Arom ni Kona n Ota Raoi ni Kanoan te Baibara

3. Butimwaea Te Ibuobuoki Mairouia Aomata Tabemwaang

Ngke e karaoa mwanangana ae moan te karuanikai, te tia kakaae ae Edward John Eyre rinanon te tabo ae te Nullarbor Plain ae e rangi ni kakamaaku, ao e a reireinaki Eyre irouia taian Aborigine aroni karekean te ran man tabuki n tano ao kaai aika taian eucalyptus. E a kamaiuaki Eyre mani butimwaean aia ibuobuoki tabemwaang ake a mwaatai riki n te aba anne.

MANI katuruturuan te katoto aei, e noraki iai kainnanoan te ibuobuoki mairoun temanna ae mwaatai riki, bwa ko aonga n tokanikai ni karaoan te mwakuri ae rangi ni kangaanga karaoana. Tii te arona naba anne ma warekan te Baibara.

E aki kantaningaiia taan rimwina Iesu bwa a nang bon ota raoi naba ni kanoan te Baibara n akea aia ibuobuoki tabemwaang. N te taina ao “E kauki nanoia, ba a aonga n ata te Baibara.” (Ruka 24:45) E ataia Iesu bwa a kainnanoa te ibuobuoki taani wareka te Baibara bwa a aonga ni kona ni karekea otaia n reirei ake a boto man te Baibara.

Te Ibuobuoki Mairoun Antai?

E mwiokoia taan rimwina ni koaua Iesu bwa a na katauraoa te ibuobuoki aei. Imwaini waerakena nako karawa ao e tua Iesu ae kangai: “Ma ngaia ae kam na nako ni kakiritiania botanaomata ni kabaneia, . . . n reireiia ba a na kabane baike I tuangngkami n tauu.” (Mataio 28:19, 20) E irekereke aia mwakuri Kristian ae moan te kakawaki aei ma te angareirei, ae nanonaki naba iai kabwarabwaraan aroni maiuakinani booto n reirei ake n te Baibara ni katoa bong. A buokiia aomata Kristian ni koaua bwa a na ota raoi ni kanoan te Baibara.

E aki maan imwin are e anga te mwioko anne Iesu nakoia taan rimwina, ao e a riki naba te bwai ae moan te kamimi. E taekinaki n te Baibara taekan te mataniwi n te baareti ae te I-Itiobia are e wareka mwakoron ana taetae ni burabeti Itaia. E boo ma mwakoron te taetae ni burabeti anne ake e aki ota iai. N aron ae taekinaki n te Baibara ao e kangai kanoan te kibu ae e kangaanga iai otan te I-Itiobia aei: “E kairaki n ai aron te tiibu nakon te kamateaki; ao aron te tiibutetei ae kainababu i matan ane korea buraena, ao ai arona naba ngke E aki kaurea wina: e uotaki nako motikan taekana ni karinanoana: ao antai ae kona ni kaota ana roro? ba e anaki maiuna mai aon te aba.”​—Mwakuri 8:32, 33; Itaia 53:7, 8.

E titiraki te mataniwi aei nakoni Biribo ae te Kristian ae bati riki ana atatai ni kiibu n te Baibara ni kangai: “E atonga aei te burabeti i bukin antai? I bukina, ke i bukin temanna?” (Mwakuri 8:34) E a tia te I-Itiobia aei n nako Ierutarem n taromauri iai ao tao e bae n tia ni bubutii te kairiri. E rangi n teretere bwa e wareware ma te nano ae ingainga ao e nanorinano. Ma e ngae n anne, e bon aki naba kona n ota te mataniwi aei ni kiibu aikai. Ai ngaia are, e a bubutiia Biribo ma te nanorinano bwa e na buokia. E rangi ni kakukurei nakon te mwaane arei ana kabwarabwara Biribo, n te aro are e a kairaki iai bwa e na riki naba bwa te Kristian temanna.​—Mwakuri 8:35-39.

A teimatoa naba Ana Tia Kakoaua Iehova ni kakaraoa te mwakuri are karaoaki irouni Biribo ao Kristian tabeman riki ake rimoa. N aaba aika raka i aon 235 mwaitiia, ao a a tia taani Kakoaua aika anganano ni buokiia aomata bwa a na kona n ota n ana reirei ni koaua te Baibara. A karaoa aei rinanon reiakinani kiibu man te Baibara aika kakaokoro ni kaineti ma te reirei teuana. E irekereke te anga ae waakinaki aei, ma te ukeuke raoi n te baere e taekinna te Baibara ni kaineti ma te iango ke te reirei teuana.a​—Nora te bwaoki ae “Kaeka Aika Karaunano Nakon Titiraki Aika Nako Man te Baibara.”

“A Kaekaaki Au Titiraki ni Kabane”

A moana reiakinan te Baibara ma Ana Tia Kakoaua Iehova Steven, Valvanera, ao Jo-Anne, ake a mwaneweaki taekaia n te moani kaongora. E taku Steven: “I rangi ni mimi bwa tii mani kabotauani booto n reirei tabeua man te Baibara ke rongorongo ake iai, ao angin te tai e a bon anga naba te kaeka ae koaua te Baibara nakon te baere ti maroroakinna. Bon akea ae e a tia n reireinai karaoan aei imwain ae I reirei n te Baibara. Bon te karaunano ae bati ataakin ae ngaia te Baibara e bon aki karekei kauntaeka aika aki kona ni kaekaaki ma iango aika kauntaba ni kaineti ma te koaua ibukin te Atua.”

E kakoauaa naba anne Valvanera, ao e taku: “A bane n rangi ni baarongaaki kanoana ao ni mataata raoi. A bane ni koaua baika a taekinaki iai, tiaki ibukina bwa e tua te Aro bwa a koaua, ma ibukina bwa a kabwarabwaraaki raoi bukia.” E a manga reitia ni kangai Jo-Anne: “I rangi ni karinea te tia Korea te Baibara ibukin te koaua ae a a tia ni kaekaaki au titiraki ni kabane ma iai, kioina ngkai a a kamani koreaki kaekaan aia titiraki ni kabane aomata bwa a na bon ota iai.”

Iai temanna Ana Tia Kakoaua Iehova ae ko kinaa? E aera bwa ko aki tuangnga bwa e na kaota aroni waakinan te ukeuke n reirei n te Baibara? Ngkana akea Ana Tia Kakoaua Iehova ae ko kinaa, koroboki nakon teuana mai buakon atureti aika karinanaki n iteraniba 4 n te maekatin aei. E na riki te Baibara bwa te boki ae aki kangaanga te ota iai, man ana ibuobuoki te Atua rinanon taamneina ae raoiroi, warekana ma kaukan raoi te iango ao te ibuobuoki mairoun temanna are e tau n angareirei n te Baibara. Ko boni kona n ota raoi ni kanoan te Baibara!

[Kabwarabwara ae nano]

[Te Bwaoki/​Taamnei n iteraniba 8]

Kaeka Aika Karaunano Nakon Titiraki Aika Nako Man te Baibara

Tabeua mai buakon reirei aika a rinanoaki raoi n aia waaki n ukeuke n reirei n te Baibara Ana Tia Kakoaua Iehova:

• Tera ana kantaninga te Atua ibukin te aonnaba?

• A mena iia maate?

• Ti a maeka ngkai ni “boong aika kaitira”?

• E aera ngkai e a aki katoka te rawawata te Atua?

• N na kanga ni karekea te kakukurei n au utu?

[Taamnei n iteraniba 7]

Ngkana ko kan ota raoi ni kanoan te Baibara . . . bubutii taamnein te Atua, warekia ma kauka raoi am iango ao butimwaea te ibuobuoki mairouia tabemwaang