Arora ni Kaota te Tangira Nakoia Raora n Aomata

Ngkai ngaira kanoan te moani mwaane are Atam, bon tii te utuna ngaira. E ngae ngke a kantaningaaki kaain te utu teuana bwa a na tangiriia ao ni karineia i marenaia, ma e boni kangaanga noran te aeka n tangira anne ni boong aikai. Aei bon tiaki te bae e tangiria Atuara ae tatangira.

AE TAEKINAKI N TE KOROBOKI AE TABU IBUKIN TE TANGIRA

“Ko riai n tangira raom n aomata n aron tangiram i bon iroum.”​—NAKOAIA IBONGA 19:18

“Teimatoa n tangiriia aomata aika kairiribai nakoimi.”​—MATAIO 5:44.

AE NANONAKI N TANGIRAIA RAOM N AOMATA

Nora aron te Atua ni kabwarabwaraa te tangira n ana Taeka n 1 I-Korinto 13:4-7:

“E taotaonakinnano te tangira ao e akoi.”

Iangoa Aei: Tera am namakin ngkana a kaotiota te taotaonakinnano ao te akoi tabemwaang nakoim ao a aki waekoa n un ngkana ko kairua?

“E aki bakantang te tangira.”

Iangoa Aei: Tera am namakin ngkana iai aika a bon iaiangoiko naba bwa ko buakaka ke ni bakantang iroum?

“E aki ukera oini kabwaiana” te tangira.

Iangoa Aei: Tera am namakin ngkana a kani karinea am iango tabemwaang ao a aki kairoroko bwa ko na ira aia iango?

“E aki taua mwini karawawataana” te tangira.

Iangoa Aei: E kani kabwarai aia bure taani bure te Atua aika rairi nanoia. “E na aki ukera te kairua n taai nako, ao e na aki naba teimatoa n un.” (Taian Areru 103:9) Ti kakaitau ngkana e kabwaraa ara bure te aomata ae ti kaunna. Ngaia are ti riai naba n tauraoi ni kabwarai aia bure naake a kaunira.​—Taian Areru 86:5.

“E aki kimwareirei n te buakaka” te tangira.

Iangoa Aei: Ngkana iai te kangaanga ae riki nakoira, ti aki tangiria bwa a na kimwareirei tabemwaang n rawawatara. Ngaia are ti bon aki kimwareirei naba ngkana a rotaki n te kangaanga tabemwaang, e ngae naba ngkana a ribuaka nakoira.

Ngkana ti na kakabwaiaaki iroun te Atua, ti riai n tangiriia aomata n aki ongeia bwa antai ngaiia. Te anga teuana ae ti kona iai ni karaoa aei boni mani buokaia te koraki ake a kainnanoa te ibuobuoki.