Buokiia Aomata Tabemwaang Bwa A Na Tau N Nakonakoia Ma Iehova
“Ti aki toki naba n tataro i bukimi, . . . ni butiia te Atua ba kam na . . . nakonako n te aro ae tau ma nanon te Uea ae e na karika te kukurei i Rouna ni bwaai ni kabane, ao kam aonga n uaa ni makuri nako aika raraoi.”—I-KOROTE 1:9, 10.
1, 2. Tera ae e kona n riki bwa nibwan te kimwareirei ao te rau n nano?
“TI MAEKA n te auti n rianna ae mena n te tabo n ununiki. Kioina ngkai ti a tia ni kauarerekea riki tabera ni maiura, ao e a bati riki ara tai iai ni kawariia aomata n angania te rongorongo ae raoiroi. Ti a rangi ni kakabwaiaki n anganaki te kakabwaia ae te kona ni buokiia aomata aika mwaiti bwa a na katabui maiuia nakon Iehova.”—Mairouia te taanga ni mare i Aberika Maiaki, aika minita ake a kabwanina aia tai iai.
2 Ko kakoauaa bwa buokakia aomata tabemwaang iroum e na karika te kimwareirei? Tabeman a kataia ni katoa tai n anga aia ibuobuoki nakoia aoraki, aomata aika kainnano, ke ake akea raoia—ao a namakina karekean te raunnano ma iai. Kristian ni koaua a bon ataia bwa tibwatibwakin te atatai ibukin Iehova ae te Atua ao Iesu Kristo nakoia aomata tabemwaang, bon te mwakuri n ibuobuoki ae te kabanea n raoiroi ae a kona ni karaoia. Bon tii te mwakuri aei ae e kona ni kairiia aomata bwa a na butimwaea ana karea ni kaboomwi Iesu, ni karekea aia iraorao ae raoiroi ma te Atua, ao ngkanne, ni kairiia nakon te maiu are aki toki.—Mwakuri 3:19-21; 13:48.
3. Te aeka n ibuobuoki raa ae e manena iangoana iroura?
3 Ma tera aron buokaia aomata ake a tabe ngkai ni beku iroun te Atua, ake a nakonako n “te Aro”? (Mwakuri 19:9) Akea te nanououa bwa ko rangi n tabeakinia, ma tao ko aki ataia raoi bwa tera riki te ibuobuoki ae ko kona ni karaoia nakoia. Ke tao n taraana, aroaroni maium e kauarerekea te ibuobuoki ae ko kona ni karaoia nakoia, ao ngkanne e na uarereke naba raun nanom ae e na reke mai iai. (Mwakuri 20:35) A bati reireiara ae ti kona ni karekei n itera aika uoua aikai man te boki ae I-Korote.
4. (a) Tera aron Bauro ngke e koro reta nakoia kaaini Korote? (b) Tera aron irekereken Ebabera iai?
4 Ngke te abotoro Bauro e kororeta nakoia Kristian ake i Korote, e mena i Rom, bwa e kainaki iai n akea inaaomatana n otinako man ana auti, ma e kona ni kakawaraki irouia aomata. N aron ae ko bon ataia, Bauro e kabongana inaaomatana teutana aei n tataekina rongorongon ana Tautaeka n Uea te Atua nakoia aomata. (Mwakuri 28:16-31) Raoraona ni Kristian a kona ni kawara Bauro, ao tao tabeman a a tia naba ni kainaki ma ngaia ngkoa. (I-Korote 1:7, 8; 4:10) Temanna iai bon te tia ua rongorongo ae e ingainga nanona ae Ebabera, ae e mena ni kaawan Korote are n aonon Berukia, ae n te aba ae aoraoi are i mainikun kaawan Ebeto n Atia Minor (are te aba ae Turkey ngkai). Ebabera e buoka katean te ekaretia i Korote, ao e bebeku irouia ekaretia ake a uakaan ake i Raorikeia ao Ierabori. (I-Korote 4:12, 13) Bukin tera ngke e mwananga Ebabera ni kawara Bauro i Rom, ao tera reireiara man aron butimwaeana iroun Bauro?
Te Ibuobuoki ae Manena Ibukia Kaaini Korote
5. Bukin tera Bauro bwa e korea ae e koreia nakoia kaaini Korote?
5 E karaoa te mwananga ae e rangi ni kangaanga Ebabera nako Rom, bwa e aonga ni maroro ikekei ma Bauro ibukin bwaai tabeua ake a riki n te ekaretia are i Korote. E ribootina aron te onimaki, te tangira, ao aia kekeiaki Kristian akekei ni kakiritiania aomata. (I-Korote 1:4-8) Ma e ngae n anne, e bae naba ni kaota tabeaiangana ibukin bwaai aika aki raoiroi ake a kona n roota buaka tangiran bwaai n taamnei irouia kaaini Korote. E kaeka Bauro ni korea te reta ae kairaki iroun te taamnei, ae kaetii iango aika kairua tabeua ake a kabutaki irouia taan reirei ni kewe. E katuua riki taekan kakannaton ana mwakuri Iesu Kristo.a Te koaua bwa te ibuobuoki n te aro aei e tii kamataatai koaua tabeua man te Baibara aika kakawaki riki? Tera riki te ibuobuoki ae e kona ni karaoia nakoia kaaini Korote, ao baikara reireiara ae ti kona ni karekei mai iai ni kaineti ma buokaia aomata tabemwaang?
6. Tera are e katuua riki taekana Bauro n ana reta nakoia kaaini Korote?
6 Ni moan mwakoron ana reta Bauro, e kaota iai te aeka n ibuobuoki teuana ae tao ti kona ni kai mwaninga taekan karaoana. Bon te aro n ibuobuoki ae manena ae e kona ni karaoaki mai kiraroa, kioina ngkai Bauro ma Ebabera a raroa nako mai Korote. E kangai Bauro: “Ti katituaraoa te Atua ae Taman ara Uea are Iesu Kristo, n aki toki n tataro i bukimi.” Eng, aia tataro aikai a kaineti raoi ma kainnanoia Kristian ake i Korote. E manga reitia ni kangai Bauro: “Ma ngaia ae ti aki toki naba n tataro i bukimi, man te bong are ti moa n ongo taekana, ao ti aki toki ni butiia te Atua ba kam na kaonaki n atakin nanona n te rabakau n tamnei ma te ataibwai ni kabanea.”—I-Korote 1:3, 9.
7, 8. Baikara bwai ake a aki toki n atongaki n oin ara tataro ao tataro ake a karaoaki n te ekaretia?
7 Ti ataia bwa Iehova bon te tia “ongo tataro,” mangaia are ti kona n onimakinna bwa e tauraoi n ongora ara tataro ake ti tabeki nakoina, aika a boraoi ma nanona. (Taian Areru 65:2; 86:6; Taeka N Rabakau 15:8, 29; 1 Ioane 5:14) Ma e na kanga ngkanne aron ara tataro ngkana ti na mwanewea taekaia aomata tabemwaang?
8 Tao ti aki toki n iangoa ma n tataroakina taekaia ‘tari ni kabane ake i aon te aonnaba.’ (1 Betero 5:9) Ke ti kona ni kawara Iehova n tataro ibukia Kristian ao aomata tabemwaang riki ake tao a mena n te aono teuana ae taonaki n te kabuanibwai. Ngke taan rimwin Kristo n te moan tienture a ongo taekan te rongo i Iutaia, ao a boni bae ni kabatiaa moa aia tataro ibukia tariia ake a mena iai imwain ae a kanakoa aia bwaintangira nakoia. (Mwakuri 11:27-30) Ni bobotaki ni Kristian ni boong aikai, a aki toki n ongoraeaki tataro ibukin te botaki n itaritari ae bwanin. Tataro aikai a riai ni mataata bwa a aonga ni kona n ota iai aomata aika a ongora, ma ni kangai iai “Amene.”—1 I-Korinto 14:16.
Kaineta Raoi Am Tataro Nakon are Kainnanoaki
9, 10. (a) Baikara katoto aika a kaotia bwa e riai te tataro n atonga araia aomata aika ti tataro ibukia? (b) Baikara tataro ake e mwaneweaki iai taekan Bauro?
9 Te Baibara e anganira katoto tabeua ibukin te tataro ake a tabekaki ibukia aomata tabemwaang ni kaineti ma kainnanoia. Iangoa ana taeka Iesu ae koreaki n Ruka 22:31, 32. E otabwaniniaki irouia abotoro aika kakaonimaki aika 11 mwaitiia. A bane ni kainnanoa ana ibuobuoki te Atua n taai ni kangaanga aika a mena imwaia aikai, ma e tataro ibukiia Iesu. (Ioane 17:9-14) Ma e ngae n anne, Iesu e kotea Betero, ao e karaoa te tataro ae e kaineti nakoina ngkai te tia rimwina ngaia. Katoto tabeua riki: Eritai e tataro bwa te Atua e na buoka te mwaane temanna, ae ana toro. (2 Uea 6:15-17) Te abotoro Ioane e bubutii bwa e na teimatoa ni marurung Kaio n te itera n rabwata ao n te itera n taamnei. (3 Ioane 1, 2) Tataro tabeua riki a kaonoti nakoia koraki tabeua ake a uarereke mwaitiia.—Iobi 42:7, 8; Ruka 6:28; Mwakuri 7:60; 1 Timoteo 2:1, 2.
10 Ana reta Bauro a katereterea aron tataro aika a onoti raoi nakon ae e kainnanoaki. E bubutii bwa e na tataro te aba ibukina, ke a na tataro ibukina ao raoraona. E kangai I-Korote 4:2, 3: “Kam na botumwaka n tataro, ao kam na kamarurungingkami iai ni katituaraoi; ao kam na tataro naba i bukira, ba E na kauka te mataroa te Atua i bukin te taeka ba ti aonga n taekina te baere raba are ana bwai Kristo, are I kabaeaki naba ibukina ngkai.” Iangoi naba katoto aika uoua aikai: I-Rom 15:30; 1 I-Tetaronike 5:25; 2 I-Tetaronike 3:1; Ebera 13:18.
11. Ngke e mena i Rom, e tataro ibukia antai Ebabera?
11 Boni ngaia naba ae e taekinaki irouia raoraon Bauro ake a mena i Rom. “E kan inga nako imi Ebabera, ae raomi, . . . ae aki totoki ni kakorakora i bukimi n ana tataro.” (I-Korote 4:12) Te taeka ae rairaki bwa “kakorakora” e kona n nanona te “kekeiaki mwaaka” n aron are e na karaoia te tia takaakaro ae e irira te kauaba rimoa. E tii kakorakoraa n tataro Ebabera ibukin te botaki n onimaki ae katobibia te aonnaba ke ibukia naba taan taromauri n te aono ae Atia Minor? Bauro e kaotia bwa Ebabera e kaonota ana tataro tii ibukia kaaini Korote. E ataa aroia Ebabera. Ti aki ataa araia ni kabaneia, ao ti aki naba ataa aia kangaanga ake a kaitara ma ngaai, ma ti na tii iangoi bwaai tabeua ake tao a itiuia. Tao te roronga ae Rino e a tabe ni buakan rootakina n aia koaua aomata ae taabangaki n te tai anne, ao tao Rubo e kainnanoa buokana ibukin kataakina ae e na manga okira aroarona mai imwaina ngke e mena n te Aro n Iutaia. Kioina ngkai bun Nei Bereti bon tiaki kaain te onimaki, tao e kainnanoa te wanawana ao te nanomwaaka ibukin kaikawaaia natina inanon te Uea, ao tao e kainnanoaki naba kabebetean riki nanon Atungkiro kioina ngkai iai aorakina ae kamamate? Eng, Ebabera e kinaia kaain ana ekaretia, ao e kakorakora n tataro ibukiia, ibukina bwa ngaia ma Bauro a uaia n tangiriia aomata aikai bwa a na teimatoa n tau n nakonakoia ma Iehova.
12. Ti na kanga ni kaonota riki ara tataro nakon ae kainnanoaki?
12 Iai te katoto ibukira ae ko noria—ae te anga ae ti kona iai ni buokia aomata tabemwaang? N aron ae e a tia n taekinaki, a rababanako bwaai aika a taekinaki inanon tataro ake a tabekaki ni botaki ni Kristian, ibukina bwa a kakaokoro nako aika a ongora iai. Ma ara tataro ake ti karaoi ibon iroura ao n ara utu a kona n onoti raoi. E ngae ngkai ti kona ni butiia te Atua bwa e na kairiia ma ni kakabwaiaia mataniwi aika mwamwananga ni kabaneia ke taani kawakina te nanai, ma tiaki te koaua bwa n taai tabetai ti kona ni kaonota riki ara tataro? N aron anne, bukin tera ngkai ko aki mwanewea aran te mataniwi ibukin te aono ae uarereke ae kawara am ekaretia, ke te tia kaira te Reirei n te Boki n te Ekaretia n am kurubu ae ko kaea? E oti n I-Biribi 2:25-28 ao 1 Timoteo 5:23, bwa Bauro e tabeakina marurungia Timoteo ao Ebaberorito. N aron anne, ti kona naba ni kaota tabeakinaia aoraki ake ti kinaia n te aro aei?
13. Baikara bwaai aika a riai ake ti kona ni mwanewea n ara tataro?
13 Te koaua bwa ti riai n rawa n tabarea aia bwai aomata, ma e riai ngkana ti tataro ni kaota te nano ni koaua ni kan tabeakinia raoi aomata ake ti kinaia ma n tangiriia. (1 Timoteo 5:13; 1 Betero 4:15) Tao e na kamotirawaki man ana mwakuri te tari temanna, ma e koaua bwa ti aki kona ni manga kamwakuria. Ma e ngae n anne, ti kona ni mwanewea arana ao taekan ana kangaanga n ara tataro are ti boni karaoia iroura. (Taian Areru 37:25; Taeka N Rabakau 10:3) Ti boni kinaa te tari-te-aine ae e a ikawai ngkai ao akea buuna ao natina, ibukina bwa e nanomatoa ni kani mare “ti i nanon te Uea”? (1 I-Korinto 7:39) N am tataro ake ko karaoi ibon iroun, bukin tera bwa ko aki butiia Iehova bwa e na kakabwaia neiei ma ni buokia bwa e na teimatoa ni kakaonimaki n ana beku? Ao n te katoto teuana, tao unimwaane ake uoman a a tia n anga te reirei nakon te tari temanna ae e bure. Tera ngke taari aikai a uaia ni mwanewea taekan taria anne n taai tabetai ngkana a tataro ibon irouia?
14. Tera irekereken tataro aika kaonoti ma ae kainnanoaki, ma buokaia aomata tabemwaang?
14 A rangi ni mwaiti aomata ake ko kona ni karina taekaia ibuakon am tataro ake ko karaoi ibon iroum, aika aomata aika a kainnanoa mairoun Iehova te ibuobuoki, kabebetean nanoia, te wanawana, ao te taamnei ae raoiroi ke uaana. Ibukin raroam ma ngaiia ke kangaanga tabeua riki, ko kona n taku bwa e uarereke am ibuobuoki ao ko kona ni karaoia nakoia n te itera n rabwata. Ma tai mwaninga n tataro ibukia tarim n onimaki aika mwaane ao aine. Ko ataia bwa a kan teimatoa n tau n nakonakoia ma Iehova, ma tao a rangi ni kainnanoa te ibuobuoki bwa a aonga ni karaoa anne. Kiingin karekean te ibuobuoki aei nakoia bon rinanon am tataro.—Taian Areru 18:2; 20:1, 2; 34:15; 46:1; 121:1-3.
Mwakuri ni Kakorakoraia Riki Aomata Tabemwaang
15. Bukin tera ngkai ti riai ni mutiakina ae taekinaki ni kabanea ni mwakoron te boki ae I-Korote?
15 Te kakorakora n tabeki tataro aika onoti, bon tiaki tii ngaia te anga ibukin karekean buokaia aomata tabemwaang, ao e moamoa riki iai aomata ake ko a kaan ma ngaia ao a tatangiraki iroum. E kateretereaki naba anne n te boki ae I-Korote. A mwaiti taan rabakau ake a kakoaua bwa ngke e a tia n anga reirei i aon te koaua Bauro ao e taekin naba reirei n ibuobuoki, e a tii kanima naba ana taeka ni kamauri ao ana inga tabeua iai. (I-Korote 4:7-18) Ma e ngae n anne, ti a tia n noria bwa kabanean mwakoron te boki aei e taekin reirei aika rangi ni bongana, ao e bati riki reireiara ae e kona n reke man te mwakoro aei.
16, 17. Tera ae ti kona n taekinna ibukia taari ake a taekinaki n I-Korote 4:10, 11?
16 E korea ae kangai Bauro: “E kan inga nako imi Aritetareko ae raou ni kabaeaki, ma Mareko, ae ana bu Barenaba (are kam anganaki tuua ngkoa aika taekana; ngkana e roko i roumi, ao kam na mwaneia n akoia), ao e kan inga nako imi Ietou, are arana teuana Iouteto. Bon aikai kaain te korotobibi: bon ti uakai raou ni makuri i bukin uean te Atua, aika taani kabebetea nanou.”—I-Korote 4:10, 11.
17 Bauro e taekin taari tabeman iai ake e riai ni mutiakinaki aia mwakuri. E taku bwa bon kaain te korotobibi nakai, are nanona bwa boni kaain Iutaia ngaia. A mwaiti I-Iutaia ake a korotobibiaki ake a mena i Rom, ao tabeman a a tia n riki ni Kristian ngkai. E ngae n anne, ma aomata ake e taekin Bauro, bon aomata ake a a tia ni buoka Bauro. Tao a aki kerikaki man te iraorao ma Kristian ake tiaki kaain Iutaia, ao a kukurei n airi ma Bauro n tataekinan te rongorongo nakoia aomata aika tiaki I-Iutaia.—I-Rom 11:13; I-Karatia 1:16; 2:11-14.
18. E a kanga Bauro ni kamoamoaia aomata tabeman ake a mena ma ngaia?
18 Taraa ana taeka Bauro aei: “Uakai [bon] raou ni makuri . . . aika taani kabebetea nanou.” (Ara bwai man reireiti.) E kabongana iai te taeka n Erene ae tii teuana kabonganana n te Baibara. A mwaiti taan rairai aika a raira te taeka aei bwa “kabebetea.” Ma iai riki te taeka n Erene teuana ae (pa·ra·ka·le’o) ae rairaki riki bwa “kabebetea.” Bauro e kabongana te taeka aei n kiibu tabeua n ana reta aei, ma e aki kabongana te taeka aei n I-Korote 4:11.—Mataio 5:4; Mwakuri 4:36; 9:31; 2 I-Korinto 1:4; I-Korote 2:2; 4:8.
19, 20. (a) Tera nanon te kibu n taeka ae mwaneweaki iroun Bauro ni kaineti ma taari ake a buokia i Rom? (b) Baikara aaro tabeua ake tao taari akekei a buoka Bauro iai?
19 Akana a atongaki araia iroun Bauro a karaoa ae bati riki nakon ae tii kabebetean nanon Bauro n aia taeka. Te taeka n Erene ae rairaki “taani kabebetea nanou” ae kabonganaki n I-Korote 4:11, e a kabonganaki ni booki tabeua n taekina te bwainaoraki ae buoka rawawatan te aomata. E kangai te Baibara ae te New Life Version: “Ai bati ra buokau irouia!” Te Baibara ae te Today’s English Version e kabongana te kibu n taeka aei: “A rangi ni bati ni buokai.” Tao tera aia ibuobuoki nakon Bauro taari aika Kristian aikai aika a uakaan ma ngaia?
20 E kona ni kawaraki Bauro irouia aomata, ma a mwaiti bwaai ake e aki kona ni karaoi, n aron kabooan bwaai ake e kainnanoi—n aron kanana ao kunnikaina ibukin tain te maitorotoro. E na kanga ni karekea ana nira ni boki ae e na ukeuke n reirei mai iai ke ni kaboo ana bwai ibukin ana kororeta? (2 Timoteo 4:13) Tiaki te koaua bwa ko kona n iangoa aroia taari aikai bwa a buoka Bauro ni kainnanona, ma ni karaoi bwaai aika uarereke n aron te boobwai, ke bwaai tabeua riki ibukina? Tao e na tangiria n ataa taekan te ekaretia teuana, ma ni kaungai riki nanoia kaaina. E aki kona ni karaoi bwaai aikai ibon irouna, ibukina bwa e kainaki, mangaia are tao taari aikai a kawaria aomata ibukin Bauro, n uota ana rongorongo nakoia ao ni manga kaoka rongorongoia nakon Bauro. Ai korakorara nanon Bauro iai!
21, 22. (a) Bukin tera ngkai ti riai ni mutiakin taekan ake a koreaki n I-Korote 4:11? (b) Baikara aaro tabeua ake ti kona ni katotonga aia katoto taari ake a mena ma Bauro?
21 Taeka ake e korei Bauro ibukia “taani kabebetea” nanona, a kaota nakoira arora ae ti kona ni buokia aomata tabemwaang iai. Tao a tau n nakonakoia ma Iehova ni kaineti ma ana kaetieti ibukin te aroaro ni maiu ae riai, ni kaean bobotaki ni Kristian, ao ni buobuokan te mwakuri n tataekina te rongorongo. A riai iai ni kamoamoaki taekaia iroura. Ma ti kona riki ngaira ni karaoa ae bati riki, ma n riki bwa ‘taani kabebetei naano’ n aron are a karaoia taari akekei nakon Bauro?
22 Ngkana ko kinaa te tari-te-aine temanna ae e wanawana bwa e ira nanon te reirei man 1 I-Korinto 7:37, ma akea ngkai ana utu ae uakaan ma ngaia, ao ko kona naba ni weteia n taai tabetai ngkana a karaoi bwaai tabeua am utu, n aron kaoakina bwa e na amwarake ma ngkami, ke n roko n ami botaki ae uarereke n ikotaki ma raoraom tabeman ke bon am koraki? Tera ngke ko kaunga nanona bwa e na mwananga ma am utu ni kaea te bwabwaro ke n ami tai n nako n te tabo ni motirawa? Ke kaoia bwa e na airi ma ngkoe ngkana ko nako ni boobwai. E kona naba ni karaoaki anne nakoia aine ao mwaane ake a a tia ni mate buia, ke te koraki aika akea baoia. Tao ko na kunea iai bwa e rangi ni kakukurei ongoraeakinan aia rongorongo, ke e bati reireiam mairouia ni bwaai ake a kakaraoaki ni katoa bong n aron rinean uaan ni kai aika raraoi, ke rinean kunnikai ibukia ataei, aika tau. (Nakoaia Ibonga 19:32; Taeka N Rabakau 16:31) Tao e kona n reke mai iai te kabwaia ae te iraorao ae kaan riki imarenami. A kona n namakina bwa a aki maamaa ni bubutiko bwa ko na buokia ngkana tao a kainnanoa te bwainaoraki man te oo-n-aoraki, ke bwaai n aron anne. Taari ake a mena ma Bauro i Rom a bae n angana te ibuobuoki ae manena ma ni kaunga nano, n aron naba te ibuobuoki ae ko kona ni karaoia ngkai. Ngkekei ao ngkai naba, e a reke te kabwaia ae kakorakoran riki te itangitangiri ao te nanomatoa ni kan uaia ni kakaonimaki ni beku iroun Iehova.
23. Tera ae e na raoiroi ae ti na kabanea ara tai iai ni karaoia?
23 Ngaira ni kabaneira, ti kona n iangoi katoto aika a taekinaki n te kaongora aei. Aikai bon tii katoto tabeua, ma a kona ni kauringira taekan taai aika ti kona ni kabongana ni kabatiaa arora iai ni ‘kabebetei nanoia’ tarira n onimaki, aika mwaane ao aine. Tiaki nanon aei bwa ti na riki bwa taani buokia aomata n te itera n rabwata n tii ngaia. Tiaki anne nanoia taari ake e taekinaki n I-Korote 4:10, 11. Bwa a atongaki bwa “raou ni makuri i bukin uean te Atua.” Te ibuobuoki ae a karaoia e a reitaki riki ma anne. Ko bia mwakuri naba n aron anne.
24. Tera oin bukina ae ti tataro ibukia aomata tabemwaang ma ni kataia ni buokia?
24 Aio bukina ae ti mwanewea araia aomata tabeman n ara tataro ake ti karaoia ibon iroura, ma ni kataia ni kakorakoraia: Ti kakoaua bwa tarira n onimaki aika mwaane ao aine a tangiria n “nakonako n te aro ae tau ma nanon te Uea ae e na karika te kukurei i Rouna ni bwaai ni kabane.” (I-Korote 1:10) Te koaua aei e reitaki riki ma te bwai teuana are e taekinna Bauro ngke e korea taekan ana tataro Ebabera ibukia kaaini Korote, “ba [a] aonga n tei ni moa n raoiroi ma ni kareke raoi [nanoia], n nanon te Atua ni kabanea.” (I-Korote 4:12) Ti na kanga ngaira ni kona ni karaoa anne? Ti na noria.
[Kabwarabwara ae nano]
a Nora te Insight on the Scriptures, Volume 1, iteraniba 490-1, ao “All Scripture Is Inspired of God and Beneficial,” iteraniba 226-8, are e boretiaki iroun te Watchtower Bible and Tract Society of New York, Inc.
Ko Nori Reirei Aikai?
• A na kanga ni kona ni manena riki ara tataro ae ti karaoi ibon iroura, ni kaineti ma buokaia aomata tabemwaang?
• N te aro raa ae Kristian tabeman a riki bwa ‘taani kabebetea nanon’ Bauro?
• N ningai taai tabeua ike ti kona iai n riki bwa ‘taani kabebetei naano’?
• Tera tiara ae ti uaiakina ngkana ti tataro ibukia tarira n onimaki aika mwaane ao aine, ma ni kataia ni kabebetei nanoia?
[Taamnei n iteraniba 26]
Ko kona ni kaoa te Kristian temanna bwa e na airi ma am utu ngkana kam kaki botumi?
[Te Kabwarabwaraan te Taamnei]
Courtesy of Green Chimney’s Farm