Ani Esa Akɛ Ohe Oye?

Gbɔmɛi fɔɔ kɛɛmɔ akɛ amɛheɔ Triniti lɛ amɛyeɔ, ni kɛlɛ amɛshishinumɔ yɛ enɛ he yɛ sɔrɔto.

Mɛni diɛŋtsɛ ji Triniti lɛ?

Ani Biblia lɛ tsɔɔ enɛ?

Ani Yesu Kristo ji Nyɔŋmɔ Ofe lɛ kɛ Triniti lɛ fa?

ANI oheɔ Triniti lɛ oyeɔ? Gbɔmɛi pii yɛ Kristendom ni heɔ yeɔ. Yɛ fɛɛ sɛɛ lɛ, etee nɔ efee sɔlemɔi lɛ atsɔɔmɔ titri afii ohai abɔ nɛ.

Yɛ enɛ hewɔ lɛ, obaasusu akɛ sanebimɔ ko bɛ he. Shi eko yɛ, ni yɛ sɛɛ mli nɛɛ po lɛ esɛɛfilɔi lɛ ekomɛi eha naataomɔ lɛ mli ewo wu.

Mɛni hewɔ esaaa akɛ sane ni tamɔ nɛkɛ feɔ sanegbaa ko kɛkɛ ni hoɔ eyaa? Ejaakɛ Yesu diɛŋtsɛ kɛɛ: “Enɛ ji naanɔ wala lɛ: ni aaale bo, anɔkwa Nyɔŋmɔ kome pɛ lɛ, kɛ Yesu Kristo ni otsu lɛ lɛ.” No hewɔ lɛ wɔ wɔsɛɛ be fɛɛ damɔ le ni wɔɔle bɔ ni Nyɔŋmɔ su ji diɛŋtsɛ lɛ nɔ, ni enɛ tsɔɔ akɛ ni wɔɔya Triniti naataomɔ lɛ shishifa lɛ he. No hewɔ lɛ, mɛni hewɔ bo diɛŋtsɛ lɛ otaooo enɛ mli?​—Yohane 17:⁠3, Catholic Jerusalem Bible (JB).

Triniti he jwɛŋmɔi sɔrɔtoi yɛ. Shi nɔ ni ale ji akɛ, yɛ Triniti tsɔɔmɔ lɛ mli lɛ, mɛi etɛ yɔɔ Nyɔŋmɔ-su lɛ mli, Tsɛ, Bi kɛ Mumɔ Krɔŋkrɔŋ; ni kɛlɛ, amɛ fɛɛ amɛfeɔ Nyɔŋmɔ kome. Tsɔɔmɔ lɛ kɛɔ akɛ mɛi etɛ lɛ fɛɛ yeɔ egbɔ loo tipɛŋfoi, amɛ fɛɛ amɛji ofe, abɔɔɔ amɛ, ni amɛhi shi kɛjɛ naanɔ yɛ Nyɔŋmɔ-su lɛ mli.

Shi kɛlɛ, mɛi krokomɛi kɛɔ akɛ Triniti tsɔɔmɔ lɛ ji amale, akɛ Nyɔŋmɔ Ofe kome pɛ yɔɔ ni esoro lɛ, eyɛ daa, kɛ hewalɛ fɛɛ tsɛ. Amɛkɛɔ akɛ dani Yesu aaaba shikpɔŋ nɔ lɛ no mli lɛ etamɔ ŋwɛibɔfoi lɛ, mumɔŋ gbɔmɔ ni esoro lɛ ni Nyɔŋmɔ bɔ lɛ, ni yɛ enɛ hewɔ lɛ eyɛ shishijee. Amɛtsɔɔ akɛ Yesu kɛ Nyɔŋmɔ Ofe lɛ yeko egbɔ yɛ shishinumɔ ko kwraa mli da; ebaa ehe shi ehaa Nyɔŋmɔ daa, ni nakai eka he eji. Amɛheɔ amɛyeɔ hu akɛ mumɔ krɔŋkrɔŋ lɛ jeee gbɔmɔ shi moŋ Nyɔŋmɔ mumɔ, enifeemɔ loo nitsumɔ hewalɛ lɛ.

Mɛi ni fiɔ Triniti lɛ sɛɛ lɛ kɛɔ akɛ jeee akɛ ato shishi ama jamɔ mli blemasaji anɔ pɛ kɛkɛ shi moŋ edamɔ Biblia lɛ hu nɔ. Mɛi ni wieɔ shiɔ tsɔɔmɔ nɛɛ kɛɔ akɛ ejeee Biblia mli tsɔɔmɔ, ejaakɛ yinɔsane mli niŋmaa ko po kɛɛ akɛ: “[Triniti] lɛ shishijee jɛ wɔŋjamɔ mli diɛŋtsɛ.”​—The Paganism in Our Christianity.

Kɛ Triniti lɛ ji anɔkwale lɛ, belɛ ebaa Yesu shi akɛ aaakɛɛ akɛ ekɛ Nyɔŋmɔ yeee egbɔ kwraa akɛ Nyɔŋmɔ-su lɛ fã. Shi kɛji akɛ Triniti lɛ ji amale lɛ, belɛ ebaa Nyɔŋmɔ Ofe lɛ shi akɛ aaatsɛ mɔ ko akɛ etipɛŋ loo ekɛ lɛ yeɔ egbɔ, ni nɔ ni ehiii fe fɛɛ lɛ ni atsɛ Maria akɛ “Nyɔŋmɔ Nyɛ.” Kɛ Triniti lɛ ji amale lɛ, egbeɔ Nyɔŋmɔ he guɔ akɛ aaakɛɛ, taakɛ wolo, Catholicism lɛ kɛɔ lɛ, akɛ: “Kɛ [gbɔmɛi] mɔɔɔ nɛkɛ Hemɔkɛyeli nɛɛ mli akɛ nɔ ni yeɔ emuu ni muji ko bɛ he lɛ, belɛ amɛhiɛ baakpata kɛya naanɔ. Ni Katolek Hemɔkɛyeli lɛ ji enɛ: wɔjaa Nyɔŋmɔ kome yɛ Triniti mli.”

Belɛ yiŋtoi kpakpai yɛ ni no hewɔ lɛ esa akɛ osumɔ akɛ ooole anɔkwale ni kɔɔ Triniti lɛ he lɛ. Shi dani wɔɔpɛi eshishijee kɛ anɔkwale ni ekɛɔ akɛ eji lɛ mli lɛ, ebaaye ebua akɛ wɔɔtsɔɔ nɛkɛ tsɔɔmɔ nɛɛ mli jogbaŋŋ diɛŋtsɛ. Mɛni diɛŋtsɛ ji Triniti lɛ? Te mɛi ni fiɔ enɛ sɛɛ lɛ tsɔɔ mli amɛhaa tɛŋŋ?

Kɛ okadi ko etsɔɔɔ lɛ, belɛ Ŋmalɛi ni atsɛ ni yɔɔ wolo nɛɛ mli lɛ jɛ Ga Biblia lɛ mli

[Mfonirii ni yɔɔ baafa 2]

Abɛkugbɛ: Mizraim tɛ ni akpɛ yɛ afii akpei enyɔ (D.Ŋ.B.) lɛ mli, ni miitsɔɔ Amon-Ra, Ramses II, kɛ Mut ni feɔ Triniti. Ninejurɔgbɛ: Afii ohai nyɔŋma-kɛ-ejwɛ (Ŋ.B.) Triniti he nii ni ashɔ ni feɔ Yesu Kristo, Tsɛ lɛ, kɛ mumɔ krɔŋkrɔŋ lɛ. Kadimɔ enɛ, gbɔmɛi etɛ kɛ naji ejwɛ pɛ.