Te Ikotaki n Taromauri i Marenaia Aaro​—E Koaua Bwa Bon Ana Iango te Atua?

E NGAE n anne, e rangi ni kaokoro iangoan te titiraki anne irouia taani boutokaa te ikotaki n taromauri i marenaia Aaro. E taku Eboo Patel are e moani katea te Ikotaki n Taromauri i Marenaia Aaro Irouia Rooro n Rikirake: “Bon akea te botaki n Aro ae aki mwamwannano . . . , ae e aki tabe ma kanakoraoan te otabwanin . . . , ae e aki tabe ma kaotiotan te akoi.”

Ni koauana, a a tia Aaro aika te Buddhist, te Katorika, te Boretetanti, te Hindu, te Mutirim ao a a bati riki n ikarekebai n te tai teuana bwa a na kamauna te maiu ni kainnano, a boutokaa inaomataia aomata, a kakorakoraia ni kamaunai boom ake a taunaki ke ni kaumakiia aomata nakoni kangaanga aika a riiriki n te otabwanin. A bati ake a roko man Aaro aika kakaokoro ake a ira buakon te maroro ibukini kakaaean te uaia n ota ao te ikaungaunga. A kakauringi naba kakaokoron aia reeti ni bukamaru ma taura nenea, aia toa, katangitangi, tataro ao a a bati riki.

E koaua bwa te ikotaki irouia Aaro ngaia are e na kanakoraoa te itabarara i marenaia n aia onimaki? E koaua bwa te ikotaki n taromauri i marenaia Aaro bon ana iango te Atua ni kanakoraoa te botannaomata?

TE KATITEUANAAKI—TERA MANENANA?

A kamoamoa n taekinna kaain te botaki teuana man te ikotaki n taromauri i marenaia Aaro ae te kabanea ni mwaiti kaaina bwa a roko kaaina man Aaro aika kakaokoro aika e raka i aon 200 mwaitiia ao e rangi ni waaki raoi n aaba aika 76. Ana boto n iango are e katanoataa boni “kaungaan te nanomwaaka ao te ibuobuoki ni katoabong irouia kaain te ikotaki n taromauri i marenaia Aaro.” Ma e ngae n anne, e a tia ni kakoauaaki bwa e bebete riki atongana nakoni karaoana. N te katoto, a taekinna taani babaire ae a riai n rinanoaki raoi korean aia kaetieti bwa a na aki un iai Aaro aika bati ao kurubu man aaba ake a tiainaa te boraraoi. Bukin tera? Bukina teuana bwa iai te aki boraoi n iango bwa e riai ni karinaki taekan te Atua n te kaetieti ke e aki. Imwina, a totokoaki booki ke mwanewean taekan te Atua.

Ngkana e a kakeaaki te Atua n te kaetieti, tera ngkanne manenan te onimaki? Irarikin anne, e kanga te aeka n ikotaki n taromauri i marenaia Aaro ni kaokoro ma botaki n tautaeka ake a anganano ke ake a waakini mwakuri n ibuobuoki? Ao anne bukina ae a kabwarabwaraa iai i eta i bon ibukia te botaki ae ikotakia Aaro n taromauri i marenaia, bwa tiaki botaki n Aro aika kakaokoro ma kaanga “te botaki ae kaungaa te ibuobuoki.”

E TAU IBUKIA AARO TII KARIKIRAKEAN AROARO AIKA RARAOI?

E taku Dalai Lama are kinaaki bwa te tia kabuakakaa te ikotaki n taromauri i marenaia Aaro: “A taneiai Aaro aika bubura ni kabane n tataekina te rongorongo ae tii te tikina ae taekan te tangira, te nanoanga ao te ikabwarabure.” E a manga reitia ni kangai: “Te bwai ae kakawaki bwa a riai n riki aroaro aikai bwa iterani maiura ni katoabong.”

N etina, a aki kona ni kaatuuaki iangoani kakawakin aroaro aika te tangira, te nanoanga ao te ikabwarabure. N aron ae e a tia n atongaki bwa te Kibu ni Kora, e taku Iesu: “Mangaia ae bwaai ni kabane aika kam tangiriia aomata bwa a na karaoi nakoimi, kam riai ni karaoi naba nakoia.” (Mataio 7:12) Ma e koaua bwa te onimaki ni koaua bon tii karikirakean aroaro aika raraoi?

E taekina ae kangai te abotoro Bauro ibukia aika bati ake a taku bwa a beku ibukin te Atua n ana tai: “I kaotiotia bwa bon iai ingaingan nanoia ibukin te Atua, ma e aki boraoi ma te atatai ae eti.” Tera te kangaanga? “Kioina ngkai a aki ataa ana raoiroi te Atua,” e a taekinia Bauro bwa a “kataia ni karikiia n raoiroi i bon irouia.” (I-Rom 10:2, 3) Ibukina bwa akea te atatai ae eti ni kaineti ma tera ae a na karaoia ibukin te Atua, a bane ni matebuaka ingaingan nanoia ao aia onimaki.—Mataio 7:21-23.

ANA REIREI TE BAIBARA IBUKIN TE IKOTAKI N TAROMAURI I MARENAIA AARO

E taku Iesu: “A a kukurei taan raoi.” (Mataio 5:9) E mwakuria te baere e tataekinna Iesu n arona ni kaungaa te aki tiritiri ao e uouota te rongorongo ni kaineti ma te rau nakoia aomata aika kakaokoro aia Aaro ma aia katei. (Mataio 26:52) A atikaki naake a butimwaea te rongorongo nakon te bwai ni kabaebae ae aki kona n uruaki ae te tangira. (I-Korote 3:14) Ma anne ana boto n iango Iesu bwa e na tii ikotiia aomata aika kakaokoro aroia bwa a aonga ni kaai ni karekea te rau? E reitaki ma ngaiia n aron aia taromauri?

A boni kaitaraa Iesu mataniwi n Aaro man te koraki n Aro teuana aika Baritaio ao Tarukaio ao a a ukera naba kamateana. Ma tera arona iai? E tua Iesu nakoia taan rimwina ni kangai: “Tai tabe irouia. Boni ngaiia taani kairiri aika mataki.” (Mataio 15:14) E rawa Iesu ni kaungaa te reitaki ma te ikotaki n taromauri i marenaia Aaro ma aeka n aomata akanne.

Tabeua te tai imwina, e a kateaki te ekaretia ni Kristian teuana i aoni Korinto i Kuriiti ae te kaawa ae ataaki ibukini kakaokoron ana reeti ma katein Aaro aika bati iai. Tera aroia Kristian ake a maeka i buakoia? E korea ae kangai te abotoro Bauro nakoia: “Kam na tai reitaki ma ake a aki onimaki.” Bukin tera? E kamataata Bauro ni kangai: “Tera ae a katiteuanaaki iai Kristo ma Beriara? Ke tera ae e ibuokanibwai iai te aomata ae onimaki ma ae e aki onimaki?” Imwina, e anga te reirei ni kairiri aei: “Kam na otinako mai buakoia, ao kaokoroingkami.”—2 I-Korinto 6:14, 15, 17.

E teretere raoi n te Baibara bwa e ribaaki te ikotaki n taromauri i marenaia Aaro. Ma ko bae n iango ni kangai: ‘E na kanga ngkanne ni kona n reke te katiteuanaaki ni koaua?’

KARIKIRAKEAN TE KATITEUANAAKI NI KOAUA

E tei te International Space Station ae roko mai iai te kukune ae boou ibukin taraani butini bwaini karawa man aia kaai ni kakorakora ni katiteuanaia aaba aika tao 15 mwaitiia. Ko kona n iangoa mwini koron nanon te iango i aon aei ngkana arona bwa a aki boraoi n iango iai aaba ake a kaainna bwa tera te kaetieti ni kairiri ae a na kabongana?

E rangi ni kakawaki bwa anne ae karaoaki n aia waaki te ikotaki n taromauri i marenaia Aaro ni boong aikai. E ngae ngke e kaungaaki te ibuobuoki ao te ikarinerine ma bon akea te boraraoi n iango i aoni kaetieti ibukini karikirakean te onimaki. Ibukin anne, e teimatoa n riki te kamaenakoaki ibukini kangaanga ni kaineti ma taian aroaro ao reirei.

Iai ana kaetieti te Atua n te Baibara ake a a riki bwa kaanga kairirara. Ti kona ni karikirakei maiura n te baere e taekinaki n te Baibara. A a tia naake a butimwaeia n tokanikai i aon te riribai ibukini kakaokoroaia aomata ma botaki n Aro ao n reiakina aron te kaai ni mwakuri ma te rau ao te katiteuanaaki. E taetae ni burabetinaki aei iroun te Atua ni kangai: “N na onika aia taetae botanaomata ba te taetae ae itiaki n te tai arei, ba a na taboa aran Iehova, n toro i Rouna n te bo n nano.” E reke te katiteuanaaki man te “taetae ae itiaki” ae ana kaetieti te Atua ibukin te taromauri.—Tebania 3:9, BG; Itaia 2:2-4.

A kukurei ni kaoko Ana Tia Kakoaua Iehova nakon aia Tabo n Taromauri ae ko kaan ma ngaia, n nora aron te rau ao te boonnano ae rianako i marenaia.—Taian Areru 133:1.