Bwaintangira Aika Kakukureia te Atua

E AKI bati ni kakukurei te karaki aei. E aonikaia aia kaintokanuea I-Iutaia te Uea n aine ae Ataria n te aro ni babakanikawai ao n tiritiri. N ana katautau neiei ae kairua, ao e iangoia bwa a bane n tia n tiringaki taan toka i aon te kaintokanuea, mangaia are e a kaueaa i bon irouna. E ninikoria ni karabaa te nati n uea ae uarereke ae Ioati, te aine ae te nati n uea ae Nei Ieotieba, are e korakora tangiran Iehova ma ana Tua irouna. A karabarabaa te nati n uea aei Ieotieba ma buuna are Ieoiata ae te Ibonga ae Rietata, i nanon te tembora i nanon onoua te ririki.​—2 Uea 11:1-3.

Ngke e a koro itua ana ririki Ioati, e a tauraoi te ibonga ae Rietata ae Ieoiata ni moana ana waaki ni kanakoa te uea n aine are e anaa ueana ma te babakanikawai. E anaa te ataeinimwaane aei man te tabo are a karabaa ngkoa iai ao e a kaueaa kioina ngkai boni ngaia ae riai n uea. E uaakinaki nako te Uea n aine are Ataria nako tinanikun te tembora irouia tautian te bareti ao e tiringaki, ao a a namakina te kukurei ao motikan rawaia iai aomata. Man aia mwakuri Ieoiata ao Nei Ieotieba aei, a a tia ni karaoa iai te ibuobuoki ae moan te kakawaki ibukin manga kaokan te taromauri ae itiaki n te aba ae Iuta. Ma ae kakawaki riki, a buoka kateimatoan te bwaa n uea mairoun Tawita are e na riki mai iai te Mesia.​—2 Uea 11:4-21.

E na anga naba ana bwaintangira ae kakukureia nanon te Atua, te uea are e a tibwa kaueaki. E korakora kainnanoan te onobwai nakon mwaneaban Iehova. Ibukin korakoran nanon Ataria ni kan tautaekana Iuta, e a oti iai bwa e aki tii kakeaa bongan te tembora ma e kimoai naba bwaina. Mangaia are e a kakorakoraa Ioati ni manga katea ao ni kaoka aron te tembora nakon are mai imwaina. E aki baenikai ma e a anga ana kaetieti bwa e na bobotaki te mwane are e kainnanoaki ibukin manga karaoan onobwaian mwaneaban Iehova. E taku: “Te mane ni bane are maneni bwaai aika tabuaki ae uotaki mai nako nanoni maneaban Iehova, ae te mane ae e taneiai ni kamanenaki, ae aia mane aomata nako aika a moti iangoaia nako, ma te mane ni bane ae e reke nanon te aomata temanna nako iai ba e na uotia mai nako nanoni maneaban Iehova, ke a anai ibonga, temanna mairoun raona ao temanna mairoun raona: ao a na manga karaoi uruan nako te maneaba iai, n taabo ni kabane ake e reke uruakina iai.”​—2 Uea 12:4, 5.

A anga aia bwaintangira aomata ma nanoia ni kukurei. Ma, a aki karaoa mwiokoaia ibonga ma nanoia ni kabane n onobwaian te tembora. Mangaia are e a iangoia te uea bwa e nang bon tararuaa te mwakuri ni kabane ao e tua bwa a na karinaki bwaintangira ni kabane i nanon te bwaoki ae e okoro. E katokaa Ieoiata bwa e na mataniwi ao e kangai te rongorongo: “Ao Ieoiata are te ibonga e anaa te ati teaina, ao e uuna te bangabanga ni bonotani matana, ao e kaki i rarikin te baonikarea, n te angaatai ngkana e rin te aba ni maneaban Iehova: ao ibonga ake a kakawakina te mataroa a nnei iai maane ake a uotaki nakoni maneaban Iehova. Ao ngke a noria ba e bati te mane i nanon te ati, ao e aerake ana tia koroboki te uea ma te ibonga are mataniwiia ibonga, ao a nnei i nanoni buua ni kabae ao a tua maitin te mane are reke ni maneaban Iehova. Ao a anga te mane are e tauaki mwin rawawatana nako nanoni baiia ake a bekua te makuri, ake mataniwini maneaban Iehova: ao a kaotinakoi n angania kaamta ma taani katei-auti, ake a karaoa maneaban Iehova, ma taani katei auti atibu ma taan tatai atibu, ao ba booni kaai ma atibu aika tataki ba a na manga karaoaki uruani maneaban Iehova, ao ba boon naba baike a nako i bukin te maneaba ba e na manga karaoaki.”​—2 Uea 12:9-12.

A karaoa aei aomata ma nanoia ni kabane. E a manga okira arona mwaneaban Iehova mangaia are e a manga taromauriaki n te aro ni karinerine. Mangaia are, a bane ni kamanenaki angabwai n te aro ae riai. E tabena karaoan anne te Uea are Ioati!

Ni boong aikai, e tararuai raoi naba angabwai ni kabane ana botaki Iehova, bwa a na kamanenaki n te aro ae riai, ibukin karikirakean taromaurian Iehova. Kristian ni koaua a a tia ni karaoa ae riai ma nanoia ni kabane n aroia naba tibun Iteraera ake rimoa. Tao ko boni mena naba i buakoia te koraki ake a a tia n bwaintangira ibukin kanakoraoan te kan ongora n rongorongon te Tautaeka n Uea n te ririki ni mwakuri ae nako. Ti na nori aanga tabeua ake a a tia ni kamanenaki iai ami bwaintangira.

Karikirakean te Reirei n te Baibara

E tuangia taan rimwina Iesu Kristo bwa a na “kakiritiania botanaomata ni kabaneia.” (Mataio 28:19) A ongeaba Ana tia Kakoaua Iehova nakon ana taeka, mangaia are a katabetabeia ngkai n tataekina ao n reireiia aomata n rongorongon te Baibara, n aaba aika 235 mwaitiia. A boreeti ao n tibwatibwai booki aika kabwarabwaraa te Baibara n taetae aika 413 mwaitiia.

Ni koauana, te bwaintangira ae te kabanea ni kakawaki ae e kona n anga te Kristian ibukin reiakinaia aomata aika mwaiti riki, taekan te Atua ao Ana kaantaninga, bon ana tai. A a tia Ana tia Kakoaua Iehova n anga aia tai ao korakoraia ae mwaiti kurikuri ibukin buokaia raoia. A a tia naba n anga aia bwaintangira te mwane ma te nano n akoi, ao aia bwaintangira aikai ni kabane a kamanenaki ibukin kabutan ataakin aran te Atua ae Iehova ao ana kaantaninga ni katobibia te aonnaba. E bia teimatoa Iehova ni kakabwaiaa te mwakuri ibukin buokaia aomata bwa a na kabatiaa riki aia atatai ibukina. (Taeka N Rabakau 19:17) E kakukureia Iehova te nano ni kan ibuobuoki aei!​—Ebera 13:15, 16.

TE BOREETI

A boretiaki booki aikai ibukin kairan reirei ao tibwatibwana nako ni katobibia te aonnaba:

• Booki: 47,490,247

• Booki aika uarereke: 6,834,740

• Boroutia: 167,854,462

• Karenta: 5,405,955

• Maekatin: 1,179,266,348

• Turaeki: 440,995,740

• Viteo teibi: 3,168,611

E karaoaki te boreeti i Aberika, Amerika Meang, Nuka ao Maiaki, Atia, Eurobe, ao aaba n te Betebeke aika 19 ikotaia ni kabane.

“Arau bon Katelyn May. Ai wanua au ririki. Iai au mwane ae $28, ao I kan anga bwa buokan te boreeti. Ngai tarimi ae uarereke, Katelyn.”

“Ti maroroakini taekan ami mitiin ni boreeti aika boou n ara utu. A iangoia natira, ae te mwaane ao te aine, temanna 11 ana ririki ao are temanna 9 ana ririki, bwa a na buuta aia mwane man te bangke ao a na anga bwa aia angabwai. Ti kukurei ni kanakoatia aia angabwai irarikin ara angabwai.”

TE KATEITEI

Aikai mwakuri ni kateitei tabeua ake a karaoaki ibukin boutokaan aia mwakuri Ana tia Kakoaua Iehova:

• Taabo n Taromauri n aaba ake e uarereke kaubwaiia: 2,180

• Taabo ni Botaki Ibukin Ruunga: 15

• Aobiti n tararua: 10

• Taan anganano ni mwakuri n aaba aika kakaokoro ni kabwanina aia tai iai: 2,342

“N tokin te wiki aei, ao ti a karaoa ara moan botaki n ara Tabo n Taromauri ae boou. Ti a rangi ni kimwareirei ngkai e a reke ara tabo ae raoiroi ibukin neboan Tamara ae Iehova ae te Atua. Ti kaitaua Iehova ao ngkami ibukin mwannanoan kainnanora, ngkai kam a a tia ni katei Taabo n Taromauri aika bati riki. E bon rangi ni manena ara Tabo n Taromauri nakoia kaain ikai ni kabane.”​—Chile.

“A rangi ni kakaitau taari mwaane ao aine ibukin te ibuobuoki are e a tia ni karaoaki man Ana botaki Iehova. Ti teimatoa n tataekin taai ake ti a tia n uaia ni mwakuri iai ma taani kateitei, ni karokoa boong aikai.”​—Moldova.

“Ti a tibwa tia ni karaoa bongin ara ririki ni mare ae ai 35 maanna ngkai. Ti uaia n iangoia bwa tera ae ti na kabooa ibukira ibukin te tai aei, ao e a reke ara iango bwa ti na angabwai nakon Iehova ao ana botaki, kioina ngkai ti na bon aki kona n tokanikai ni kawakinan ara mare i nanon te maan aei, n akea aia ibuobuoki. Ti tangira te mwane ane ti kanakoatia n te tinaniku, bwa e na kamanenaki ni buokan katean te Tabo n Taromauri n te aba teuana mai buakon aaba ake a aki bati ni kaubwai.”

“I a tibwa tia ni karekea tibwau man au utu, ma kioina ngkai a karako baika I tangiri ao e a karako riki bwaai aika I kainnanoi, I tangiria ngkanne bwa e na buokaki katean Taabo n Taromauri n aaba aika mwaiti, ake e korakora iai kainnanoan aei irouia, n te mwane ae I kanakoatia aei.”

BUOKANI KABUANIBWAI

A aki toki n riki kabuanibwai aika karina ni boong aika kaitira aikai. A karakai riki aia bwaintangira Ana tia Kakoaua Iehova aika mwaiti bwa a aonga ni buokaki iai tariia ake a mena n taabo ake a taonaki ni kabuanibwai aikai. Uringnga, bwa a baireaki angabwai ibukin buokan kabuanibwai bwa buokan naba te mwakuri ni katobibia te aonnaba. Aikai taabo tabeua, ake a a tia Ana tia Kakoaua Iehova ni buokiia iai aomata ake a rotakibuaka ni kabuanibwai:

• Aberika

• Aonon te Caribbean

• Atia

• Aban te Betebeke

“Ti kan anganingkami ara kaitau ae moan te bati, ngai ma kaainnabau ibukin bwaai ake kam a tia ni kanakomai ibukin buokan urubwai nako ake a riki n tain te angibuaka. Ti a kona iai ni katokaa taubukin ara auti ae boou. Ti kakaitau ma nanora ni kabane ibukin waekoan ami ibuobuoki.”

“Arau bon Connor ao ai 11 au ririki. Ngke I nora te baere e riki n te tsunami, e a reke nanou bwa N na ibuobuoki. Au kaantaninga bwa a na buokaki tariu ma mwaneu n aei.”

TOORO AIKA OKORO AIKA A KABWANINA AIA TAI NI BEKU

A kabwanini aia tai tabeman Kristian ni karaoa te mwakuri n tataekina te euangkerio ke ni mwakuri n te Betaera. A boutokaki tabeman taan anganano aika kabwanini aia tai aikai, ni bwaintangira aika reke. Aikai tabeman mai buakoia:

• Mitinare: 2,635

• Mataniwi aika mwamwananga: 5,325

• Kaain te Betaera: 20,092

“Kioina ngkai I aki kona ni mwakuri n te Betaera ngkai [te teinimwaane ae nimaua ana ririki], I kan anga ngkanne au angabwai ma au tangira ae bati. Ngkana I a ikawai, N na bon nakon te Betaera ao ni kakorakorai ni mwakuri iai.”

[Picture Credit Line n iteraniba 9]

Faithful video: Stalin: U.S. Army photo