Diféran fason di sèrvi to vwa

Proverbes 8:4, 7

SA TO DIVÈT FÈ : Bay lidé-ya roun fason ki klè, pou touché tchò moun-yan. Pou to fè sa, chanjé fason to ka palé.

KOUMAN TO POUVÉ FÈ SA ?

• Palé pi fò ouben palé pi bas. Palé pi fò pou apiyé asou lidé ki pi enpòrtan-yan é pou bay moun-yan anvi fè sa ki fo. Fè menm bagaj-a lò to ka li roun jijman annan Labib-a. Palé pi bas, lò to lé bay moun-yan anvi savé sa to ké di apré. Fè menm bagaj-a pou palé di roun sitiasyon ki ka troumanté moun-yan, ouben ki ka fè moun pè.

• Chanjé to vwa. Nou pa ka palé menm fason lò nou tchò kontan ké lò nou gen lanpenn. Menm fason-an, a pou nou chanjé nou vwa lò nou ka palé di bagaj ki ka fè nou lanpenn, ouben bagaj ki ka fè nou tchò kontan. Lò to ka palé di bagaj nou ka méziré yé grandèr, to pouvé lésé to vwa trennen asou déztrwa lèt. Parèkzanp, ké sa mo-a : « gro », to pouvé lésé to vwa trennen asou lèt « o ».

• Palé pi vit ouben palé pi dousman. Palé moso pi vit pou bay roun santiman ki fò. Palé pi dousman pou bay lidé enpòrtan-yan.