Endé sé étidian Labib-la pran désizion sèvi Jéova

1-2. a) Poutji yonn-dé étidian Labib ka tjèlèkèté pou sèvi Jéova ? b) Kisa nou kèy wè adan awtik-tala ?

ÈS OU fè dèyè avan ou vini Témwen Jéova ? Pétèt ou té pè kolèg-ou, zanmi’w ouben fanmi’w faché kont ou lè’w té ké vini Témwen Jéova. Ouben ou té ka pansé sa té ké two rèd ba’w obéyi lwa Bondié. Si sa rivé’w, ou pé konprann sé étidian Labib-la ki ka tjèlèkèté pou désidé sèvi Jéova.

² Jézi té sav ki sé kalté bwa-koré tala té pé anpéché an moun sèvi Jéova (Mat. 13:20-22). Men i pa ladjé sa ki té pè suiv li. Okontrè, i endé yo 1) konprann sa ki té ka anpéché yo sèvi Jéova, 2) enmen Jéova plis, 3) mété Jéova an prèmié adan lavi-yo épi 4) sav sa yo té pou fè lè yo té kèy jwenn lopozision. Adan awtik-tala, nou ké wè koumanniè nou pé suiv lègzanp Jézi, lè nou ka ansénié épi liv-la Viv an bèl lavi pou toujou ! Épi koumanniè nou pé endé sé étidian-an pran désizion sèvi Jéova.

ENDÉ ÉTIDIAN’W RIVÉ WÈ SA KA ANPÉCHÉ’Y PWOGRÉSÉ

3. Poutji sa té difisil ba Nikodèm vini disip Jézi ?

³ Nikodèm, sé té an chèf ki té ni an gwo pozision kay sé Juif-la. Men i té ni an bwa-koré ki té ka anpéché’y vini disip Jézi. Menmsi sa té ka fè sèlman 6 mwa Jézi té ka préché, Nikodèm té ja konprann ki Jézi sé té Mési-a (Jan 3:1, 2). Men davwè i « té pè sé Juif-la », i té simié vini wè Jézi an mitan lannuit (Jan 7:13 ; 12:42). Pétèt i té pè pèd bèl pozision-an i té ni, épi richès-li, si i té ka vini disip Jézia.

4. Koumanniè Jézi endé Nikodèm konprann sa Jéova té lé i fè ?

⁴ Nikodèm té konnèt Lalwa Moyiz, men i té bizwen yo endé’y konprann volonté Jéova. Kisa Jézi fè pou endé’y ? Jézi té paré ba Nikodèm tout tan-an i té bizwen. Sé pou sa, i asèpté risivwè’y menmsi sé té lannuit. É i èsplitjé’y an manniè klè, sa i té pou fè pou vini disip-li : ripanti kòy pou péché i fè, fè kòy batizé adan dlo, épi montré lafwa an li (Jan 3:5, 14-21).

5. Koumanniè nou pé endé an étidian rivé wè sa ka anpéché’y pwogrésé ?

⁵ Menmsi an étidian bien konnèt sé vérité Labib-la, i pé bizwen nou endé’y wè kisa ka anpéché’y pwogrésé. Pa ègzanp, sé pétèt travay-li ka pran tout tan’y, ouben pétèt fanmiy-li pa lé i vini Témwen Jéova. Alò kon Jézi, fòk ou paré pasé tan épi étidian’w. Pa ègzanp, ou pé envité’y fè an ti sòti, épi diskité épi’y pou i ouvè tjè’y asou difikilté i ka jwenn. Apré, endé’y wè ki chanjman i pou fè. Épi fè’y konprann ki chanjman i ka fè, sé pou fè Jéova plézi, é pa pou fè’w plézi.

6. Koumanniè ou pé endé étidian’w touvé kouraj aplitjé sa i ka aprann ? (1 Korentjen 16:13).

⁶ Lè an étidian Labib asiré ki Bondié kèy endé’y fè sa ki bien, i ké ni asé fòs pou aplitjé sa i ka aprann (li 1 Korentjen 16:13). Avrédi, ou tibren kon an pwofésè lékòl. Viré-sonjé lè’w té anlè ban lékòl. Ki modèl pwofésè ou té enmen plis ? Ou dwèt ka sonjé an pwofésè ki té ni anpil pasians, épi ki endé’w ni konfians an wou. An ansénian Labib ki filé ka fè menm bagay-la. I pé ké ansénié étidian’y lan sèlman sa Bondié lé i fè. Men i ka ba’y lasirans i ké rivé fè chanjman an lavi’y, pas Bondié kèy endé’y. Koumanniè ou pé vini an bon ansénian konsa ?

ENDÉ ÉTIDIAN’W ENMEN JÉOVA PLIS

7. Koumanniè Jézi endé sé moun-lan ki té ka kouté’y enmen Jéova ankò plis ?

⁷ Jézi té sav, sé lanmou-yo ba Bondié, ki té kèy fè sé disip-la fè volonté’y. Sé pou sa, souvan, i té ka ansénié yo vérité ki té ka fè lanmou-yo ba Papa-yo ki an sièl-la vini pli fò. Pa ègzanp, i konparé Jéova épi an papa ka ba yich-li yenki bon bagay (Mat. 7:9-11). Pami sa ki té ka kouté’y, té ni yonn-dé ki pa risivwè lanmou papa-yo. Imajinen manniè sa brennen tjè-yo, lè Jézi rakonté yo listwa an papa ki té enmen yich-li anpil. Papa-a asèpté yich-li viré kay-li, menmsi i té fè an patjé mové bagay ! Jézi endé sé moun-tala wè manniè Jéova enmen yo anpil épi i lé endé yo (Lik 15:20-24).

8. Ki manniè ou pé endé étidian’w enmen Jéova ankò plis ?

⁸ Lè’w ka palé souvan di bèl kalité Jéova ba an étidian, wou osi ou pé endé’y rann lanmou’y ba Jéova pli fò. Pandan chak lison, endé étidian’w fè liannaj-la ant sa i ka aprann épi manniè Jéova enmen nou. Pa ègzanp, lè zòt ka palé di laranson, èsplitjé’y poutji sa ka konsèné’y dirèktiman (Wom. 5:8 ; 1 Jan 4:10). Lè an étidian ka médité anlè wotè lanmou Jéova ni ba’y, sa pé endé’y enmen Jéova ankò plis (Gal. 2:20).

9. Kisa ki endé Michael fè chanjman adan lavi’y ?

⁹ Annou palé di Michael, an moun Lendonézi. I étidié Labib lè i té pli jenn men i pa té pran batenm. Lè i trapé dizuitan, i pati pou fè chofè kanmion adan an lòt péyi. Plita, i viré Lendonézi pou i mayé. Men ankò an fwa, i kité péyi’y san fanmiy-li pou ay travay. Madanm-li épi fi’y li mété kòyo ka étidié Labib, épi yo pwogrésé. Apré lanmò manman’y, i désidé viré Lendonézi pou otjipé di papa’y, é i asèpté étidié Labib osi. Ribrik-la « Annou pli lwen » adan lison 27 liv-la Viv an bèl lavi pou toujou ! brennen tjè’y anpil. Dlo sòti an zié’y, lè i konprann manniè sa soukwé épi fann tjè Jéova lè i wè yich-li a soufè. Lè Michael konprann wotè lanmou-a Jézi ni ba’y, i fè chanjman adan lavi’y épi i pran batenm balan i té ni rikonésans.

ENDÉ ÉTIDIAN’W BA JÉOVA PRÈMIÉ PLAS-LA ADAN LAVI’Y

10. Ki manniè Jézi endé sé prèmié disip-li a fè chanjman adan lavi-yo pou sèvi Jéova plis ? (Lik 5:5-11 ; gadé zimaj-la osi).

¹⁰ Sé prèmié disip Jézi-a rikonnèt Mési-a lamenm. Men yo té bizwen an pal pou mété Jéova an prèmié adan lavi-yo. Piè épi André té ja disip Jézi dépi yonn-dé tan, lè i mandé yo suiv li a plen tan (Mat. 4:18, 19). Yo té ka travay konm maren-péchè épi Jak èk Jan, é biznès-yo té ka maché fò (Mak 1:16-20). Men Piè épi André arété travay-yo pou suiv Jézi a plen tan. Lè yo pran désizion-tala, asiré yo pran dispozision pou toujou otjipé di fanmi-yo, toupandan yo té ka suiv Jézi. Poutji yo té paré ladjé an biznès ki té ka maché fò, pou préché a plen tan ? Pas jou-tala, Jézi fè an mirak ki montré yo ki Jéova té kapab ba yo sa yo té ni bizwen, si yo té ka ba’y prèmié plas-la adan lavi-yo (li Lik 5:5-11).

11. Koumanniè lè nou ka palé épi étidian-nou di sa nou viv, sa pé rann lafwa-yo pli fò ?

¹¹ Nou pé pa fè mirak kon Jézi. Men nou pé palé épi étidian-nou di sa nou viv ouben sa dòt moun viv. Konsa, i ké wè Jéova ka soutienn sé moun-lan ki ka ba’y prèmié plas-la adan lavi-yo. Pa ègzanp, koumanniè Jéova soutienn ou lè’w koumansé vini réyinion ? Ès ou té pou alé wè patwon’w, pou èsplitjé’y poutji ou té bizwen kité travay-la pli bonnè pou alé réyinion ? Rakonté étidian’w lan lèspérians-ou. Èsplitjé’y manniè sa rann lafwa’w pli fò, lè ou wè Jéova endé’w pas ou ba’y prèmié plas-la adan lavi’w.

12. a) Poutji fòk nou envité diféran frè é sè adan an létid Labib nou ka fè ? b) Kisa ou pé sèvi osi pou endé étidian-an mété Jéova an prèmié ? Ba an ègzanp.

¹² Sé an bon bagay osi ba étidian’w lan, lè dòt frè é sè ka rakonté’y sa yo fè adan lavi-yo pou ba Jéova prèmié plas-la. Alò, envité frè é sè ki viv dé bagay diféran adan létid-li. Mandé yo rakonté koumanniè yo konnèt lavérité, é sa yo fè pou mété Jéova an prèmié. Anplis, adan liv-la Viv an bèl lavi pou toujou !, pran tan gadé épi étidian’w lan sé vidéwo-a ki adan ribrik-la « Annou pli lwen » épi lè sa nésésè, sé tala ki adan ribrik-la « Tibren plis ankò ». Pa ègzanp, lè zòt ka étidié lison 37-la, épi zòt ka gadé vidéwo-a Jéova kèy ba nou tousa nou bizwen, diskité épi étidian-an di sa ki pé endé’y mété Jéova an prèmié adan lavi’y.

PRÉPARÉ ÉTIDIAN’W POU LÈ I KÈY JWENN LOPOZISION

13. Koumanniè Jézi préparé disip-li pou lè yo té ké jwenn lopozision ?

¹³ Pliziè fwa, Jézi di sé disip-li a yo té ké jwenn lopozision, é menm moun an fanmi-yo té ké pèsékité yo (Mat. 5:11 ; 10:22, 36). Titak tan avan i mò, i avèti disip-li ki moun sé pé tjwé yo, pas yo té ka sèvi Jéova (Mat. 24:9 ; Jan 15:20 ; 16:2). Sé pou sa i di yo pran prékosion lè yo té ké préché. Pa ègzanp, pou yo té pé kontinié préché, i di yo pa fè kankan épi moun ki té ké kont yo, épi pran prékosion adan tousa yo té ké di épi fè.

14. Koumanniè nou pé paré étidian-nou pou lè i ké jwenn lopozision ? (2 Timoté 3:12).

¹⁴ Kon Jézi, nou pé èsplitjé étidian-nou kisa kolèg-li, zanmi’y oben fanmiy-li pé di oben fè, pas i ka étidié Labib (li 2 Timoté 3:12). Pétèt yonn-dé kolèg ké mété’y alafèt pas i fè chanjman adan lavi’y. Épi pétèt zanmi’y, é menm moun fanmiy-li, pé ké dakò épi sa i ka aprann adan Labib. Sé an bon bagay palé di lopozision i ké jwenn, gran bonnè. Konsa, étidian-an pé ké soté lè sa ké rivé, é i ké sav sa pou di épi sa pou fè a moman-tala.

15. Kisa ké endé an étidian Labib bien réaji lè i ka sibi lopozision fanmiy-li ?

¹⁵ Si étidian’w lan ka jwenn lopozision adan fanmiy-li, endé’y réfléchi asou rézon ki fè yo ka réaji konsa. Pétèt yo ka pansé yo jwé an tèt-li. Ouben pétèt fanmiy-li ka pansé ki Témwen Jéova sé pa dé bon moun. Menm Jézi sibi lopozision adan fanmiy-li (Mak 3:21 ; Jan 7:5). Ankourajé étidian’w lan rété pasian épi palé jantiman ba tout moun, menm moun fanmiy-li.

16. Ki manniè nou pé aprann étidian-nou palé di kwayans-li an manniè ki rézonnab é san fwasé pèsonn ?

¹⁶ An moun adan fanmiy étidian’w lan pé anvi sav plis anlè Labib. Men sa té ké bon i pa éséyé èsplitjé’y twòp bagay an menm tan. Sinon, i pé néyé’y anba twòp enfòwmasion, é apré, pétèt moun-tala pa kèy lé tann ayen ankò. Kidonk, ankourajé étidian’w palé di kwayans-li an manniè ki ké ba sé moun-lan anvi viré palé épi’y (Kol. 4:6). Pa ègzanp, i pé envité fanmiy-li alé anlè sit-nou an, jw.org. Konsa, sa ké pèwmèt yo aprann plis asou sé Témwen Jéova-a, kon yo lé, épi lè yo lé.

17. Koumanniè ou pé endé étidian’w réponn sé moun-lan ki ni préjijé anlè Témwen Jéova ? (gadé zimaj-la osi).

¹⁷ Ou pé sèvi ribrik-la « Kèsion ka rivini asou Témwen Jéova » anlè jw.org, pou endé étidian’w préparé yonn-dé répons ki senp asou kèsion fanmiy-li ouben kolèg-li pé pozé’y (2 Tim. 2:24, 25). Alafen chak lison liv-la Viv an bèl lavi pou toujou !, ègzaminé sé ribrik-la « Ni moun ka di » ouben « An moun sé pé mandé’w ». Ankourajé étidian’w lan réponn kèsion sé ribrik-tala épi mo ki ta’y. Pa pè ba’y yonn-dé konsèy, si ou ka wè i pé réponn an méyè manniè. Afòs antréné kòy, sa ké pèwmèt li palé di kwayans-li épi plis lasirans.

18. Ki manniè ou pé ankourajé étidian’w pou i pé sa koumansé préché épi lasanblé-a ? (Matié 10:27).

¹⁸ Jézi mandé disip-li pwoklamé bon nouvèl-la (li Matié 10:27). Lè an étidian ka koumansé préché kay an kay, i ka wè manniè Jéova ka endé’y, é i ka aprann fè’y konfians ankò plis. Ki manniè ou pé endé étidian’w lan fiksé kòy lòbjèktif-la di koumansé préché ? Lè an aktivité prédikasion èspésial ka vini, ankourajé’y katjilé asou sa i pou fè pou vini pwoklamatè. Èsplitjé’y poutji anlo pwoklamatè touvé sa té pli fasil koumansé préché pandan sé aktivité èspésial tala. I ké pwofité osi di an bèl fòwmasion, si i vini adan sé réyinion lasimenn-lan. Adan sé réyinion-tala, i ké aprann palé douvan moun, épi palé di kwayans-li épi lasirans. Kidonk, ankourajé’y osi fiksé kòy lòbjèktif prézanté sijé adan sé réyinion-tala.

MONTRÉ ÉTIDIAN’W OU KA FÈ’Y KONFIANS

19. Ki manniè Jézi montré disip-li i té ka fè yo konfians, é ki manniè nou pé imité’y ?

¹⁹ Avan Jézi mò épi monté an sièl, i pwonmèt disip-li ki an jou, yo té ké viré touvé kòyo ansanm. Yo pa konprann Jézi té ka di yo, ki yo té ké monté an sièl. Menmsi yo pa té ka konprann tout bagay, Jézi té sav sé disip-la té lé suiv li (Jan 14:1-5, 8). I té sav yo té bizwen tan pou yo konprann yonn-dé vérité, kontèl lèspérans viv an sièl (Jan 16:12). Nou tou, fòk nou montré étidian-an nou asiré i lé fè Jéova plézi.

20. Koumanniè an sè Malawi montré i té ka fè étidian’y lan konfians ?

²⁰ Fòk nou toujou ni konfians ki étidian-nou lé fè sa ki bien. Annou wè lègzanp Dinab, an sè Malawi. I koumansé an létid Labib épi an jenn madanm katolik yo ka kriyé Aline, asou liv-la Viv an bèl lavi pou toujou ! Apré yo fini ègzaminé lison 14-la, i mandé madanm-lan sa i té ka pansé di zafè sèvi zimaj pou adoré Bondié. Aline té chouboulé, kifè i réponn : « Man pé chwazi sèvi zimaj si man lé ! » Alò Dina di kòy ki Aline té ké pétèt arété létid-la. Men, épi pasians, Dina kontinié fè létid-la ba Aline, pas i té ni konfians ki an lè, i té ké konprann sa Jéova ka pansé anlè sa. Yonn-dé mwa plita, Dina pozé’y kèsion-tala nou ka touvé adan lison 34-la : « Dépi ou koumansé étidié Labib épi aprann konnèt vré Bondié-a, Jéova, ki bon bagay sa pòté ba’w ? » Kisa Aline réponn ? Dina ka rakonté : « I palé di anlo bon bagay. Pa ègzanp, i di ki sé Témwen Jéova-a pa ka fè ayen Labib ka kondané. » Yonn-dé tan apré, Aline sispann sèvi zidòl, épi i pran batenm.

21. Ki manniè nou pé endé étidian-nou pran désizion sèvi Jéova ?

²¹ Menmsi sé « Bondié ki ka fè lévé », pou étidian-nou pwogrésé, i bizwen nou endé’y (1 Kor. 3:7). Nou ka fè plis ki ansénié’y sa Bondié lé i fè. Nou ka endé’y enmen Jéova épi tout tjè’y. Nou ka endé’y montré Jéova i enmen’y, lè i ka mété’y an prèmié adan lavi’y. É nou ka aprann li mété konfians-li an Jéova lè i ka jwenn lopozision. Anfen, lè nou ka montré étidian-nou nou ka fè’y konfians, sa ka ba’y anvi obéyi Jéova épi désidé sèvi’y.