Aia Titiraki Taani Wareware . . .
Tera ae a iangoia Ana Tia Kakoaua Iehova ibukin te botaki n taromauri irouia Aaro aika kakaokoro?
▪ E kaotaki n te World Christian Encyclopedia bwa e riaon “10,000 mwaitiia Aaro aika kakaokoro ni katobibia te aonnaba.” Ibukin rikini kangaanga aika rangi ni bati ake a ueke man aia itabarara Aaro aikai, a iangoia taan taromauri aika bati bwa e karekea te kantaninga ae raoiroi nakoia, te botaki n taromauri irouia Aaro aika kakaokoro. A kakoauaa bwa e kona ni karekea te rau ao te katiteuanaaki n te aonnaba ae bwenaua.
E kaungaaki te katiteuanaaki n te Baibara. E kabotaua te ekaretia ni Kristian te abotoro Bauro ma rabwatan te aomata, are “a katiteuanaaki bwaina nako ao a bane n ibuobuoki.” (I-Ebeto 4:16) N aron naba anne, e kaumakiia raona n te onimaki te abotoro Betero ni kangai: “Kam na bane n nanoteuana.”—1 Betero 3:8.
A maeka Kristian ake rimoa n te aonnaba ae a kakaokoro iai reeti ma katei ao Aaro. Ma ngke e koroboki Bauro ni kaineti ma reitakia Aaro aika kakaokoro, ao e titiraki ni kangai: “Tera ae e ibuokanibwai iai te aomata ae onimaki ma ae e aki onimaki?” Imwina, e anga te kauring nakoia Kristian bwa a na “otinako mai buakoia.” (2 I-Korinto 6:15, 17) E teretere ngkanne bwa e kabuakakaaki irouni Bauro te botaki n taromauri irouia Aaro aika kakaokoro. Bukin tera bwa e karaoa anne?
E kabwarabwaraaki iroun te abotoro bwa bon te aro ae aki riai te uaia n taromauri iroun te Kristian ni koaua ao ae tiaki. (2 I-Korinto 6:14) E tii kona ni karuanikaia ana onimaki te Kristian te waaki anne. Titeboo tabeaiangani Bauro ma te karo ae e ataia bwa iai ataei tabeman aika kaain ana kaawa aika buakaka aroaroia. N aron te karo ae tatabeaianga, e bwaina te wanawana n arona n tiatiana natina n rineaia raona n takaakaro. E bae n aki kakukurei ana babaire te karo aei. Ma ibukini baika riiriki, e na boni kamanoaki natina mani kariri aika bubuaka ngkana e kaokoroa. N aron naba anne, e ataia Bauro bwa ngkana a kaokoroia Kristian ma Aaro nako, a na boni kamanoaki iai man aia mwakuri aika karuanikai Aaro akanne.
E kakairi Bauro iroun Iesu ngke e tuangia Kristian bwa a riai ni kaokoroia ma Aaro nako. E aki uauataboa te botaki n taromauri irouia Aaro aika kakaokoro Iesu, ngke e katea te katoto ae te kabanea n raoiroi ni karekean te rau i marenaia aomata. A bati botaki n Aro aika mwakuri korakora n ana tai ni mwakuri ni minita Iesu i aon te aba, n aron aia Aaro Baritaio ma Tarukaio. Ni koauana, aikai botaki n Aro ake a uaia ni kaitaraa Iesu ao a boni bouruakina naba kamateana. Ma n te itera are teuana, e tuangia taan rimwina Iesu bwa a na “kawakinia . . . man aia reirei Baritaio ao Tarukaio.”—Mataio 16:12.
Tera ae riki ni boong aikai? E koaua bwa e teimatoa naba ngkai ni manena te kauring ae n te Baibara ibukin te botaki n taromauri irouia Aaro aika kakaokoro? Eng, e bon teimatoa ni manena ibukina bwa a aki kona ni katiteuanaaki aia koaua Aaro aika kakaokoro rinanon aia botaki n taromauri, kaanga ai aron renganan te oera ma te ran ngkana a kaakaki n te bwaata. N te katoto, ngkana a uaia n tataro ni bubutii te rau aomata aika kakaokoro aia Aaro, antai ngkanne te atua ae onnoniaki? Atuaia Aaro ake aongkoa Kristian ngaiia are te Temanna n teniman? Atuaia kaain te Aro n Hindu are Brahma? Te Buddha? Ke tao temanna riki?
E a kaman taekinna te burabeti are Mika bwa ni “boong aika kaitira,” ao a na kangai aomata mai buakoia botannaomata nako: “Kam na kaaraki, ao ti na ararake nakon ana maunga Iehova, ao nakoni maneaban Atuan Iakoba; ao ane E na reireira ana aro nako, ao ti na nakonako ni kawaina nako.” (Mika 4:1-4, BG) Ibukin anne, e na reke te rau ao te katiteuanaaki ni katobibia te aonnaba, tiaki ibukin ae a a botaki Aaro nako ma ibukina bwa a a bane aomata ni butimwaea te onimaki ae tii teuana ae koaua.
[Taamnei n iteraniba 18]
Kaain Aaro aika rangi ni bubura n te aonnaba ni karaoakin te botaki n taromauri irouia Aaro aika kakaokoro n 2008
[Te Kabwarabwaraan te Taamnei]
REUTERS/Andreas Manolis