KARAKI 42

Te Taongki Ae Taetae

KO A TIA n ongongo bwa e kona n taetae te taongki? Tao ko na kangai, ‘I tuai bwa a aki kona n taetae maan.’ Ma te Baibara e karakina taekan te taongki ae e taetae. Ti na noria bwa e kanga n riki aei.

E a uakaan ngkai aia tai n rin tibun Iteraera n te aba ae Kanaan. E maakuia Baraka are uean Moaba, ngaia are e a kananako wetean te aomata ae rabakau ae arana Baraam bwa e na kamaraiaia tibun Iteraera. E berita Baraka bwa e na angan Baraam te mwane ae bati, mangaia are e a toka i aon ana taongki Baraam bwa e na kawara Baraka.

E aki tangiria Iehova bwa a na kamaraiaaki ana aomata iroun Baraam. Ngaia are e a kanakoa te anera ma te kabaang ae abwabwaki wina bwa e na tei i nanon te kawai n tuka kawain Baraam. E aki nora te anera Baraam ma e noria ana taongki. Mangaia are e kataia te taongki n oki rikaaki mairoun te anera, ao n tokina e a wene i aon te kawai. E rangi n un Baraam iroun ana taongki, n te aro are e a oroia n te kai.

N te tai anne ao e a karaoa Baraam Iehova bwa e na kona n ongo te bwai are e taekinna ana taongki. E titiraki te taongki ni kangai: ‘Tera ae I karaoia nakoim ngkai ko a oreai?’

E taku Baraam; ‘Bwa ko kateinibabaai. Ngke arona bwa iai au kabaang ao I a bon tiringko naba!’

E kaeka te taongki ni kangai; ‘I a tia ni kaakaraoa aei nakoim mai mwaina?’

E kaeka Baraam ni kangai; ‘Ko tuai.’

Imwina ao e a kanoraabaa Baraam Iehova bwa e na kona n nora te anera are e tei i nanon te kawai ma ana kabaang. E taku te anera: ‘E aera ngkai ko orea am taongki? I roko bwa N na tuka kawaim, bwa ko aki riai ni kamaraiaia tibun Iteraera. Ngke arona bwa e aki tannako mairou am taongki ao I a tia n tiringko, ma N na aki kuaa am taongki.’

E taku Baraam: ‘I a tia ni bure bwa I aki ataia ae ko tei i nanon te kawai.’ E kainaaomataki iroun te anera, ao e a reita nako kawaina nakoni Baraka. E boni kataia naba Baraam ni kamaraiaa Iteraera, ma e kairaki iroun Iehova bwa e na kakabwaiaa Iteraera tentai.

Warekaia Iteraera 21:​21-35; 22:​1-40; 23:​1-30; 24:​1-25.