɛ fãi sɔrɔtoi ni yɔɔ miishɛɛ, tamɔ: (1) Saneyitsei ni gbalaa mɔ jwɛŋmɔ lɛ, (2) mfonirii fɛfɛji ni atɛŋ lɛ, (3) adekai kɛ taoi sɔrɔtoi ni akɛtsɔɔ nii, kɛ (4) sanebimɔi ni akala ni teeɔ sane hesusumɔ shi. Yɛ kpee lɛ fã ko ni tsɔ hiɛ lɛ kɛ gbeekpamɔ naa lɛ, awo hewalɛ ni akɛ ŋmalɛ ko ni ahala ni sa jogbaŋŋ lɛ atsu nii yɛ shiɛmɔ wiemɔ lɛ mli. Ha afee shiɛmɔ wiemɔ kuku he nɔkwɛmɔ nɔ kome loo enyɔ. Akai mɔ fɛɛ mɔ koni ahé woji ni akɛbaatsu nii otsi nɛɛ.
Lala 26 kɛ naagbee sɔlemɔ.