Titiraki Mairouia Taani Wareware
Kioina ngkai e kukurei Iehova ni kabwarai buure ibukin te karea ni kaboomwi, bukin tera bwa Kristian a riai naba ni kaota aia bure nakoia unimwaanen te ekaretia?
N aron are e kateretereaki n taekaia Tawita ma Nei Bateteba, Iehova e kabwara ana bure Tawita ae rangi n rawawata, ibukina bwa e kaota te raraoma ni koaua Tawita. E boni kaota ana bure Tawita ngke e kawaraki iroun te burabeti are Natan, ni kangai: “I bure nakon Iehova.”—2 Tamuera 12:13.
Ma Iehova e aki tii butimwaea ke ni kabwara ana bure te tia bure are e kaota ana bure ma nanona ni koaua, ma E katauraoa naba te ibuobuoki n tangira ae e na buoka kaokan te tia bure nakon te marurung raoi n te itera n taamnei. Ni kaineti ma Tawita, te ibuobuoki aei e a reke mairoun te burabeti are Natan. Ni boong aikai n te ekaretia ni Kristian, bon iai unimwaane aika a ikawai n te itera n taamnei. E kabwarabwaraa ni kangai te tia rimwin Kristo ae Iakobo: “E aoraki temanna [n te itera n taamnei] i buakomi? E na weteia unimwanen te ekaretia; ao a na tataro i aona, ao a na kabiria n te bwa n aran te Uea: ao ane e na kamaiua te aoraki te tataro n onimaki, ao te Uea E na manga kateirakea; ao ngkana iai ana bure aika e karaoi ngkoa, ao a na kabaraki mai rouna.”—Iakobo 5:14, 15.
Unimwaane aika rabakau a kona ni karaoa te ibuobuoki ae bati ibukin kabebetean nanon te tia raraoma ni koaua ae e namakina te maraki ibukin te kairua are e karaoia. A kekeiaki mwaaka ni kataia ni katotonga aroaron Iehova n aroaroia ake a karaoi nakon te tia bure. A aki kani karaoa te aro ae e riao matoatoana, e ngae ngkana e tangiraki te reirei ae matoatoa. Ma a nanoanga n iangoi bwaai aika a boni kainnanoaki iroun te aomata. A taotaon nanoia ngkana a kataia ni kaeta ana iango te tia bure, rinanon kabonganan ana Taeka te Atua. (I-Karatia 6:1) E ngae ngkana te aomata temanna e bon aki rimoa ni kaota ana bure, ma e na boni kona naba ni kairaki nakon te raraoma ni koaua ngkana e kawaraki irouia unimwaane, n aron are e riki iroun Tawita ngke e kawaraki iroun Natan. Te ibuobuoki are e karaoaki irouia unimwaane e buoka te tia bure bwa e na aki manga karaoa te bure, ma n rotaki ni kangaanga aika kakaiaki aika a na reke irouna ngkana e riki bwa te tia kakaraoa te bure.—Ebera 10:26-31.
E bon aki bebete kaotiotan mwakuri aika kamaamaa nakoia aomata tabeman, ao manga kakaaean kabwaran am bure. E kainnanoa te nano korakora. Ma iangoa ae e kona n riki ngkana e aki karaoaki anne. E kangai ana taeka te mwaane temanna ae e aki kaota ana bure ae rawawata nakoia unimwaanen ana ekaretia: “I namakina te maraki i nanou ae e bon aki kona n toki. I a kabatiaa riki au tai n ira tataekinan te rongorongo, ma e bon teimatoa naba n titiku irou te namakin ae kananokawaki aei.” E taku irouna bwa e a tau naba ngkana e kaota ana bure nakon te Atua n te tataro, ma n etina, e bon aki tau, bwa e a namakina ae ai aron are e namakinna naba te Uea are Tawita. (Taian Areru 51:8, 11) Ai raoiroi ra riki butimwaean te ibuobuoki n tangira are e katauraoia Iehova rinanoia unimwaane!