Iehova Bon te Tia Katauraoi Bwaai Ibukira ao te Tia Kamanoira

1, 2. Baikara kakaokoroni baika riiriki nakoira n ara utu ao kaikawaakira n te onimaki?

BON Iehova are e moani karaoi babaire ibukin te utu. (I-Ebeto 3:​14, 15) E ngae ngkai ti mena n te utu ae tii teuana ma a kakaokoro aroarora ao baika riiriki nakoira. Ko bae n tia ni maeka ma am karo mani moani bungiakim ni karokoa ko a ikawai. Tabeman a bae n tia ni mate aia karo tao n te aoraki, te kabuanibwai ae karina ke kangaanga aika kakaiaki riki tabeua. Ma iai naba tabeman aika a aki roko n te kinaia aia karo.

² A kakaokoro naba aroni kaikawaakia n te onimaki kaain ana utu Iehova aika taan taromauria. Ko bae n tia ni ‘kaikawaaki n te koaua’ n aron ae a taekinna tabeman ao a a tia am karo n reireiniko booto n reirei mairoun te Atua. (Te Tua-Kaua 6:​6, 7, BG) Ke tao ngkoe temanna mai buakoia nga ma nga ake a ataa te koaua rinanon te mwakuri n uarongorongo irouia ana toro Iehova ake tabeman riki.​—I-Rom 10:13-15; 1 Timoteo 2:3, 4.

3. Baikara bwaai aika ti bane n rotaki iai?

³ Ni kaineti ma bwaai akana a a tibwa tia n taekinaki, iai bwaai tabeua aika ti bane n rotaki iai. Ti karawawataaki imwin ana aki ongeaba Atam ao n ituaki n te aki kororaoi, ae te bure ao te mate. (I-Rom 5:12) Ma e ngae n anne, ngkai taan taromauri ni koaua ngaira, iai riaira n atonga Iehova bwa “Tamara.” Ni maroroakinaia ana aomata te Atua ake e rineia n taai ake rimoa, e a taekinaki n Itaia 64:​8, (BG) ae kangai: “Iehova bon Tamara Ngkoe.” Irarikin anne, e moana ana tataro ni katoto Iesu n taeka aikai: “Tamara are i karawa, e bia katabuaki aram.”​—⁠Mataio 6:⁠9.

4, 5. Tera ae ti na rinanona ngkana ti karikirakea ara kakaitau nakon Tamara ae Iehova?

⁴ E katauraoi bwaai aika ti kainnanoi ao kamanoara Tamara are i karawa ngkai aomata ngaira aika taan taromauria. E mwanewea taekana te tia areru ngke e kangai: “Ngkae e bati n tangirai [te tia taromauri ni koaua], ao I a kamaiua: I a katokaa i eta, [ke “kamanoa,” NW] ngkai e ata arau.” (Taian Areru 91:​14, BG.) Eng, e tatangira Iehova ni katauraoa te anga ae ti na kamaiuaki iai mairouia taani kairiribai ao e kamanoira bwa ti na aki kamaunaaki ngkai ana aomata ngaira.

⁵ Ngkana ti na karikirakea ara kakaitau nakon Tamara are i karawa, ti na rinanoi baika kakawaki aika tenua aikai: (1) Bon te tia Katauraoi Bwaai Ibukira Tamara. (2) Bon te tia Kamanoira Iehova. (3) Ao bon Raoraora ae moan te kakannato te Atua. Ngkana ti iaiangoi baikai, e na rangi n ibuobuoki ibukini kananoan ara iango i aon ara iraorao ma te Atua ao n atai arora ni kona ni karinea bwa Tamara. E na rangi ni kakawaki naba iaiangoani kakabwaia ake e anga Iehova nakoia te koraki ake a kaania.​—Iakobo 4:8.

IEHOVA BON TE TIA KATAURAOI BWAAI IBUKIRA AE KAKANNATO

6. Tera te anga teuana are e kaotia iai Iehova bwa bon te tia Anga ‘bwaai n tituaraoi aika raraoi ni bane’?

⁶ E korea ae kangai te tia rimwini Kristo ae Iakobo: “A bane bwaai n tituaraoi aika raraoi ma bwaintangira aika kororaoi n roko mai eta, bwa a ruo mairoun Taman ootani karawa.” (Iakobo 1:17) Te maiu bon te bwaintangira ae rangi n tamaroa mairoun Iehova. (Taian Areru 36:⁠9) Ni kabonganaani maiura ni karaoa nanon te Atua, ti a karekei kakabwaia aika rangi bati ngkai ao te kantaninga ibukin te maiu n aki toki n te waaki ae boou i aon te aba. (Taeka N Rabakau 10:22; 2 Betero 3:13) Ma e na kanga n reke aei ngkai ti a nori imwin ana aki ongeaba Atam aika karawawata?

7. E kanga te Atua ni kauka te kawai ibukini karekean ara iraorao ae kaan ma ngaia?

⁷ Bon Iehova te tia Katauraoi Bwaai Ibukira ae Kakannato n aaro aika a aki kona ni warekaki. N te katoto, ti a kamaiuaki man ana akoi ae rianako. Eng, ti bane ni bure ao n ituaki n te aki kororaoi mairoun ara moani karo i aon te aba. (I-Rom 3:23) Ma ibukin ana tangira Iehova, e biririmoa ni kauka te kawai ibukini karekean ara iraorao ae kaan ma ngaia. E korea ae kangai te abotoro Ioane: “E kaotaki ana tangira te Atua ibukira, n aei: ngkai e kanakomaia Natina ae te rikitemanna, nako buakoia kaain te aonnaba bwa ti aonga ni karekea te maiu rinanona. Aio aron te tangira aei, bwa e tangirira te Atua ao e kanakoa Natina bwa te kareanraoi ibukin ara bure, ao e aki karaoa aei ibukina bwa ti tangiria.”​—1 Ioane 4:9, 10.

8, 9. E kanga Iehova ni kaotia bwa bon te tia Katauraoi Bwaai Ibukira ae Kakannato n ana tai Aberaam ao Itaaka? (Nora te taamnei ni moan te kaongora aei.)

⁸ E kaotaraeaki nanon te taetae ni burabeti n te ka-19 n tienture B.C.E., n te bwai ae riki ibukin raababan nako ana bwaintituaraoi Iehova nakoia aomata ake a ongeaba bwa e na reke te maiu ae akea tokina irouia. E kabwarabwaraaki ae kangai n Ebera 11:17-19: “Ibukin ana onimaki Aberaam ao e kuri ni kareana Itaaka ngke e kataaki. E kataia ni kareana natina ae ana rikitemanna, teuare e butimwaei taiani berita ma te kukurei, e ngae ngke e a tia n taekinaki ae kangai nakoina: ‘Ane riki mairoun Itaaka ao e na atongaki bwa “am kariki.” ’ Ma e taku i nanona bwa e kona te Atua ni kauta Itaaka mai buakoia maate, ao e a manga kaokaki natina nakoina man te mate n te aro ni kaikonaki.” E bebete norani baika a boraoi ikai. N aron Aberaam ae e kukurei ni kareana natina ae Itaaka, E anga naba Iehova Natina ae Iesu Kristo ibukini kamaiuaia kaain te aonnaba.​—Wareka Ioane 3:​16, 36.

⁹ Ai kukureira Itaaka ni kamaiuana mani kareanakini maiuna! E rangi ni kakaitau ibukin te bwai are e katauraoia te Atua are e na onea mwina bwa te karea, ae te tiibutetei are e bae korona ni kaai ake i akun Aberaam. (Karikani Bwaai 22:​10-13) Maroaka ae e aranaki te tabo anne bwa “Iehova-iira,” ae nanona “E na Katauraoaki n Ana Maunga Iehova.”​—Karikani Bwaai 22:14, BG.

TE KAWAI IBUKIN RAOIAKINARA MA TE ATUA

10, 11. Antai ake a kairiri n “te mwakuri ae kaineti ma raoiakinaia aomata,” ao a kanga ni karaoa anne?

¹⁰ Ngkai ti iaiangoa aron Iehova ni kaotia bwa bon te tia Katauraoi Bwaai Ibukira ae Kakannato, ti a kakoauaa kakawakini mwiokoan Iesu Kristo n aron naba are e karaoia Bauro ngke e korea ae kangai: “Aei ae ti a tia ni motikia, bwa e mate te aomata ae tii temanna ibukia aomata ni kabane, ibukina bwa a a tia ni bane ni mate, ao e mate ibukia ni kabaneia, bwa a aonga n aki manga maiu akana maiu i bon ibukia, ma a na maiu ibukin teuare mate ibukia, are e a tia ni kautaki.”​—⁠2 I-Korinto 5:​14, 15.

¹¹ Ibukin tangiran te Atua ao aia kakaitau Kristian ake n te moan tienture n reken te kakabwaia ae rangi ni kakawaki ae te beku ibukina, a a kukurei ni butimwaea “te mwakuri ae kaineti ma raoiakinaia aomata.” Man aia mwakuri n uarongorongo ao karekeaia taan rimwini Kristo, e a kaukaki iai kawaia te koraki aika raoiroi nanoia bwa a na raoiakinaki ma te Atua, ike a a karekea iai aia iraorao ma ngaia ao n tokina a a riki bwa natina n taamnei. Ni boong aikai, a karaoa te mwakuri ni minita ae aron anne ana toro Iehova aika kabiraki. Man te bwai are a a tia ni kakororaoia taan tei ibukin te Atua ao Kristo, a a kona ni katikaki iai iroun Iehova te koraki ake a tauraoi nanoia ni butimwaea te koaua ao a a riki bwa taan onimaki.​—Wareka 2 I-Korinto 5:​18-20; Ioane 6:44; Mwakuri 13:48.

12, 13. Ti na kanga ni kaota ara kakaitau n ana bwaintituaraoi Iehova aika bati?

¹² A bane Kristian ake a kantaningaa te maiu i aon te aba ma taani kabiraki n uataboa tataekinan te Tautaeka n Uea, ibukin nanoia ni kakaitau nakon Iehova ae te tia Katauraoi Bwaai Ibukira ae Kakannato. Ni karaoan te mwakuri aio, ti kabongana te Baibara ae ana bwaintituaraoi naba te Atua ae kakawaki. (2 Timoteo 3:​16, 17) Ti angania aomata aia tai ni karekea te maiu n aki toki mani mwaataira ni kabongana Ana Taeka te Atua ae kairaki koreana. Ibukini buokara n te mwakuri aei, ti bane n onimakina te bwaintituaraoi teuana riki mairoun Iehova, ae taamneina ae raoiroi. (Tekaria 4:6; Ruka 11:13) A rangi ni kaunganano mwin te mwakuri n uarongorongo n aron ae kaotaki ni katoton te boki ae te Yearbook of Jehovah’s Witnesses. Ai kakabwaiaakira ngaira ngkai ti uataboa te mwakuri aio ibukin neboan Tamara ao te tia Katauraoi Bwaai Ibukira!

¹³ N iaiangoani bwaai ni kabane ake e katauraoi te Atua, ti karaoa ae riai ngkana ti titirakinira ni kangai: ‘I karaoa au kabanea ni kona n au mwakuri ni minita ni kaota au kakaitau ae nako mai nanou ibukin ana bwaintituaraoi Iehova aika bati? N aaro raa ae I kona iai ni katamaroaa arou n tataekina te rongorongo ae raoiroi n te aro ae uaana riki?’ Ti kona ni kaotiota ara kakaitau n ana bwaintituaraoi te Atua aika tamaroa n arora n teimatoa ni moanibwaia te Tautaeka n Uea. Ni karaoan aei, e na bon taraia raoi Iehova bwa a na reke baika ti kainnanoi. (Mataio 6:​25-33) Ni koauana, ti kani karaoa ae rangi ni bati n aron ae ti kona ni kakukureia ao ni kakimwareireia nanon te Atua ibukin ana tangira.​—Taeka N Rabakau 27:⁠11.

14. E kanga n riki Iehova bwa te tia Kamaiuia ana aomata?

¹⁴ E anene ni kangai te tia areru are Tawita: “I a kawa, ao e kai nanou; Ma E ururingai naba Iehova: Bon te tia buobuokai ao te tia kamaiuai Ngkoe.” (Taian Areru 40:​17, BG) E okioki Iehova n riki bwa te tia Kamaiuia ana aomata ni kabane, ai moarara riki ngkana a bwainikirinaki n te aro ae kakaiaki ao ni kaitaraaki n aki toki ma taeka aika aki riai irouia taani kairiribai. Ai kakaitaura ngaira n ana ibuobuoki te Atua n taai ni kangaanga akanne ao arona ni katoatai ni katauraoi bwaintituaraoi aika bati ibukin ara onimaki!

E KAMANOIA IEHOVA

15. Kabwarabwaraa aron te karo ae tatangira ni kakorakoraa ni kamanoa natina.

¹⁵ E aki tii katauraoi bwaai ibukia natina te karo ae tatangira ma e kakorakoraa naba ni kamanoia. Ni koauana, e na kataia n kamaiuia ngkana a kaaitara ma te kabuanibwai. E uringa te tai teuana te tari te mwaane temanna ngke e rangi n uarereke are e kamanoaki iai iroun tamana. E a tibwa oki ma tamana n uarongorongo ao a nakonako n te kawai ae kairiia nakon te karaanga ae uarereke. E korakora te karau ni bwaka n te ingabong anne, ngaia are e a taonako ranin te karaanga. Te anga teuana ae a na kona n roko iai n iterana are teuana, tii man touakin atibu aika bubura iai teuana imwin teuana. Ngke e rimoan tamana te ataeinimwaane aei, e marannako waena teaina ngke e toua te atibu teuana ao n tatanako ni bwaka i nanon te karaanga ao n iinako uoua te tai. Ai kakaitaura te ataeinimwaane aio ngke e a waekoa naba tamana n taua angani baina ni kamatoaa ao ni kaaerakea bwa e na aki bwabwa! E kamaiuira naba Tamara are i karawa man te bwai ae kona n taraaki bwa korakorani katikitikin ana waaki te aonnaba ae buakaka aei ao mairoun te tia tautaekanna are Tatan. Akea te nanououa bwa Iehova bon te tia Kamanomano ae moan te mwaatai ae tauraoi ni buokiia aomata nako.​—⁠Mataio 6:13; 1 Ioane 5:⁠19.

16, 17. E kanga Iehova ni buokiia ao ni kamanoia tibun Iteraera ngke a buakania tibun Amareka?

¹⁶ E kabwarabwaraaki raoi ana kamanomano ae tatangira Iehova n te bwai are e riki imwini kainaomataaia tibun Iteraera man tautoronakia i Aikubita ao kamanoaia rinanon te kakai ngke a rinanon Taari ae Uraura n 1513 B.C.E. A roko raoi i Rebirim te natannaomata aei imwin ririannaia rinanon te rereua nakoni Maungan Tinai.

¹⁷ N iangoan ana taetae ni burabeti te Atua ae ni Karikani Bwaai 3:​15, e bae ni kakorakoraa Tatan n ukeri ana anga ni buakania tibun Iteraera ake a mamaara. E boni karaoa aei rinanoia tibun Amareka ake a riribaia ana aomata te Atua. (Warekaia Iteraera 24:20) Iangoa te bwai are e kakororaoia Iehova rinanoia mwaane aika kakaonimaki aika aman ake Iotua, Mote, Aaron, ao Ura. Ngke e buakania tibun Amareka Iotua, ao a katei maeka Mote, Aaron ao Ura n uakaan ma te maunga. A tokanikai tibun Iteraera n tain te buaka ngkana e arori rake baina Mote. Ngkana a kakai baina, e a manga buokaki irouia Aaron ma Ura. Ngaia are “Iotua e kabwakaia tibun Amareka ma aia koraki” man ana ibuobuoki ao ana kamanomano Iehova. (Te Otinako 17:​8-13, BG) E karaoa te baonikarea Mote ikekei ao e aranna bwa “Iehova-niti,” ae nanona “Iehova Au Maro.”​—⁠Wareka Te Otinako 17:​14, 15, BG; nora te kabwarabwara mai nano.

KAMANOAKI MAN ANA WAAKI NI KAIRIRI TATAN

18, 19. Tera te kamanomano are e katauraoia te Atua ibukia ana toro n ara bong aikai?

¹⁸ E kamanoia Iehova aomata ake a tangiria ao n ongeaba irouna. N aroia tibun Iteraera ake i Rebirim, ti onimakina naba kamanoara iroun te Atua ngkana ti kaitaraaki irouia naake a riribaira. E aki toki ni kamanoira ni kabane Iehova ao ni kawakinira man ana waaki ni kairiri te Riaboro. Iangoi taai aika bati ngke a kawakinaki iroun te Atua tarira ake a kateimatoai aroia ni Kristian n tei i nuka. N te katoto, aio ae riki n aia tai kaain te Nazi i Tiaman ao aaba riki tabeua n 1930 tabun ao ni moan 1940 tabun. E na kakorakoraaki onimakinan Iehova iroura bwa ara tia Kamaiu ngkana ti wawareki ao n iaiangoi rongorongoni maiuia aomata ao rongorongo naba n te Yearbook ni kaineti ma ana kamanomano te Atua n taai ake a bwainikirinaki iai.​—⁠Taian Areru 91:⁠2.

¹⁹ Ti karekei kauring aika tatangira ibukini kamanoara n ana botaki Iehova ao booki aika aanaki man te Baibara. Iangoa aroni kakoauaan aio bwa bon te kakabwaia ibukira n taai aikai. Ngkai e a tabe n iinako te aonnaba aei n te bokaboka ae te babakanikawai ao te bwaitingako, e a tia Iehova ni katauraoi kauring aika kakawaki ao te ibuobuoki ae manena ibukin ataakin aroaro ni maiu aika karuanikai. N te katoto, ti karekea ana reirei ni kairiri Tamara are i karawa ae ti riai n rarawa nakon iraorao aika bubuaka rinanoni kabonganaan te Internet n te aro ae aki riai.a​—⁠1 I-Korinto 15:⁠33.

20. Tera te kamanomano ao te kairiri aika tauraoi n te ekaretia ni Kristian?

²⁰ Ti na kanga ni kaotiotia bwa ti bon “reireiaki iroun Iehova”? Man arora ni mutiakin raoi ana tua. (Itaia 54:​13, BG) Ti karekea te kairiri ao te kamanomano aika ti kainnanoi n te tabo ae ti mano iai n ara ekaretia, bwa iai mwaane aika kakaonimaki ake a beku bwa unimwaane ake a katauraoa te ibuobuoki ao te reirei ni kairiri man te Baibara. (I-Karatia. 6:⁠1) Ti namakina ana tangira ae bati Iehova rinanoia “mwaane ake a a riki bwa bwaai n tituaraoi.” (I-Ebeto 4:​7, 8) Tera arora nakoia? Ko na kakabwaiaaki iroun te Atua ngkana ko kukurei n aantaeka ao n ongeaba irouia.​—⁠Ebera 13:⁠17.

21. (a) Tera ae ti riai ni motinnanoia bwa ti na karaoia? (b) Tera ae na rinanoaki n te kaongora ae imwina?

²¹ Ti bia motinnanoia bwa ti na kairaki n te taamnei ae raoiroi ao n nanoraoi ni butimwaea ana kairiri Tamara are i karawa. Ti riai naba ni kananoi ara iango i aoni maiun Natina ae Iesu Kristo ao ni kakorakoraira n tou mwin ana katoto aika akea kabotauaia. E karekea te kakabwaia ae rangi ni kakawaki Iesu man ongeabana ni karokoa matena. (I-Biribi 2:​5-11) Ti kona ngaira ni kakabwaiaaki n ai arona ngkana ti onimakina Iehova ma nanora ni koaua. (Taekan Rabakau 3:​5, 6) Ngaia are ti bia onimakina Iehova n taai nako bwa te tia Katauraoi Bwaai Ibukira ao te tia Kamanoira ae akea kabotauana. Ai kakukureira ao ai batira kakabwaiaara n te beku ibukina! E na rikirake tangiran Tamara ngkana ti kaotiota iteran aroarona ae te katenua ae mwannanoara ae te iraorao ma ngaia. E na katuruturuaki aron Iehova n riki bwa Raoraora ae moan te kakannato n te kaongora ae imwina.