Aprann wè kon Jéova épi Jézi ka wè

1-2. a) Lanmou-nou ba Jéova lianné épi kisa ? b) Koumanniè Jézi montré i té enmen Jéova épi tout lèspri’y ?

JÉZI èsplitjé an manniè klè sé kisa pli gran koumandman-an, lè i di : « Ou dwé enmen Jéova Bondié’w épi tout tjè’w, épi tout nanm-ou, épi tout fòs-ou é épi tout lèspri’w » (Lik 10:27). Kidonk, nou enmen Jéova épi tousa nou ni é tousa nou yé, kivédi, lanvi-nou, santiman-nou, épi lafòs-nou. Men lanmou-nou ba Jéova lianné osi épi sa ki an lèspri-nou, sa lé di manniè nou ka wè an bagay. Sa vré, nou pé ké jenmen rivé konprann toutafètman sa ki an fondòk lèspri Jéova. Men nou pé rivé konprann li plimié lè nou ka étidié « pansé Kris-la ». Pas Jézi bien konnèt sa ki an lèspri Papa’y é i ka wè tout bagay menm manniè ki Papa’y (1 Kor. 2:16).

² Jézi té enmen Jéova épi tout lèspri’y. I té sav sa i té ka atann di’y é i té bien désidé soumèt kòy a volonté Papa’y, menm si sa té ké pòté soufwans ba’y. Prèmié òbjèktif lavi’y, sé té fè volonté Papa’y, é i pa kité ayen détounen lèspri’y.

3. Kisa lègzanp Jézi aprann Piè, é kisa Piè li menm ankourajé sé krétjen-an fè ? (1 Piè 4:1).

³ Piè épi sé lézòt apòt-la té ni privilèj pasé tan épi Jézi, kifè, yo aprann konnèt manniè Jézi té ka wè. Adan prèmié lèt-la Bondié enspiré’y, Piè té ankourajé sé krétjen-an ni menm manniè wè ki Kris-la (li 1 Piè 4:1). Kidonk, si sé krétjen-an ni menm manniè wè ki Jézi, yo ké pé goumen kont mové labitid-yo épi kont monn Satan-an (2 Kor. 10:3-5 ; Éfé. 6:12).

4. Di kisa nou ké palé adan awtik-tala ?

⁴ Adan awtik-tala, nou ké analizé manniè Jézi ka pansé, é nou ké gadé ki manniè nou pé imité’y. Gras a lègzanp-li, nou ké aprann 1) koumanniè nou pé rivé wè kon Jéova ka wè, kifè nou tout ké wè menm manniè-a, 2) koumanniè travay limilité-nou é 3) koumanniè nou pé montré nou sé dé moun ki ni plis bon sans, dé moun ki ka apiyé asou Jéova adan lapriyè.

APRANN WÈ KON JÉOVA KA WÈ

5. Palé di an sitiyasion éti Piè pa té ka wè bagay-la kon Jéova té ka wè’y la.

⁵ Piè pa toujou wè bagay-la menm manniè ki Jéova. Jézi té èsplitjé sé apòt-la i té pou alé Jérizalèm, sé chèf rilijié a té ké tjenbé’y, fè’y soufè épi yo té ké tjwé’y (Mat. 16:21). Pétèt Piè pa té ka rivé konprann ki Jéova té ké pèwmèt yo tjwé Jézi, li ki té lèspwa Izrayèl é Mési-a ki té pou vini (Mat. 16:16). Kidonk, i pran Jézi apa épi i di’y : « Senyè, poutji ou lé fè kòw ditò. Men non, ayen pé ké rivé’w » (Mat. 16:22). Kon Piè pa té ka wè bagay-la menm manniè ki Jéova, i pa té dakò épi Jézi.

6. Koumanniè Jézi montré i té ka wè menm manniè ki Jéova ?

⁶ Manniè Jézi té ka wè té kolé anlè ta Papa’y ki an sièl-la. I réponn Piè : « Sòti douvan mwen, Satan ! Ou sé an bwa-koré ki lé fè mwen tonbé, pas ou ka wè bagay-la kon lézòm ka wè, men sé pa konsa Bondié ka wè » (Mat. 16:23). Pou vré, Jézi té sav ki fòk i té fè tousa Papa’y ka mandé’y. Asiré, Piè té ni bon lentansion, men Jézi rijété konsèy-li. Sa pou sèvi nou lison. Adan sitiyasion-tala, Piè konprann poutji sa enpòwtan wè bagay-la kon Jéova ka wè’y la.

7. Kisa ka montré ki Piè té lé kolé manniè i té ka wè anlè ta Jéova ? (gadé zimaj-la).

⁷ Plita, Piè chèché kolé manniè i té ka wè anlè ta Jéova. Moman-an té rivé pou ba moun tout nasion laposibilité antré adan pèp Bondié-a. Sé pou sa yo ba Piè mision préché ba Kòwnèy. I té adan sé prèmié krétjen-an ki pa té Juif. Kon sé Juif-la pa té lé djè ni afè épi moun sé nasion-an, sa pa étonan ki Piè té ni bizwen yo endé’y pou mision-tala. Men lè i bien konprann manniè wè Bondié asou kèsion-tala, i chanjé pwòp manniè wè’y. É ‘lè yo vini chèché’y’, ‘i vini lamenm’ (Akt 10:28, 29). I préché ba Kòwnèy épi fanmiy-li, é yo tout pran batenm (Akt 10:21-23, 34, 35, 44-48).

8. Koumanniè nou pé kolé asou manniè Jéova ka wè ? (1 Piè 3:8).

⁸ Yonn-dé lanné plita, Piè ankourajé sé krétjen-an rété « ini adan menm manniè wè a » (li 1 Piè 3:8). Nou ké rété ini adan menm manniè wè a épi frè èk sè-nou, si nou ka rété kolé anlè manniè wè Jéova, ki adan Pawòl-li, Labib. Annou pran an ègzanp. Jézi mandé sé disip-li a mété Wayòm-lan an prèmié adan lavi-yo (Mat. 6:33). Pou suiv konsèy-tala, an pwoklamatè adan sanblé-nou pé désidé vini pionié oben sèvi a plen tan an lòt manniè. Pito nou ankourajé’y moli asou bèl lòbjèktif-tala, simié nou palé ba’y an manniè pozitif épi nou ba’y fòs-la.

FÒK OU NI LIMILITÉ

9-10. Ki manniè Jézi montré an limilité èstwòdinè ?

⁹ Lannuit-la avan yo tjwé’y, Jézi ansénié Piè épi sé lézòt apòt-la an bèl lison asou limilité. Pli bonnè jou-tala, i vréyé Piè épi Jan pou préparé sa yo té ké bizwen pou dènié ripa-a i té ké pran épi sé apòt-li a, avan i mò. Asiré, Piè épi Jan dwèt paré an basin épi sèvièt pou sé envité-a lavé pié-yo avan yo manjé. Men ki moun ki té ké ni asé limilité pou lavé pié tout sé moun-lan ki té ké la ?

¹⁰ Jézi pa ézité. I montré i té ni an limilité èstwòdinè. Sé apòt-la rété ababa, lè yo wè i fè an travay éti nòwmalman, sé an sèvitè ka fè’y. I tiré prèmié rad-la ki té anlè’y, i maré ren’y épi an sèvièt, i mété dlo adan an basin é i koumansé lavé pié-yo (Jan 13:4, 5). Sa dwèt mandé’y tan, pas i té pou lavé pié sé 12 apòt-la. É andidan yo, té ni Jida, ki pa té ké tadé trayi’y. Poutan, épi limilité, Jézi fè tout travay-tala. Apré sa, Jézi pran tout ti tan’y pou èsplitjé yo : « Ès zòt konprann sa man fini fè a ? Zòt ka kriyé mwen “Ansénian”, “Senyè”, é zòt ni rézon, pas sé sa man yé. Kidonk, si mwen ki Senyè-a épi Ansénian-an, man lavé pié-zòt, zòt osi, fòk yonn lavé pié lòt » (Jan 13:12-14).

11. Kisa ka montré ki Piè aprann sa ki limilité ? (1 Piè 5:5 ; gadé zimaj-la osi).

¹¹ Piè pa jen bliyé limilité Jézi. Lè Jézi viré an sièl-la, Piè fè an mirak pou djéri an nonm ki té andikapé dépi i wè jou (Akt 1:8, 9 ; 3:2, 6-8). Natirèlman, mirak-tala atiré an foul-moun (Akt 3:11). Men, Piè pa gonflé lèstonmak-li pas yo té ka pòté’y anlè, menm si i té élivé an koté éti, ni an bèl pozision té potalan. Épi limilité, i rifizé yo gloriyé’y lè i fè djérizon-an. I té simié gloriyé Jéova épi Jézi, lè i di : « Sé gras a non [Jézi] épi sé gras a lafwa-nou adan non-tala, ki nonm-tala zòt konnèt é ki douvan zòt vini pli fò » (Akt 3:12-16). Yonn-dé tan plita, Piè ékri ba sé krétjen-an asou lenpòwtans travay limilité-yo. Sa i di ka fè nou sonjé lè Jézi maré ren’y épi an sèvièt pou lavé pié sé apòt-la (li 1 Piè 5:5).

12. Koumanniè, kon Piè, nou pé kontinié travay limilité-nou ?

¹² Nou ké suiv lègzanp Piè si nou ka travay limilité-nou. Pawòl an bouch pa chay. Sé pa pas ou ka di ki ou ni limilité, ki ou ni kalité-tala pou vré. Mo-a Piè sèvi pou palé di « limilité », ka fè nou konprann ki nou ka montré nou ni limilité adan manniè nou ka konsidéré kònou épi manniè nou ka konsidéré lézòt. Nou lé fè bagay ba lézòt pas nou enmen yo é pas nou enmen Jéova, é pa pas nou lé risivwè louwanj. Nou ka montré nou vréman ni limilité si nou ka sèvi Jéova épi frè èk sè-nou adan lajwa, tout manniè nou pé, ki yo wè, ki yo pa wè sa nou ka fè (Mat. 6:1-4).

FÒK OU SÉ AN« MOUN KI NI BON SANS »

13. An « moun ki ni bon sans » sé ki kalté moun ?

¹³ An « moun ki ni bon sansa » sé ki kalté moun ? (1 Piè 4:7). An krétjen ki ni bon sans ka fè tousa i pé pou pran an désizion ki annakò épi manniè Jéova ka wè. I sav ki ayen pa pli enpòwtan adan lavi’y ki lanmitié’y épi Papa’y. I pa ka pansé i sé tjèk moun, é i ka rikonnèt i pa sav tout bagay. I ka montré i ka fè Jéova konfians lè i ka prédié souvan épi limilité.

14. Adan ki sitiyasion Piè pa mété konfians-li an Jéova ?

¹⁴ Lannuit-la avan lanmò’y, Jézi di sé disip-li a : « Palakòz sa ki ké rivé mwen, zòt tout kèy tonbé oswè-a. » Piè bat lèstonmak-li épi i di : « Menmsi tout sé lézòt la tonbé akòz di sa ki kèy rivé’w, mwen, janmen man pé ké tonbé ! » Men plita, menm lannuit-tala, Jézi ba yonn-dé disip an konsèy : « Rété véyatif épi pa sispann prédié » (Mat. 26:31, 33, 41). Si Piè té suiv konsèy Jézi-a, i té ké ni asé kouraj pou di i sé an disip Jézi. Malérèzman, i ladjé Mèt-li, é i rigrété sa anpil (Mat. 26:69-75).

15. Dènié lannuit-la i pasé asou latè, ki manniè Jézi montré i té ni bon sans ?

¹⁵ Jézi, li menm, ladjé tout bagay an lanmen Jéova. I prédié pliziè fwa lannuit lanmò’y, menm si i té pawfé. Sa ba’y kouraj pou fè volonté Jéova (Mat. 26:39, 42, 44 ; Jan 18:4, 5). Asiréman, Piè pa janmen bliyé i wè Jézi prédié pliziè fwa dènié lannuit-la i pasé asou latè.

16. Ki manniè piti a piti, Piè montré i vini an moun ki ni bon sans ? (1 Piè 4:7).

¹⁶ Piti a piti, Piè aprann apiyé ankò plis anlè Jéova épi priyé pli souvan. Apré Jézi résisité, i fè Piè épi sé lézòt apòt-la an pwonmès. I pwonmèt, yo té ké risivwè lèspri sen pou endé yo préché bon nouvèl-la. Men i mandé yo tou, rété Jérizalèm épi atann i ba yo lèspri sen an (Lik 24:49 ; Akt 1:4, 5). Ki manniè Piè sèvi tan-tala bon manniè-a ? Li épi sé lézòt krétjen-an « prédié san rété » (Akt 1:13, 14). Plita, adan prèmié lèt-li a, i ankourajé sé krétjen-an vini dé moun ki ni bon sans é ki ka prédié Jéova épi konfians (li 1 Piè 4:7). I té aprann apiyé asou Bondié’y la, é i té vini an poto-mitan adan lasanblé-a (Gal. 2:9).

17. Kisa fòk nou fè, kisiswa kapasité-nou ? (gadé zimaj-la osi).

¹⁷ Pou nou aji épi bon sans, fòk nou prédié Jéova souvan. Fòk nou bien mété an tèt-nou ki nou bizwen prédié, kisiswa kapasité-nou. Kidonk, annou mandé Jéova dirèksion’y, èspésialman lè nou ni dé gwo désizion pou pran. É fòk nou asiré, sé li ki sav sa ki méyè ba nou.

18. Koumanniè nou pé kolé asou manniè wè Jéova ?

¹⁸ Nou vréman kontan, pas Jéova kréyé nou an manniè pou nou pé sa imité kalité’y ! (Jén. 1:26). Asiré, sé pa toulong nou pé wè bagay-la menm manniè ki’y (Iza. 55:9). Men, kon Piè, nou pé rivé konprann plimié manniè i ka wè. Alò, fòk nou kontinié aprann wè menm manniè Jéova ka wè, fòk nou toujou ni limilité épi fòk nou toujou fè éfò pou vini dé moun ki ni bon sans.