LÉSON 2

Rété to menm lò to ka palé

2 Corinthiens 2:17

SA TO DIVÈT FÈ : Rété to menm lò to ka palé, épi palé ké to tchò, pou montré ki tèm to chwézi-a vréman enpòrtan pou to, é ki to ka gadé pou ròt-ya.

KOUMAN TO POUVÉ FÈ SA ?

Priyè Jéova épi byen préparé to kò. Doumandé Jéova idé to konsantré to kò asou sa to gen pou di, pasé to konsantré to kò asou to menm. A pou lidé ki pi enpòrtan-yan byen klè annan to tèt. A pou to bay lidé-a ké to pròp palò ; pa yenki répété sa ki marké annan roun dokiman.

Si to gen pou li roun vèrsé annan Labib-a ouben rounòt piblikasyon, anprann byen konnèt lidé-a ki marké pou to lèktir koulé kou dilwil. Si sa to ka li ka roupran sa roun moun ka di, a pou to li l’ ké to tchò, mé pa fè simagri.
Lésé to tchò palé. Réfléchi poukisa moun-yan divèt tandé sa mésaj-a. Konsantré to kò asou yé. Konsa, grasa to konpòrtman, to jès, é to vizaj, moun-yan ké wè ki to fran, to ka palé ké to tchò, épi yé ké pouvé wè ki to sa roun bon moun.

Pa krè ki lò to ka rété to menm, sa lé di ki to pa mélé. Si to ka palé roun fason ki klè é to ka rèspèkté fason yé ka palé lang-a, to ké montré ki sa to ka di gen bokou valò.
A pou to gadé moun-yan. A pou to gadé moun-yan si sa pa ka dérèspèkté yé annan koté to ka viv-a. Lò to ka bay roun diskour, a pou to gadé moun-yan roun apré ròt, pasé to gadé tout moun an menm tan ouben to ka tounen to tèt a drèt a goch.