Ani Ehe Miiba Sɛɛnamɔ Kɛmiiha Bo?

¹ Gbɔmɛi akpekpei abɔ ni yɔɔ ŋmɛnɛ lɛ miisumɔ ni amɛle bɔ ni amɛaafee amɛye naagbai anɔ koni amɛná shihilɛi ni yɔɔ miishɛɛ. Amɛkɛ ekãa kaneɔ woji ni haa ayaa hiɛ yɛ shihilɛ mli lɛ aloo amɛkpaa gbɛ akɛ kui kɛ gbɛjianɔtoi baaha amɛ ŋaawoo ni tsɔɔ bɔ ni amɛaafee amɛná shihilɛi kpakpai. Ekolɛ amɛteŋ mɛi komɛi baanyɛ atsɔɔ sɛɛnamɔi fioo komɛi ni amɛná. Ni kɛlɛ, kɛ́ wɔkwɛ bɔ ni shihilɛ yaa nɔ ŋmɛnɛ lɛ, ani gbɔmɛi fɛɛ ekase bɔ ni amɛaafee amɛná toiŋjɔlɛ shihilɛ mli ŋɔɔmɔ ni amɛtsui anyɔ amɛmli jogbaŋŋ kɛtsɔ adesai anitsɔɔmɔ gbɛjianɔtoi anɔ? Eka shi faŋŋ akɛ dabi!—1 Kor. 3:18-20.

² Yɛ gbɛ kroko nɔ lɛ, wɔ Bɔlɔ lɛ kɛ gbɛtsɔɔmɔ ni hi fe fɛɛ lɛ haa mɛi fɛɛ ni baabo toi lɛ ní eheee nɔ ko yɛ amɛdɛŋ. Yehowa miisumɔ ni mɔ fɛɛ mɔ aná enitsɔɔmɔ lɛ he sɛɛ. Ekɛ e-Wiemɔ ni jɛ mumɔŋ lɛ babaoo eha koni etsɔɔ adesai agbɛ yɛ jalɛ nifeemɔ mli, ni éha ajaje e-Maŋtsɛyeli lɛ he sanekpakpa lɛ yɛ shikpɔŋ nɔ fɛɛ. (Lala 19:8, 9; Mat. 24:14; 2 Tim. 3:16) Esa akɛ abo Yehowa kitãi atoi jogbaŋŋ kɛ́ aaaná shihilɛ ni ŋɔɔ waa.—Yes. 48:17, 18.

³ Gbɛtsɔɔmɔ ni Yehowa kɛhaa lɛ hi kwraa fe nɔ ni je lɛ kɛhaa ni ji woji fɛɛ ni haa shihilɛi yaa hiɛ loo gbɛjianɔ ni atoɔ koni aya hiɛ lɛ. Wɔbaanyɛ wɔná yelikɛbuamɔ kpakpa kɛ sɛɛnamɔi ni sɛɛ tsɛɔ, kɛ́ wɔkɛ gbɛtsɔɔmɔi ni Yehowa kɛha taakɛ atsɔɔ yɛ e-Wiemɔ lɛ mli lɛ, ní egbɛjianɔtoo lɛ kɛtsɔɔ wɔ nii lɛ tsu nii jogbaŋŋ kɛmɔ shi.—1 Pet. 3:10-12.

⁴ Ha Asafoŋ Kpeei Ahe Aba Sɛɛnamɔ Kɛha Bo: Ŋmɛnɛ, Yehowa náa egbɛ̀i lɛ ahe nii ni atsɔɔ wɔ lɛ he miishɛɛ waa diɛŋtsɛ, ni wɔnáa he sɛɛ kɛ́ wɔbo enitsɔɔmɔ toi jogbaŋŋ. Daa otsi kpeei enumɔ ni wɔfeɔ lɛ haa wɔnáa odaseyeli ni tsɔɔ akɛ Yehowa sumɔɔ wɔ waa diɛŋtsɛ. Kɛ wɔtee asafoŋ kpeei lɛ, Nyɔŋmɔ he nilee ni wɔyɔɔ lɛ yaa hiɛ babaoo. Wɔkaseɔ bɔ ni wɔɔfee wɔbu wɔhe kɛjɛ efɔŋ he kɛtsɔ Yehowa ni wɔɔbɛŋkɛ lɛ kpaakpa lɛ nɔ. Yɛ nɛkɛ gbɛ nɔ lɛ, wɔmli filiɔ wɔ.

⁵ Babaoo yɛ lolo. Wɔnyɛɔ ‘wɔlɛɛɔ wɔmli’ yɛ asafoŋ kpeei ashishi. (2 Kor. 6:13) Enɛ biɔ ni wɔle mɛi krokomɛi yɛ asafo lɛ mli. Wɔnáa hewalɛwoo ni wɔkɛhaa wɔhe lɛ he sɛɛ, taakɛ bɔfo Paulo ŋma yɛ ewolo lɛ mli kɛyaha Romabii lɛ. (Rom. 1:11, 12) Beni eŋmaa wolo kɛyaha Hebribii lɛ, ekɛ ŋaawoo ni mli wa waa ha mɛi ni ekolɛ amɛkɛmiifee amɛsu akɛ amɛkɛ amɛhe woŋ Kristofoi ahenaabuamɔ mli lɛ.—Heb. 10:24, 25.

⁶ Miishɛɛ shihilɛ ni haa mɔ tsui nyɔɔ emli lɛ kɔɔ mɛi krokomɛi ahilɛ-kɛhamɔ he miishɛɛ ni wɔɔná lɛ he. Awoɔ wɔ hewalɛ koni wɔtao gbɛ̀i ni wɔɔtsɔ nɔ wɔha mɛi krokomɛi aná miishɛɛ. No hewɔ lɛ, eyɛ faŋŋ akɛ wɔ Kristofoi akpeei lɛ yɛ koni wɔ diɛŋtsɛ wɔná he sɛɛ, kɛ agbɛnɛ koni mɛi krokomɛi ni wɔkɛ amɛ náa naanyobɔɔ kpakpa lɛ hu aná he sɛɛ. Nɔ ni abiɔ kɛjɛɔ wɔdɛŋ ji wɔhe ni wɔkɛaawo mli kɛ wɔtsui fɛɛ.

⁷ Bɔfo Paulo wie nɔ ko ni tamɔ nakai he yɛ ŋaawoo ni ekɛha Timoteo lɛ mli, beni eŋma akɛ: “Ni obɔ Nyɔŋmɔ-jamɔ moŋ he mɔdɛŋ.” (1 Tim. 4:7) Wɔbaanyɛ wɔbi wɔhe akɛ: ‘Ani mikɛ tsɔsemɔ miiha mihe? Ani miikase nii koni maná nɔ ni mikaseɔ yɛ asafoŋ kpeei ashishi lɛ he sɛɛ?’ Hetooi ni wɔkɛbaaha lɛ baafee hɛɛ, kɛ́ wɔboɔ nɔ ni wɔnuɔ yɛ kpeei lɛ ashishi lɛ toi jogbaŋŋ ni wɔbɔɔ mɔdɛŋ ni wɔkɛ nɔ ni wɔkaseɔ lɛ atsu nii lɛ. Esa akɛ wɔnyɛ wɔkɛ hemɔkɛyeli hiŋmɛii akwɛ nii kɛya shɔŋŋ fe bɔ ni nyɛmimɛi ni tsɔɔ nii lɛ naa lɛ amɛhaa, ní wɔna Yehowa akɛ ewebii lɛ a-Tsɔɔlɔ Kpeteŋkpele.—Yes. 30:20.

⁸ Teokrase Sɔɔmɔ Skul kɛ Sɔɔmɔ Kpee: Ato kpeei enyɔ nɛɛ he gbɛjianɔ koni eye ebua wɔ ni wɔhe asa yɛ Kristofoi asɔɔmɔ nitsumɔ lɛ mli. Teokrase Sɔɔmɔ Skul lɛ tsuɔ nakai yiŋtoo lɛ he nii pɛpɛɛpɛ—enɛ ji skul ni emli nikaselɔi lɛ anine shɛɔ nitsɔɔmɔ kɛ ŋaawoo nɔ daadaa. Oyɛ hegbɛ akɛ oootsɔɔ bɔ ni oyaa hiɛ ohaa ákɛ mɔ ni wieɔ yɛ mɛi ahiɛ kɛ agbɛnɛ ákɛ mɔ ni kɛ Nyɔŋmɔ Wiemɔ lɛ mli nitsɔɔmɔ haa. Shi bɔni afee ni oná skul lɛ he sɛɛ jogbaŋŋ lɛ, esa akɛ oha aŋma ogbɛi yɛ mli, ní oya eko, ní okɛ ohe awo mli daa, ní okɛ ohe fɛɛ awo nifeemɔi ni akɛhaa bo lɛ mli. Ŋaawoo ni akɛhaa ni oookpɛlɛ nɔ ni okɛaatsu nii lɛ baaye abua bo koni oya hiɛ.

⁹ Sɔɔmɔ Kpee lɛ tsɔɔ wɔ bɔ ni Kristofoi asɔɔmɔ nitsumɔ lɛ he hiaa ha, ni etsɔɔ wɔ bɔ ni wɔɔfee ni wɔkɛ wɔhe awo kaselɔi afeemɔ nitsumɔ lɛ mli. Ani bo kɛ oweku lɛ náa nitsɔɔmɔ ni akɛhaa yɛ kpeei enyɔ nɛɛ ashishi lɛ he sɛɛ jogbaŋŋ kɛmɔɔ shi? Gbalashihilɛ mli hefatalɔi komɛi ni amɛji Kristofoi lɛ kɛɛ akɛ: “Wɔnu yɛ Sɔɔmɔ Kpee lɛ eko shishi akɛ, esa akɛ wɔsusu daa gbi ŋmalɛ lɛ he akɛ weku. Kulɛ wɔfeee enɛ, shi amrɔ nɛɛ wɔfeɔ.” Te amɛná he sɛɛ amɛha tɛŋŋ? Amɛkpɛlɛ nɔ akɛ: “Wɔnaa akɛ saji ni wɔgbaa yɛ niyenii okpɔlɔ he lɛ yɛ miishɛɛ waa diɛŋtsɛ. Wɔjeee ŋwane dɔŋŋ yɛ gbɛkɛ niyenii ashishi.” Ani gbekɛbii bibii po náa kpeei lɛ ahe sɛɛ. Hɛɛ. Nyɛ lɛ kɛɛ akɛ: “Eyɛ faŋŋ akɛ kpeei lɛ náa wɔbii lɛ anɔ hewalɛ waa diɛŋtsɛ. Yɛ otsi lɛ eko mli lɛ, wɔna akɛ wɔbinuu nukpa ni eye afii ekpaa lɛ miimale. Shi yɛ nakai otsi lɛ mli lɛ, nitsɔɔmɔ ni akɛhaa yɛ kpee lɛ shishi lɛ kɔɔ amale he. Akɛni wɔbinuu lɛ hiɛ miitsɔɔ akɛ eye fɔ́ waa diɛŋtsɛ hewɔ lɛ, ekwɛ etsɛ hiɛ ni ema ehiɛ shi yɛ sɛi lɛ mli. Ekase nɔ ko kɛjɛ mli, ni kɛjɛ no sɛɛ lɛ wɔnáaa naagbai dɔŋŋ.”

¹⁰ Nyɛmi yoo gbɛgbalɔ ko kɛɛ akɛ eyɛ he miishɛɛ akɛ akɛ gbɛtsɔɔmɔi ni baaha wɔya hiɛ yɛ wɔ shiɛmɔ nitsumɔ lɛ mli lɛ haa yɛ Sɔɔmɔ Kpee lɛ mli. Mɛni hewɔ? Etsɔɔ mli akɛ: “Nɔ kome too feemɔ jeɔ mitsine. Misusuɔ yɛ bei komɛi amli akɛ anyɛŋ akɛ ŋaa ni awo yɛ Wɔ Maŋtsɛyeli Sɔɔmɔ lɛ mli lɛ atsu nii. Shi kɛ́ minu yɛ Sɔɔmɔ Kpee lɛ shishi akɛ esa akɛ wɔka wɔkwɛ lɛ, mináa ekãa waa akɛ mikɛ gbɛtsɔɔmɔi lɛ aaatsu nii. Ehaa shiɛmɔ nitsumɔ lɛ bafeɔ miishɛɛ waa!” Beni ekɛ otsii babaoo etsu gbɛtsɔɔmɔ ni tsɔɔ akɛ abɔ mɔdɛŋ ni aje Biblia mli nikasemɔ shishi yɛ klɛŋklɛŋ saramɔ lɛ mli lɛ, ekɛ gbekɛ yoo ko ni sɔleɔ koni ená yelikɛbuamɔ lɛ je nikasemɔ shishi yɛ klɛŋklɛŋ saramɔ lɛ mli.

¹¹ Kɛ onu wiemɔ ko ni Biblia mli ŋaawoo ní tsɔɔ nibii ni esa akɛ ohala mli fata he lɛ, ani onuɔ he akɛ Yehowa kɛ bo miiwie tɛ̃ɛ? Nyɛmi nuu ko nu he nakai. Ekɛɛ akɛ: “Yɛ kpee lɛ eko shishi nyɛsɛɛ nɛɛ lɛ, nyɛmi nuu ko ha wiemɔ ni tsɔɔ hiɛtserɛjiemɔ nifeemɔi srɔtoi ni hi kɛha Kristofoi kɛ emli nɔ ni ehiii. No mli lɛ nɔ ni misumɔɔ kwɛmɔ ji atswɛrɛnɔmɔ (boxing) ni ajieɔ yɛ tɛlivishiŋ nɔ lɛ. Shi beni agbe nakai kpee lɛ naa lɛ, mimu sane naa akɛ, nɛkɛ kpɔiaŋgbɔlemɔ nɛɛ bajeɔ hiɛtserɛjiemɔ ni esaaa kɛhaaa Kristofonyo lɛ shishi. No hewɔ lɛ mikpá kwɛmɔ.” Hɛɛ, eyɛ mli akɛ nyɛmi nuu nɛɛ náa nɔ ko ni yiwalɛ nifeemɔ yɔɔ mli lɛ he miishɛɛ waa moŋ, shi ekɛ heshibaa kpɛlɛ Yehowa hiɛnyiɛmɔ lɛ nɔ.—Lala 11:5.

¹² Maŋshiɛmɔ lɛ, Buu-Mɔɔ Nikasemɔ lɛ, kɛ Asafo Woloŋ Nikasemɔ Lɛ: Maŋshiɛmɔi ni wɔboɔ toi daa otsi lɛ wieɔ Biblia mli saji srɔtoi babaoo he. Mɛni onáa kɛjɛɔ wiemɔi nɛɛ amli? Wu Kristofonyo ko wie sɛɛnamɔi ni enine eshɛ nɔ kɛjɛ mli lɛ he akɛ: “Maŋshiɛmɔ ko ni aha lɛ wie mumɔ lɛ yibii lɛ fɛɛ eko he faŋŋ. Wielɔ lɛ wie yɛ ehe akɛ, bɔni afee ni ewo nɛkɛ yibii nɛɛ, ebaasumɔ ni ehala su pɔtɛɛ ko ni ekɛ otsi kome atsu he nii. Beni otsi lɛ ba naagbee lɛ, esusu bɔ ni etee nɔ eha yɛ nakai yibii lɛ woo mli yɛ edaa gbi nifeemɔi amli lɛ he. Kɛkɛ ni etsu su kroko he nii enɔ otsi lɛ. Miná susumɔ ni tamɔ nɛkɛ he miishɛɛ, ni mi hu mibɔi nakai feemɔ.” Kwɛ bɔ ni akɛ nɔ ni akase lɛ tsu nii jogbaŋŋ aha!

¹³ Buu-Mɔɔ Nikasemɔ lɛ tsɔɔ wɔ nii koni wɔkɛ Biblia mli shishitoo mlai atsu nii yɛ shihilɛi srɔtoi babaoo mli. Enɛ yeɔ ebuaa koni wɔya nɔ wɔhiɛ jwɛŋmɔ kɛ tsuii ni yɔɔ kpoo mli yɛ shihilɛ mli yeyeeyefeemɔi fɛɛ sɛɛ. Buu-Mɔɔ Nikasemɔ lɛ haa wɔleɔ anɔkwale ni yaa hiɛ fiofio lɛ mli saji ni yɔɔ ebe naa lɛ hu. Ákɛ nɔkwɛmɔnɔ lɛ, ani wɔnáko May 1, 1999 Buu-Mɔɔ mli saji akasemɔ lɛ he sɛɛ, nɔ ni hiɛ yitsei ni ji: “Ja Nii Nɛɛ Fɛɛ Eba Mli Dã,” “Mɔ ni Kaneɔ lɛ, Hã ni Eyoo Sɛɛ,” kɛ “Ohiɛ Ahi Ohe Nɔ ni Ofee Ekãa!” Te nikasemɔi nɛɛ sa bo diɛŋtsɛ ohe eha tɛŋŋ? Ani okɛ onifeemɔi tsɔɔ akɛ onáa Yesu kɔkɔbɔɔ ni ekɛhaa yɛ wɔsɛɛ be he lɛ he miishɛɛ? Ani oosaa ohe kɛha kaai ni kã wɔhiɛ lɛ beni wɔnaa “amaŋfɔ̃ nihii nii lɛ ní . . . ema hé krɔŋkrɔŋ lɛ”? (Mat. 24:15-22) Ani otii ni okɛmamɔ ohiɛ kɛ oshihilɛ gbɛ lɛ tsɔɔ faŋŋ akɛ, jeee heloonaa nibii anaabuamɔ ji nɔ ni he hiaa bo fe fɛɛ, shi moŋ Yehowa gbɛi lɛ hetsemɔ lɛ? Kɛ́ wɔtee Buu-Mɔɔ Nikasemɔ lɛ shishi lɛ, ani wɔkaseee bɔ ni wɔɔfee wɔná he sɛɛ bianɛ?

¹⁴ Susumɔ nibii babaoo ni wɔkaseɔ yɛ Asafo Woloŋ Nikasemɔ lɛ shishi daa otsi lɛ he okwɛ. Amrɔ nɛɛ wɔmiikase Biblia wolo ni ji Daniel lɛ. Ani wɔnako akɛ wɔhemɔkɛyeli yaa hiɛ daa otsi yɛ be mli ni wɔkɛ nyɔji ejwɛ ekase nakai Biblia mli wolo lɛ? Taakɛ Yehowa gbalɔ Daniel ni esumɔɔ lɛ lɛ ji lɛ, wɔhaa wɔhemɔkɛyeli lɛ mli waa koni wɔnyɛ wɔto wɔtsui shi.

¹⁵ Yehowa Tsɔɔ Wɔ Nii Koni Wɔhi Shi yɛ Miishɛɛ Mli: Kɛ wɔbo Nyɔŋmɔ kitãi atoi lɛ, ehaaa wɔye awerɛho pii. Kɛfata he lɛ, wɔnáa shihilɛ ni miishɛɛ yɔɔ mli lɛ mli ŋɔɔmɔ. Kɛ wɔnyiɛɔ Yehowa hiɛnyiɛmɔ sɛɛ lɛ, wɔbafeɔ mɛi ni kɛ lɛ tsuɔ enitsumɔ lɛ, jeee nikwɛlɔi kɛkɛ. Ni mɛi ni tsuɔ Nyɔŋmɔ nitsumɔ lɛ ji gbɔmɛi ni yɔɔ miishɛɛ.—1 Kor. 3:9; Yak. 1:25.

¹⁶ Susumɔ bɔ ni ooofee ni okɛ saji ni onuɔ yɛ asafoŋ kpeei ashishi lɛ baatsu nii jogbaŋŋ oha lɛ he okwɛ. (Yoh. 13:17) Okɛ miishɛɛ asɔmɔ Nyɔŋmɔ kɛ otsui fɛɛ. Omiishɛɛ lɛ baafá kɛteke nɔ. Oshihilɛ baafee nɔ ni hi jogbaŋŋ, ní shishinumɔ babaoo yɔɔ mli. Hɛɛ, ehe baaba sɛɛnamɔ kɛha bo.