Te Bwai ae E a Tia ni Karaoia te Atua Ibukim

Bon anne te kibu teuana mai buakoni kibun te Baibara ni kabane ae rangi n ataaki ao n rangi ni mwamwaneweaki ni kabutaa te aonnaba. E taekinaki bwa akea riki te kibu ae “kaota reitakin te Atua ma aomata ae teretere ao te kawai ibukin te kamaiuaki.” Ibukin anne, e aki toki ni kaotiotaki n aaba tabeua kanoan te kibu anne ke e tii koreaki “Ioane 3:16” n taabo n runga ibukin te botannaomata, i aoni beeba aika kanimwaki ni kaa, baaba ni kaongora ibukia botannaomata ao taabo riki tabeua.

A bae ni kakoauaa te koraki ake a kaotiota te kibu anne bwa e beritana kamaiuaia n aki toki te Atua ibukin ana tangira. Ao ngkoe tera arom? Tera nanon ana tangira te Atua nakoim? Ao tera am iango n te bwai ae e a tia ni karaoia te Atua ni kaota iai tangiram?

‘E KORORAKE TANGIRAIA AOMATA IROUN TE ATUA’

A bati aomata aika kukurei ni kamoamoaa te Atua ni karikan te iuniweeti, bwaai ni kabane ao bon aomata. Ni koauana, bon iai te wanawana ae korakora ni karikani baika maiu aika e kangaanga te ota iai ao ni karaoaki raoi. A mwaiti aomata aika a kaitaua te Atua ni katoabong ibukin te bwaintangira ae te maiu. A ataia naba ae a rangi ni kainnanoa te Atua ibukini bwaai ni kabane aika a kainnanoi ibukini maiuia n aron te ea, te ran, te amwarake ao bwain te aonnaba aika mwamwakuri ibukini kateimatoaan te maiu n te aro are a na kona ni waakinaanako maiuia ao ni kukurei ni baika a karaoi.

Ti karaoa ae raoiroi ngkana ti kaitaua te Atua ibukini baikai ni kabane bwa boni ngaia te tia Karaoira ao te tia Kateimatoaira. (Taian Areru 104:10-28; 145:15, 16; Mwakuri 4:24) Ti kona ni kaitaua te Atua n ana tangira ibukira ngkana ti iangoi bwaai ni kabane ake e karaoi tii ibukini karekeani maiura. E taekinna n te aro aei te abotoro Bauro: “[Bon te Atua ae] anga te maiu ma te ikeike ao bwaai ni kabane nakoia aomata nako. Bwa boni ngaia ae ti maiu irouna ao ti kakammwakuri, ao iai ngaira.”—Mwakuri 17:25, 28.

Ma e kaotiotaki ana tangira te Atua n aaro aika bati riki nakon tii tabeakinani baika ti kainnanoi ibukini maiura. E boni karaoira naba ni karietataira ao ni kawanawanaira riki nakoia maan n arona n anganira ara konabwai ni maiuakina te onimaki ni koaua ao ni kanakoraoia. (Mataio 5:3) N te aro anne, a a karekea te kantaninga botannaomata aika ongeaba ngkai a a riki bwa kaain ana utu te Atua ao ‘natina.’—I-Rom 8:19-21.

E reitaki n taekinaki n Ioane 3:16 bwa e kaota ana tangira te Atua ibukira ni kanakoan Natina ae Iesu nako aon te aba, bwa e na reiakinira taekan Atuana ao Tamana n ikotaki naba ma matena ibukira. Ma a bati aika a taekinna bwa a aki ota raoi bwa bukin tera ngkai e riai ni mate Iesu ibukia botannaomata, ao aroni kaotiotan ana tangira te Atua ibukira ni matena. Ti na nora aroni kabwarabwaraani bukini maten Iesu ao kakawakina n te Baibara.

“E KABUREA NATINA AE TE RIKITEMANNA”

A bane botannaomata ni mate, a rotakibuaka n rawawatan te aoraki, te kara ao te mate. Ma bon tiaki anne ana moani kantaninga Iehova ae te Atua. E angan te moan taanga te kantaninga ibukin te maiu ae akea tokina n te bwaretaiti n te aonnaba. Ma iai te bwai teuana ae a riai ni karaoia: A riai n ongeaba irouna. E taekinna te Atua bwa a na boni mate ngkana a rineia bwa a na aki ongeaba. (Karikani Bwaai 2:17) E boni karitei te moani mwaane nakoni mwaakan te Atua ni kairiri ao e karekea matena ao kanoana naba. E kabwarabwaraa ni kangai te abotoro Bauro: “Aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.”—I-Rom 5:12.

E ngae n anne, e “tangira te kaeti-taeka” te Atua. (Taian Areru 37:28, BG) E ngae ngke e aki kona te Atua ni katinanikua are bon nanon te moani mwaane ni kani bure, ma e aki kariaia bwa a na rawawata aomata ni kabane ao ni mate n aki toki ibukin ana aki ongeaba te aomata temanna. Ni kaitaraan anne, ibukini kamanenaan te boto n reirei ae kariaiakaki i aan te tua ae “te maiu boona te maiu,” e a kaboraoa iai rawawatan te kaetitaeka ao ni kona ni karekea riki te maiu ae akea tokina ibukia aomata aika ongeaba. (Te Otinako 21:23, BG) Te titiraki ngkanne, E na kanga ni kaokaki maiuia aomata ae kororaoi are e kabuaa Atam? Te kaeka: E riai temanna n anga ke ni kareana maiuna ae boraoi kakawakina ma maiun Atam n aomata ae kororaoi.

E teretere bwa bon akea kanoan Atam ae kororaoi are e kona ni kabwakaa te kaboomwi ma tii Iesu. (Taian Areru 49:6-9) E kororaoi Iesu bwa e bungiaki n akea rotakina n te bure, n ai aron Atam n te moantai. Mangaia are e kabwakaa te karea ni kaboomwi ngke e anga maiuna ibukia botannaomata bwa a aonga ni kainaomataaki man te bure. Ni karaoan anne, e a karekea angaia kanoan te moan taanga bwa a na karekea te maiu ae kororaoi are a anganaki ngkoa Atam ma Ewa. (I-Rom 3:23, 24; 6:23) Iai te bwai ae ti riai ni karaoia bwa ti aonga ni kakabwaiaaki man te aeka ni mwakuri n tangira ae kakawaki anne?

“TE AOMATA NAKO AE E KAKOAUAA”

Ngkana ti okirikaki nakon Ioane 3:16, ti nori iai taeka aikai: “Ba e aonga n aki bua te aomata nako ae e kakoauaa [Iesu] ma e na reke irouna te maiu ae e aki toki.” E nanonaki n anne bwa iai aika kaonotaki bwa a na karekea te bwaintangira ae te maiu n aki toki. Ngkana ti na ‘karekea te maiu ae aki toki,’ ti riai ni kakoauaa Iesu ao n ongeaba irouna.

Ko kona n iango ni kangai: ‘Bukin tera bwa e irekereke iai te ongeaba? Tiaki e taekinna Iesu bwa e na karekea te maiu ae aki toki “te aomata nako ae e kakoauaa”?’ Eng, e rangi ni kakawaki kakoauaana ke onimakinana. Ma e ngae n anne, e rangi ni kakawaki n te Baibara ururingan are e aki tau tii onimakinan Iesu. Ni kaineti ma te Rikitinare ae Vine’s Expository Dictionary of Old and New Testament Words, te taeka ae e kamanenaaki iroun Ioane n te moan taetae e kaotaki iai bwa ko na “onimakinna ma tiaki n ae ko na tii kakoauaa.” E riai temanna n ataa ae bati riki ibukini kinaakin Iesu bwa te tia Kamaiu ngkana e na karekea akoana iroun te Atua. E riai naba te aomata ae onimaki ni kakorakoraa ma nanona ni koaua ni maiuakini baike e reiakin Iesu. Ngkana akea te mwakuri ao akea uaan taekinan ae iai te onimaki. E taekinaki n te Baibara ni kangai: ‘E mate te onimaki ngkana akea ana mwakuri.’ (Iakobo 2:26) N taeka riki tabeua, te bwai ae e kainnanoia te aomata ae onimaki boni kaotiotan onimakinan Iesu, ae nanona bwa e riai ni maiuakina ana koaua ao ana onimaki.

E kabwarabwaraa te reirei ae kakawaki n te aro aei Bauro: “E kairoroira ana tangira te Kristo, ibukina bwa aei ae ti a tia ni motikia, bwa e mate te aomata ae tii temanna [ae Iesu] ibukia aomata ni kabane. . . . Ao e mate ibukia ni kabaneia, bwa a aonga n aki manga maiu akana maiu i bon ibukia, ma a na maiu ibukin teuare mate ibukia, are e a tia ni kautaki.” (2 I-Korinto 5:14, 15) E riai ni kairira ara kakaitau ni koaua ibukin ana angakarea Iesu bwa ti na bitii maiura mani karaoan oin nanora ao ni maiu ibukin Iesu are e mate ibukira. E nanonaki n anne bwa ti riai ni moanibwaia kakaraoani baike e reiakin Iesu. A na bon rotaki baika a kakawaki iroura, ara motinnano ao bwaai ni kabane aika ti karaoi ni bitakini maiura. Tera kaniwangaia te koraki ake a kakoauaa ao ni kaotiota onimakinan Iesu?

“BA E AONGA N AKI BUA . . . MA E NA REKE IROUNA TE MAIU AE E AKI TOKI”

Ni kabanean Ioane 3:16, e taekinaki iai ana berita te Atua nakoia te koraki ake a kaotiota onimakinan te karea ni kaboomwi are e katauraoaki ao ni maiuakina ae boraoi ma ana kaetieti te Atua. E kantaningaiia te koraki ake a kakaonimaki te Atua bwa a na ‘aki bua ma a na karekea te maiu ae e aki toki.’ Ma a kakaokoro kantaninga ibukin te tai ae na roko ake a kariariaa aomata n tatabemania nako aika kakabwaiaaki man ana tangira te Atua.

E beritana te maiu ae aki toki i karawa Iesu nakoia kaain te kurubu teuana. E katereterea n tuangia taan rimwina aika kakaonimaki bwa e nang nako ni katauraoa aia tabo n te aro bwa a na kona n tautaeka ma ngaia n te mimitong. (Ioane 14:2, 3; I-Biribi 3:20, 21) “A na riki bwa ana ibonga te Atua ao te Kristo, ao a na tautaeka ma ngaia bwa ueea i nanon ririki ake tenga n ririki” te koraki ake a kautaki nakon te maiu i karawa.—Te Kaotioti 20:6.

E bon uarereke mwaitiia taan rimwini Kristo aika a na karekea te mwioko anne. Ni koauana, e taku Iesu: “Tai maaku ngkami ae te nanai ae uarereke, bwa e a tia ni kariaia Tamami bwa e na anganingkami te tautaeka n uea.” (Ruka 12:32) Tao e na iraman mwaitiia kaain “te nanai ae uarereke” anne? E taekinaki ae kangai n Te Kaotioti 14:1, 4: “I a nora te Tiibutetei [ae Iesu Kristo are e kautaki] ae tei i aon te Maunga ae Tion [i karawa], ao raona tebubua abwi ma aua tenga ae e koreaki arana ma aran Tamana i aon ramwaia. . . . A kabooaki naakai mai buakoia aomata, bwa moan uaa nakon te Atua ao nakon te Tiibutetei.” E kaainaki te nanai ae uarereke tii irouia te koraki aika 144,000, ngkana e kabotauaki ma aomata aika birion ma birion aika aki kona ni warekaki mwaitiia aika a na maiu n aki toki. A na tautaekania antai te koraki aika kabwarabwaraaki bwa ueea?

E taekina te kauoua ni kurubu aika kakaonimaki Iesu aika a na karekei kakabwaiaaia man te Tautaeka n Uea mai Karawa. E taku Iesu n aron ae noraki n Ioane 10:16: “Iai riki au tiibu tabemwaang, aika tiaki kaain te nne aei, ao e riai bwa N na kairiia naba, ao a na ongo bwanaau, ao a na riki bwa tii tenanaina, ao tii temanna te tia kawakintiibu.” A ingainga nanoia “tiibu” akanne nakon te maiu ae aki toki i aon te aonnaba are bon te kantaninga ibukin Atam ao Ewa n te moantai. Ti kanga n ataia bwa a na boni maiu i aon te aonnaba n te tai ae na roko?

N taai aika bati ao e taekinaki n te Baibara bwa e mena te Bwaretaiti i aon te aonnaba. Ko kona ni kakoauaa aei ngkana ko kauka am Baibara ao ni wareki kiibu aikai: Taian Areru 37:9-11; 46:8, 9; 72:7, 8, 16; Itaia 35:5, 6; 65:21-23; Mataio 5:5; Ioane 5:28, 29; Te Kaotioti 21:4. E taetae ni burabetinaki ni kiibu akanne tokini buaka, roongo, aoraki ao te mate. A taekina naba te tai are a nang kukurei iai aomata aika raoiroi ni katei oin aia auti, n ununiki n abaia ao ni kaikawaiia natiia n taabo aika rau.a E aki anaaki nanom n te kantaninga anne? Bon iai bukina ae raoiroi ngkai ti kakoauaa bwa e a kaan te tai ae a nang kakororaoaki iai berita akanne.

E A TIA NI KARAOI BAIKA RANGI NI BATI TE ATUA

Ngkana ko motirawa teutana n iangoi bwaai ni kabane ake e a tia ni karaoi te Atua ibukim ao botannaomata ni kabane, e teretere iai bwa e a kaman tia ni karaoi baika rangi ni bati. Ti anganaki maiura, wanawanara, marurungira ao baika a kakawaki ibukini boutokaani maiura. Ao ae kakawaki riki, bon ana bwaintangira te Atua ae te karea ni kaboomwi rinanon Iesu are e mate ibukira are e kona n nanonaki iai kakabwaia aika rangi bati riki, n aron ake ti reiakin n Ioane 3:16.

Ni koauana, e na boni kaukaki mataroan te kukurei ae akea tokina ao kakabwaia n te maiu are aki toki n te tabo ae rau ma ni kakukurei ao n akea iai karuanikain te aoraki, te buaka, te rongo ke te mate. E boto karekeani kakabwaia akanne boni mairoum. Te titiraki ngkanne ae e teimatoa ibukim e kangai: Tera ae ko tabe ni karaoia ibukin te Atua?