Mwakoro Tebwi Ma Itiua
Kaotiotia ni Mwengam bwa Ko Tangira te Atua
1. Tera aron rotakin taiani mare ni kamanenan te reirei n te kairiri man ana Taeka te Atua?
IEHOVA bon te tia Karika te mare, ao iai n ana Taeka, reirei aika a rangi n tamaroa ibukin kairan te utu. A mwaiti aomata aika a a tia ni kanakoraoa tekatekaia kioina ngkai a kamanenai reirei aikai. E raoiroi naba norakia aomata tabeman ake a tekateka n akea te mare ngkoa, bwa a a tia ni kabaea aia mare ae eti i aan te tua. Tabeman a a katoka te kikinano i tinanikun aia mare. Mwaane aika iowawa ake a tataneiai ni bwainikirinia buuia ma natiia, a a rabakau ngkai ni kaotiota te akoi ao te atataiaomata.
2. Tera ae irekereke ma te maiu n utu ni Kristian?
2 A bati bwaai aika a irekereke ma te maiu n utu ni Kristian, n aron ara kaantaninga ni kaineti ma teimatoan te mare, kakororaoan tabera n ara utu, ao arora n itamwaomwao ma kaain ara utu. (I-Ebeto 5:33–6:4) E ngae ngkai ti ataa ana taeka te Baibara ibukin te maiu n utu, ma e kangaanga kamanenana i nanoni maiura. Akea mai buakora ae e kani katotongia te koraki ake a kabuakakaki iroun Iesu ibukina bwa a aki kubara ana tua te Atua. A kairua n taku bwa e a tau naba ngkana a tii kakaonimaki ni waakin aia Aaro. (Mataio 15:4-9) Ti aki kani karekea te mwaan ae aongkoa ti tangira te Atua, ma ti kabwaka ni maiuakina tangirana i buakoia kaain ara utu. Ma ti boni kan maiuakina tangiran te Atua ni koaua, ae “e rereke aron te aomata” iai.—1 Timoteo 5:4; 6:6, BK; 2 Timoteo 3:5.
E na Maanra te Mare?
3. (a) Tera ae riki nakon maare aika mwaiti ngkai, ma tera ae ti riai n ingainga ni kani karaoia? (b) Kabongana am Baibara ni kaekai titiraki aika a mena imwin te barakirabe aei.
3 E a rangi ni kai uruaki ngkai te reitaki n te mare. Taanga tabeman ake a a tia n tekateka i nanon ririki aika bati, a iangoa te buu-raure ao a a manga mare ma temanna riki. E a aikoa naba kakubanako ongoraeakinan te raure irouia taanga n ataei ake a a bon tibwa tia ni mare. N aki ongeia bwa tera ae a karaoia tabeman, ma ti riai ni kani kakukureia Iehova. Ngaia are ti na iangoi titiraki ma kiibu aikai, n noria bwa tera ae e taekinna ana Taeka te Atua ni kaineti ma kateimatoan te mare.
Ngkana e mare te mwaane ma te aine, e na maanra aia tai n uaia n tekateka? (Mareko 10:6-9; I-Rom 7:2, 3)
Tera aan te buu-raure ae tii teuana are e kariaiakaki iai te manga mare i matan te Atua? (Mataio 5:31, 32; 19:3-9)
Tera aron ana namakin Iehova ibukin te buu-raure ae akea kariaiakana man ana Taeka? (Maraki 2:13-16)
Te koaua bwa e boutokoa te raure te Baibara, bwa ngaia katokan te kangaanga n te mare? (1 I-Korinto 7:10-13)
Baikara bwaai aika tao e kona ni kariaiakaki iai te raure? (Taian Areru 11:5; Ruka 4:8; 1 Timoteo 5:8)
4. Bukin tera bwa a teimatoa n nakoraoi maare tabeua?
4 Bukin tera bwa maare tabeua a teimatoa n nakoraoi? E kakawaki tataningaan te tai are a a ikawai raoi iai aomata imwain aia mare, ao e kakawaki naba kakaaean te rao ae e boraoi am iango ao nanom ma ngaia. Ma ae rangi ni kakawaki riki, boni kakaaean te rao ae tangira Iehova, ao e karinea ana Taeka bwa te bwai ae kona ni kabonganaki ibukin kaetan kangaanga. (Taian Areru 119:97, 104; 2 Timoteo 3:16, 17) Te aeka n aomata anne, e aki kona n iangoa te raure ke te buu-raure ngkana a nakobuaka te waaki n ana utu. E na bon aki bukina kabwakan raona bwa ana anga are e kona ni biri nako iai man oin tabena. Ma e na boni kaitarai ana kangaanga ma ni kakaaei aanga ibukin katokaia.
5. (a) Tera irekereken te kakaonimaki iroun Iehova ma te mare? (b) Baikara kakabwaia aika a kona n reke man tauan ana tua Iehova, e ngae ngkana iai te kairiribai mairoun te rao ni mare temanna?
5 E kamatoaa n taku Tatan bwa ngkana ti rawawata, ao ti na kitana kawain Iehova. (Iobi 2:4, 5; Taeka N Rabakau 27:11) Ma angiia Ana Tia Kakoaua Iehova ake a karawawataki ibukina bwa a kairiribai raoia nakon te koaua, a bon aki iangoa kamaunan aia mare. A teimatoa ni kakaonimaki nakon Iehova ao ana tua. (Mataio 5:37) Tabeman ake a a tia n nanomwaaka i aan karawawatakia ngkoa i nanon ririki aika mwaiti irouia raoia aika tiaki taan onimaki, a a kukurei ngkai a a manga raonaki irouia raoia, n uaia ni beku iroun Iehova! (1 Betero 3:1, 2) Kristian ake akea te kani bitaki irouia raoia, ke a kitanaki irouia raoia ibukina bwa a beku ngaiia iroun Iehova, a ataia naba bwa a na boni kakabwaiaki n aroia ni kaotiota tangiran te Atua irouia ni mwengaia.—Taian Areru 55:22; 145:16.
A na Karaoa Tabeia Aomata Nako
6. Ibukin kanakoraoan te mare, tera te babaire ae riai ni karineaki?
6 E koaua bwa e bati riki ae e kainnanoaki ibukin kanakoraoan te mare nakon ae tii te uaia ni maeka. Oin te bwai ae kainnanoaki irouia taanga, boni karinean ana babaire Iehova ibukin te kairiri. Ngkana a karinea, ao e na kanakoraoaki iai te waaki ao te mweeraoi n te utu. Ti wareka ae kangai n te 1 I-Korinto 11:3: “Bon atun te aomata nako Kristo; ao atun te aine te mwane; ao atuni Kristo te Atua.”
7. Tera te aro are e riai ni waakina ana kairiri iai atun te utu?
7 Ko noria bwa tera ae taekinaki moa n te kibu anne? Eng, bon iai Atuia mwaane ni kabane ae a riai n aantaeka irouna, ae taekan Kristo. E nanonaki n aei bwa e riai te buu-te-mwaane ni waakina te kairiri n te aro ae e na katotonga aroaron Iesu. E aantaeka Kristo iroun Iehova, e korakora tangiran te ekaretia irouna, ao e tabeakinna. (1 Timoteo 3:15) “E anga boni Ngaia, i bukina.” E aki kamoamoa Iesu ke ni bangaaomata, ma e “nimamanei ma n nanorinano.” Te koraki ake a mena i aan ana kairiri “a na reke raun [nanoia].” Ngkana e karaoa ae aron aei te buu-te-mwaane n ana utu, e kaotia iai bwa e aantaeka iroun Kristo. Ao ngkanne, e na kunea te buu-te-aine ae te Kristian bwa e manena ao e kaunganano irouna te uaia n ibuobuoki ma buuna ao te aantaeka n ana kairiri.—I-Ebeto 5:25-33; Mataio 11:28, 29, BK; Taeka N Rabakau 31:10, 28.
8. (a) Bukin tera bwa e taraa n aki-nakoraoi te waaki ni Kristian n utu tabeua? (b) Tera ae ti riai ni karaoia ngkana ti a kaaitara ma te aeka ni kangaanga anne?
8 Ma a na bon iai naba kangaanga tabeua. Tao a a kaman rarawa ni kairaki tabeman, ngke aia utu e tuai ni moana kamanenaan ana reirei te Baibara. Te bubutii ma te akoi n te aro ae tatangira e kona n taraa n aki-nakoraoi. Ti ataia bwa te Baibara e taekina ae e riai ni katokaki “te nanobuaka, ma te un, ma te takarua, ma te taetaebuaka.” (I-Ebeto 4:31) Ma tera ae na karaoaki ngkana iai tabeman aika a aki atai riki aanga ibukin katokani kangaanga, irarikin mwakuri akanne? E bon aki katotongia te koraki ake a bwanga ni karekekai ao n taetaebuakaa Iesu, ma e katikui bwaai nakon Tamana. (1 Betero 2:22, 23) Ngaia are ngkana iai kangaanga aika a riki n te utu, kaotiota tangiran te Atua n te aro ae ko tataro nakon Iehova ni butiia bwa e na buokiko, ma tai kakairi n aroaroia kaain te aonnaba.—Taeka N Rabakau 3:5-7.
9. N onean mwin te tiribure, tera ae a kataneiaki iai buu-mwaane aika Kristian bwa a na karaoia?
9 E na aki reke n taai nako te bitaki n te tai ae waekoa, ma e boni kona n ibuobuoki ana reirei te Baibara ngkana e kamanenaki ma te taotaonakinnano ao te umaki. A mwaiti buu-mwaane aika a kunea bwa e moana nakoraoina te mare, ngkana a ataa aron ana kakairi Kristo nakon te ekaretia. E ngae ngkai a aki-kororaoi kaain te ekaretia, ma e bon tangiriia naba Iesu. E karaoa te katoto ae raoiroi nakoia, ao e kabongana te Baibara bwa E na katamaroai riki aroaroia. E bon anga naba maiuna ibukin te ekaretia. (1 Betero 2:21) Ana katoto e kaungaia buu-mwaane ni Kristian aika bati bwa a na karaoa te kairiri ae tamaroa, ao n anga te ibuobuoki ae tatangira, bwa e aonga ni katamaroaki riki iai te utu. Karaoan aio e na uaana riki nakon ae e na reke man te tiribure ke te aki-kakangongoo.
10. (a) Baikara aanga ake e kona ni karawawataia iai kaain ana utu, te buu-te-mwaane ke te buu-te-aine are e taku bwa te Kristian ngaia? (b) Tera ae kona ni kaeta anne?
10 Ma tera ngkana e aki tabe te buu-te-mwaane ma nanoia kaain ana utu, ke e aki bairea karaoan te reirei n te Baibara ma ngaiia, ke waaki tabeua riki? Ke tera ngkana te buu-te-aine e aki uaia n ibuobuoki ao e aki aantaeka n te aro ae katauaki iroun te Atua? Tabeman a karekea te nakoraoi man aroia ni mamaroro ni karinerine n te utu ni kaineti ma aia kangaanga. (Karikani Bwaai 21:10-12; Taeka N Rabakau 15:22) Ma ngkana e aki-nakoraoi mwin te waaki n aron are kaantaningaki, ti kona ngaira n tatabemanira nako ni buoka kanakoraoan te utu, ngkana ti kaotiota uaan te taamnei ae raoiroi mairoun te Atua i nanoni maiura, ao ti akoia kaain ara utu. (I-Karatia 5:22, 23) E na iai te rikirake, tiaki man taningaan te aomata temanna bwa e na karaoa te bwai teuana, ma boni man karaoan tabera, ae kaotiotan tangiran te Atua iroura.—I-Korote 3:18-21.
Aron Karekean Buokam n Am Titiraki
11, 12. Tera ae e a tia ni katauraoia Iehova ibukin buokara ni kanakoraoa ara utu?
11 A bati waaki n reirei ake a kakaaea iai buokaia aomata ni kaineti ma waakin te utu. Ma ti ataia bwa iai reirei aika a rangi n raoiroi, ake a mena n ana Taeka te Atua, ao ti rangi ni kimarimari ibukina bwa e buokira te Atua ni kamanenai reirei aikai rinanon ana botaki i aon te aba. Ko kamanenaa raoi te ibuobuoki anne?—Taian Areru 119:129, 130; Mika 4:2.
12 Irarikin kaakaean bobotakin te ekaretia, ko a tia ni bairei taai tabeua riki ibukin te reirei n te Baibara ma am utu? Kaain utu ake a karaoa anne a kona ni katiteuanaki n aia taromauri. E a katamaroaki riki maiuiia ngkai a kamanenaa ana Taeka te Atua n aia utu.—Te Tua-Kaua 11:18-21.
13. (a) Ngkana iai ara titiraki ni kaineti ma waakin te utu, ti na kai kunea iia te ibuobuoki ae kainnanoaki? (b) Tera ae riai n oti man motinnano ni kabane ake ti karaoi?
13 E na boni bae n iai am titiraki ni kaineti ma waakin te utu. N te katoto, tera aron babairean te utu? Iai bukina ae e na kona ni kabwakaaki iai te ataei ae tuai ni bungiaki? Ngkana e a aki bati ni kan ongora te ataei ni bwaai n taamnei, e riai ni kairoroaki bwa e na ira buakon aia taromauri kaain te utu? Angiin titiraki aikai a a tia ni maroroakinaki ni booki aika a boretiaki irouia Ana Tia Kakoaua Iehova. Reireiniko kabonganan booki aika buoka reiakinan te Baibara ao taian index, ibukin kakaaean rongorongo aika ko kainnanoi. Ngkana akea iroum booki akana a kaotaki n te index, ao tuoa te nne ni boki n te Maneaba n Uea. Ke tao ko kona n nori booki aikai n am kombiuta. Ko kona naba ni maroroakin am titiraki aikai ma mwaane ke aine ni Kristian aika ikawai n te onimaki. Ma tai kariaa tuangakim raoi te bwai ae ko na karaoia. N angiin te tai, bon ngkoe ke tao ngkoe ma buum aika kam riai ni bairea ae na karaoaki. Imwina, karaoa am motinnano ae ko na kaotiko iai bwa ko tangira te Atua, tiaki tii ngkana ko noraki irouia aomata, ma n aroarom naba nakoia kaain am utu.—I-Rom 14:19; I-Ebeto 5:10.
Te Maroro Ibukin te Kauring
• Tera irekereken te kakaonimaki iroun Iehova ma te kakaonimaki nakon raom ni mare?
• Ngkana ti karawawataki ibukin kangaanga aika riki n ara utu, tera ae na buokira bwa ti na karaoa ae kakukurei i matan te Atua?
• E ngae ngkana iai kaain te utu aika aki-kakaonimaki ni karaoi tabeia, ma tera ae ti na karaoia ibukin katamaroan te kangaanga anne?
[Taamnei n iteraniba 155]
E riai ni katotonga aroaron Iesu te buu-te-mwaane ngkana e kairiri
[Taamnei n iteraniba 157]
Te teimatoa n reirei n te Baibara ma kaain te utu e ibuobuoki ni karekea te katiteuanaki