Mwakoro Tebwi Ma Onoua

“Kabatiai Ami I-Tangitangiri”

1. Tera ae e anaa nanoia aomata aika mwaiti aika a tibwa roko n aia botaki Ana Tia Kakoaua Iehova?

NI MOAN rokoia aomata n aia botaki Ana Tia Kakoaua Iehova, a bati mai buakoia ake a anaaki nanoia n te itangitangiri ae kaotiotaki iai. A namakina te itangitangiri ni butimwaeaia, ao n te iraorao ae tamaroa. A nora naba te tangira aei aomata aika kawari ara bwabwaro. E korea taekan ara bwabwaro teuana, temanna te tia kareke rongorongo ibukin te nuutibeeba: ‘Akea te aomata ae rotaki n te manging ao taian drug. Akea te takarua ke te karongoa. Akea te ikekeebuti. Akea te taetaebuaka. Akea te manikangare ae kamwara. Akea ae momoko iai. Akea te ira. Akea ae karenakoi tiin nako aontano n aki akaka. E rangi ni kamimi.’ Bwaai aikai boni kakoauaan te aeka n tangira ae “e aki kakamatauninga, [ao] e aki ukera oini kabaiana.”​—1 I-Korinto 13:​4-8, BK.

2. (a) Imwin tabeua te tai, tera ae e riai n noraki ni kaineti ma kaotiotan ara tangira? (b) Te aeka n tangira raa ae ti riai ni karekea iroura, ae titeboo ma ana tangira Kristo?

² Te tangira n itaritari boni kanikinaeaia Kristian ni koaua. (Ioane 13:35) Ti na rikirake n rabakau ni kaotiota riki te tangira ngkana e rikirake naba tangiran bwaai n taamnei iroura. Te abotoro Bauro e tataro ni bubutii bwa aia tangira raona ni Kristian e na “ririkirake” riki. (I-Biribi 1:9, BK) Te abotoro Ioane e kabwarabwaraa bwa te tangira e riai ni kairira bwa ti na anga boni ngaira. E korea ae kangai: “Ti ata te tangira n aei, ngke [Natin te Atua] E anga maiuna i bukira: ao e riai ba ti na anga maiura i bukiia taari.” (1 Ioane 3:​16; Ioane 15:​12, 13) Ti kona n anga naba maiura ibukia tarira? Tao e aki kainnanoaki karaoan anne n angiin te tai, ma tera arora ni kani buokiia ngkai, e ngae ngkana ti mweebuaka iai ke e aki angaraoi iroura?

3. (a) Tera te anga ae ti kona ni karababa riki iai kaotiotan te tangira iroura? (b) Bukin tera ngkai moan te kakawaki bwa ti na kabatiaa te itangitangiri i marenara?

³ I rarikin ara mwakuri aika kaotiota ara anganano ni kani buokiia aomata, ti riai naba n akoakoia tarira. E kaungaira ni kangai ana Taeka te Atua: “Kam na itangitangiri ma n iakoakoi n ai aroia tari.” (I-Rom 12:​10, BK) Ti bane ni karaoa anne nakoia aomata aika tii tabeman. Ma ti kona naba ni karaoia nakoia aika bati riki? Moan te kakawaki bwa ti na kaanira riki ma raora ni Kristian ngkai e a kan roko tokin te waaki ae ngkai. E kangai te Baibara: “E a kan roko tokini bai ni kabane. . . . I aoni bai ni kabane ao kam na kakaonimaki ni itangitangiri, ba e rabuni bure aika a maiti te tangira.”​—1 Betero 4:​7, 8, BK.

Ngkana Iai Kangaanga Aika Riki

4. (a) Bukin tera bwa iai kangaanga aika a kona n riki i marenaia kaain te ekaretia? (b) Tera te uaa ae raoiroi ae e na reke iroura ngkana ti kamanena ana reirei te Baibara, e ngae ngkana ti aki taneiai iai?

⁴ Kioina ngkai ti aki-kororaoi, ti na bae ni karaoi bwaai tabeua ake a na kamaraka nanoia aomata tabeman, ao tarira naba a kona ni bure nakoira. (1 Ioane 1:8) Tera ae ko riai ni karaoia ngkana e riki anne? Bon iai te kairiri i aon anne n te Baibara, ma are taekinaki iai e kona ni kaokoro ma are a tataneiai ni karaoia, aomata aika aki-kororaoi. (I-Rom 7:​21-​23) E ngae n anne, arora ni kakaonimaki ni kamanena ana reirei te Baibara iai, e na kaotia bwa ti kani kakukureia nanon Iehova. Karaoan anne e na katamaroa riki ara tangira are ti kaotiotia nakoia aomata tabemwaang.

5. Bukin tera bwa ti aki riai n ira taangara ngkana iai ae kamaraka nanora?

⁵ N taai tabetai aomata ake a kamarakaki nanoia a kan ira taangaia i bon irouia. Ma karaoan anne e kakorakora riki te itabarara. Ti riai ni katuka kabooan mwin te buakaka, bwa e a bon nakon te Atua iangoana. (Taeka N Rabakau 24:29; I-Rom 12:​17-​21) Tabeman riki a na rarawa n reitaki ma are bure nakoia. Ma tiaki anne ae ti riai ni karaoia nakoia raora n taromauri, bwa raoiroin ara taromauri, e boto i aon tangiraia tarira iroura. (1 Ioane 4:​20) Mangaia are e korea ae kangai Bauro: “Kam na i taotaon nanomi, ao kam na i kabara buure i roumi, ngkana tao iai iroun temanna ae e kona ni kabuakaka raona iai. Aroni [Iehova] naba, ngke E kabara ami bure, ao ai aromi naba ni kakairi i Rouna.” (I-Korote 3:​13) Ko kona ni karaoa anne?

6. (a) Mwaitira te tai ae ti riai ni kabwara iai ana bure tarira? (b) Ataakin tera, ae e na buokira ngkana iai ae e bure nakoira?

⁶ Ma tera ngkana e a okioki ni bure temanna nakoira, ma e aki kakaraoi buure ake e kona ni kamwawaaki iai man te ekaretia? Te abotoro Betero e taekina ana koaua bwa a kona ni kabwaraki buure aika aki rangi n rawawata aikai, n te mwaiti ae “itiua” te tai. Ma e kangai Iesu: “I aki taku nako im ba tokim itiua; ma tokim itingaun itiua.” E katereterea aron rawawatan ara bure nakon te Atua, ni kabotauaki ma buure ake a kona ni karaoi aomata nakoira. (Mataio 18:​21-​35) A mwaiti ara bure ake ti karaoi nakon te Atua ni katoa bong, ao n tabetai ti aki ataia ae ti a tibanako. Ti kona ni karaoa te mwakuri ni bangaaomata, ke ti kona ni kairua n ara taeka ao n ara iango, ke ti kona ni mwaninga ni karaoa te bwai ae riai. (I-Rom 3:​23) Ma e ngae n anne, e teimatoa te Atua n nanoangaira. (Taian Areru 103:​10-​14; 130:​3, 4) E tangirira bwa ti na bwaina naba te nanoanga i marenara. (Mataio 6:​14, 15; I-Ebeto 4:​1-3) Ao ngkanne, ti na kaotiota te aeka n tangira ae te “aki kani karekekai.”​—1 I-Korinto 13:​4, 5, BK; 1 Betero 3:8, 9.

7. Tera ae ti riai ni karaoia ngkana iai tarira ae un iroura?

⁷ Tao n taai tabetai ti kona n namakina ae tarira temanna e un iroura, e ngae ngkana ti taku bwa akea te kangaanga i marenara. Ti kona n ‘rabuna nako te kangaanga n te tangira,’ n aron are e kaotaki n te 1 Betero 4:8. Ke ti kona ni kawaria ao ni kataia ni karekea te rau i marenara.​—Mataio 5:​23, 24.

8. Tera ae e kona ni karaoaki ngkana raora n onimaki temanna e karaoa te bwai ae ti aki rauaki iai?

⁸ Tao raora n onimaki temanna e kakaraoa te bwai ae ko aki rauaki iai ao tao a aki naba rauaki iai aomata tabeman. Tiaki te koaua bwa e na raoiroi ngkana ko maroro ma ngaia? Tao boni ngaia anne. Ma e na bae naba n nakoraoi ngkana ko bwaina te akoi ni kabwarabwaraa raoi nakoina te kangaanga. Ma ko riai moa n titirakiniko ni kangai: ‘Te koaua bwa e karaoa te bwai ae bobuaka ma ana reirei te Baibara? Ke e aki rau nanou iai ibukina bwa e kaokoro au katei ao reireiau ma ngaia?’ Tarataraiko bwa ko na aki motika taekaia aomata ni kaineti ma kaetieti ake ko otei i bon iroum. (Iakobo 4:​11, 12) E aki tabeitera Iehova ngke e butimwaeia aomata aika kakaokoro nako aroia, ao e taona nanona nakoia i nanon aia tai ni karikirakei tangiran bwaai n taamnei.

9. (a) Antai tabeia tabeakinan buure aika rawawata aika karaoaki n te ekaretia? (b) N ningai te tai ae e na kawaraki iai te tia bure, iroun te aomata are e karaoaki te bure nakoina, ao tera te kaantaninga ae e uaiakinaki iai?

⁹ A riai ni waekoa n tabeakinaki kaain te ekaretia aika a karaoi buure aika rawawata, n aron te wene ni bure. Irouia antai? Irouia unimwaane. (Iakobo 5:​14, 15) Ngkana e bure temanna nakon raona ni kaineti ma tao te waaki ni bitineti ke te taetae ae aki riai, te aomata are e karaoaki te bure nakoina e riai moa ni kawara te tia bure, bwa a na maroro tii ngaiia uoman. (Mataio 18:15) Ngkana e aki kaeta te kangaanga te waaki aei, iai riki mwaneka tabeua aika riai ni waakinaki, aika kaotaki ni Mataio 18:​16, 17. Tangiran tarira arei ao iangoan kamaiuana, e na kairira bwa ti na maroro ma ngaia n te aro ae e na anaaki nanona iai.​—Taeka N Rabakau 16:23.

10. Ngkana iai te kangaanga ae riki, tera ae e na buokira ni bwaina te kaantaninga ae riai iai?

¹⁰ Ngkana iai te kangaanga ae uarereke ke ae bubura ae riki, ti na buokaki ngkana ti kataia n iangoia bwa tera ana kaantaninga Iehova iai. E bon aki kukurei n te bure, ao n taina ae riai, aomata aika kakaraoi buure aika rawawata ao a aki raraoma iai, a na boni kamwawaaki man ana botaki. Ma ti na aki mwaninga bwa ti bane ni karaoi buure aika uarereke, ao ti kainnanoa iai ana taotaonakinnano ao ana nanoanga. Iehova e karaoa te banna ni katoto ae ti na kakairi iai ngkana a bure aomata nakoira, ao ti na katotonga ana tangira ngkana ti bwaina te nanoanga.​—I-Ebeto 5:​1, 2.

Kataia ni ‘Kamwawawaa Riki Nanora’

11. Bukin tera Bauro ngke e kaungai nanoia kaaini Korinto bwa a na ‘kamwawawaa riki’ nanoia?

¹¹ A mwakuri Bauro i nanon namwakaina aika mwaiti, ni kakorakora riki te ekaretia ni kaawan Kuriti ae Korinto. E kakorakoraa ni buokia taari aika mena iai, ao e tangiriia. Ma tabeman mai buakoia a aki akoakoia, ao a kabatiaa kabuakakana. E kaungaiia bwa a na ‘kamwawawaa riki’ nanoia n aroia ni kaotiota aia tangira. (2 I-Korinto 6:​11-​13; 12:15) Ti riai ni bane n iangoia bwa tera aron mwaawan nanora ni kaotiota te tangira nakoia aomata tabemwaang, ao ti na kanga ni karababa riki ara tangira.​—1 Ioane 3:​14.

12. Ti na kanga ni karikirakea riki ara tangira nakoia kaain te ekaretia ni kabane?

¹² Ko kakoaua bwa iai tabeman kaain te ekaretia aika ko aki rangi ni kaan ma ngaiia? Ngkana ti taon nanora nakon taian itabarara aika riki ibukin kaokoron aroia aomata, n aron naba ae ti tangiria bwa a na karaoia nakoira, ao e na kaunga riki ara iraorao ma ngaiia. Ti na tangiriia riki ngkana ti taratarai aroaroia aika a rangi n raoiroi iai, ma ni kaatuua iaiangoaia. Karaoan anne e na karikirakea tangiraia iroura.​—Ruka 6:​32, 33, 36.

13. Ti na kanga ni kona ni kamwawawaa riki nanora ni kaotiota te tangira nakoia kaain ara ekaretia?

¹³ Te koaua bwa iai tian ara konabwai ni buokia aomata tabemwaang. Tao ti aki kona ni kamauria kaain te ekaretia ni kabane ni bobotaki nako. Tao ti aki kona ni kaoia aomata ni kabane ngkana ti kaoia raora tabeman bwa a na amwarake ma ngaira. Ma tao ti kona ni kamwawawaa riki nanora n te aro ae ti kabanea tabeua te miniti ni maroro n ikikina riki ma kaain te ekaretia temanna. Ti kona naba ni boraraoi ma temanna ae ti aki rangi ni kinaa, bwa ti na uaia ni mwakuri ma ngaia n te mwakuri ni minita.

14. Ti na kanga ni kaotiota te tangira ae korakora ngkana ti mena i buakoia raora ni Kristian aika ti tuai ni kinaia ma imwaina?

¹⁴ E bon reke ara tai ni kamwawawaa riki nanora ni kaotiota te tangira, n taiani bwabwaro ni Kristian. Tao ngaa ma ngaa mwaitiia aomata aika a mena iai. Ti aki kona ni maroro ma ngaiia ni kabaneia, ma ti kona ni kaotia n aroarora nakoia bwa ti tabeakinia riki nakon oin mweeraoira. I marenan te reirei, ti kona n tabeakinia aomata ake i rarikira n te aro ae ti karekea ara maroro ma ngaiia. N te tai teuana, kaain te aonnaba ni kabane a nang imwamwaane ao n itaritari, kioina ngkai a a katiteuanaki n taromauria te Atua ae koaua ae Tamaia aomata ni kabane. Ai kakimwareirei ra karekean te iraorao ma aomata ni kabane n te tai anne! Te tangira ae korakora e na kairira iai. Bukin tera bwa ti a aki moana karaoana ma ngkai?

Te Maroro Ibukin te Kauring

• A na kanga ni kaetaki taian itabarara aika a riki i marenaia Kristian, ao bukin tera bwa e na karaoaki anne?

• Ngkana ti rikirake riki n tangiri bwaai n taamnei, tera naba ae riai n noraki ni kaineti ma rikiraken ara tangira?

• Ti na kanga ni karababaa nako riki ara tangira nakoia aomata aika mwaiti, ao tiaki tii raoraora tabeman ake ti kaan riki ma ngaiia?

[Taamnei n iteraniba 148]

E kaotiotaki te itangitangiri ni Kristian n aaro aika mwaiti, n aron are e kona ni karaoaki ni bobotakin te ekaretia