LÉSON 11

Mété chalò annan sa to ka di

Romains 12:11

SA TO DIVÈT FÈ : Palé ké tout to tchò pou bay moun-yan anvi kouté é pou bay yé anvi fè sa ki fo.

A pou to kontan sa to ké di ké tout to tchò. Toupannan to ka préparé to kò, byen réfléchi asou valò sa to ké di-a. A pou to byen konprann di kisa to ké palé pou to pouvé di l’ ké to tchò.
Sonjé sa-ya ki ké kouté to. Byen réfléchi asou kouman to lèktir ouben to ansèyman ké idé moun-yan. Kalkilé pou wè kouman to ké bay sa ansèyman-an, pou i pouvé gen plis valò pou moun-yan.
A pou i gen lavi annan sa to ka di. Palé ké to tchò. Yé divèt wè sa to ka rousanti ké jès to ka fè épi ké to vizaj.

Panga, pas lò to ka fè menm jès-a toulong, sa pouvé anpéché moun-yan kouté. Fè jès ki k’alé ké sa to ka di. Palé ké chalò, èspésyalman lò to ka anprann moun-yan lidé ki enpòrtan é lò to lé bay yé anvi fè sa ki fo. Pa palé ké tròp chalò toulong, pas moun-yan ké las kouté to.