Tera Ae E Tangiria Iehova Mairoura?
“Tera ae E ukoukoria Iehova mai roum, ba ti te karaoa ae eti, ma te tangira te nanoanga, ma te nako n nanorinano ma Atuam?”—MIKA 6:8.
1, 2. Bukin tera ngkai a kona ni bwara nanoia ana toro Iehova tabeman, ma tera ae kakoauaki bwa e na kona ni buokiia?
BON te Kristian ae kakaonimaki Nei Vera, ae 75 ana ririki ni maiu, ma iai aorakina. E taku Neiei: “N taai tabetai, I taratara nako man au kamaama ao I noriia mwaneu ma tariu ni Kristian bwa a tataekina te rongorongo man te auti teuana nakon teuana. E taonai te tang kioina ngkai I kan airi ma ngaiia, ma e a kauarerekea au beku nakon Iehova aorakiu aei.”
2 Ko a tia n namakina naba aei? Te koaua, bwa aomata ni kabane aika tangira Iehova, a kan nakonako n arana ao ni karaoi bwaai aika tangiraki irouna. Ma tera arora ngkana e a kerikaki marurungira, ti a kara, ke iai tabera n ara utu? Tao a kona ni bwara nanora ibukina bwa a kona aaro aikai n tuuka ingaingara ni kani beku iroun te Atua. Ngkana ngaia aei, ao e kakoauaki bwa e rangi ni kaunganano iaiangoan are e taekinaki ni Mika mwakorona 6 ao 7. E kaotaki ni mwakoro aikai bwa a aki kona n riaon ara konabwai bwaai aika e tangiri Iehova mairoura ao a boni kai karaoaki naba.
Aroaron te Atua Nakoia Ana Aomata
3. Tera aroaron Iehova nakoia tibun Iteraera ake a karitei?
3 Ti na rinanon moa Mika 6:3-5 (NW) ao n noria bwa tera aron Iehova nakoia ana aomata. Uringnga bwa a rangi ni karitei tibun Iteraera n ana tai Mika. Ma e ngae n anne, ao e bon nanoangaiia naba Iehova ao e kataetaeia ni kangai: “Au botannaomata.” E a manga butiia ni kangai: “Au botannaomata, uringa.” E aki tiribureia moa n te aro ae ribuaka, ma e kataia n riing nanoia n titirakinia bwa “tera ae I a tia ni karaoia nako im?” E boni kaungaia naba bwa a na “kaota” arona.
4. Tera aron rotakira n ana katoto te Atua ni kaotiota te nanoanga?
4 Ai tikiraoi ra te katoto ae e a tia ni katauraoia te Atua ibukira ni kabane! E nanoangaia ao e arania kaain Iteraera ma Iuta ake a karitei nakoina n ana bong Mika bwa “au botannaomata,” ao e boni bubutiia naba. Mangaia are ti riai ni kaotiota naba te nanoanga ao te akoi n aroarora nakoia kaain te ekaretia. Te koaua bwa e kangaanga karekean nakoraoira ma tabeman, ke tao ibukina bwa a mamaara ni bwaai n taamnei. Ma e ngae n anne, ti na boni kani buokiia ao ni kaotiota naba nanoangakia, ngkana iai tangiran Iehova irouia.
5. Tera te reirei ae kakawaki ae kaotaki ni Mika 6:6, 7?
5 Imwin anne, ti na manga rinanon Mika 6:6, 7. A a mwaiti ana titiraki Mika aika kangai: “N na roko i matan Iehova ma baika ra, ma ni katorobubua i matan te Atua ae rietata? N na roko i matana ma karea ni kabuokaki, ma kao ataei aika tatabeua aia ririki? E na kukurei Iehova n tiibu-mwaane aika ngaa, ke ni karanga ni bwa aika reebu? N na anga au karimoa i bukin au bure, ao uaan rabatau i bukin ana buakaka tamneiu?” Tiaki ngaia anne, e aki kona ni kakukureiaki Iehova n “tiibu-mwaane aika ngaa, ke ni karanga ni bwa aika reebu.” Ma bon iai te bwai ae e na kukurei iai. Ao tera?
Ti Riai ni Kaeti Taeka n te Aro ae Riai
6. Baikara aroaro aika tenua aika e tangiria te Atua bwa ti na riai ni karekei, aika a a tia ni katauraoaki ni Mika 6:8?
6 Ni Mika 6:8, ti reiakina iai te bwai ae tangiria Iehova mairoura. E titiraki ni kangai Mika: “Tera ae E ukoukoria Iehova mai roum, ba ti te karaoa ae eti, ma te tangira te nanoanga ma te nako n nanorinano ma Atuam?” Iai reitakin bwaai aika tenua aika riai n reke iroura aikai, ma aron ara namakin, ara iango ao ara mwakuri. E riai n reke iroura namakinan kani kaotiotan aroaro aikai, n iangoi arora bwa ti na kanga ni kaotiotii, ao ni maiuakini. Ti na rinanon teuana imwin teuana ni bwaai aika tenua aikai.
7, 8. (a) Tera nanon te taeka ae “te karaoa ae eti”? (b) Baikara aaro n ribuaka ake a taabangaki karaoaia n ana bong Mika?
7 “Te karaoa ae eti” e nanonaki iai bwa ti na kaeti taeka n te aro ae riai. E aanaki ana mwakuri nako te Atua n te kaetitaeka ae riai. Ma e ngae n anne, ao te roro ngkoa are n ana tai Mika, a aki kaeti taeka n te aro ae riai, ma a kaakaraoa ae ribuaka. N aaro raa? Iangoa ane e taekinaki ni Mika 6:10. E kabwarabwaraki ni kabanean te kibu anne taekaia taani bitineti aika kamanenaa “te bwai ni baire ae aki koro raoi ae riai ni bati n ribaki” ae rangi n uarereke. E taekinaki naba n te kibu 11 bwa a kamanenai “atibu n tauu rawawata aika mamana te aba.” Ao ni kaineti ma ae taekinaki n te kibu 12, a “mamana te aba neweia.” Mangaia are e taabangaki kamanenan bwaai ni baire, bwaai n tau rawawata, ao taetae nikawai aika bubuaka n te waaki ni bitineti n te aonnaba, n ana bong Mika.
8 A aki tii noraki mwakuri aika a aki-riai aikai n taabo ni mwakete. A bati n nonoraki naba n te tabo ni kaboowi. E taekinaki ni Mika 7:3 bwa “e bubuti te toka, ao e tae nangin te tia motiki-taeka ni kani karekea boon ana makuri.” A anganaki taani moti bwaai ni kamaraato bwa a aonga n anaaki nanoia iai bwa a na katuuaeia aomata aika raoiroi n te aro ae aki-riai. E uataboaki te mwakuri ni kakeru aei iroun “te aomata ae kakanato,” ke te aomata ae bwakuaku n te kaawa anne. Ni koauana, e taekinna Mika bwa bon “anne aroia” tooka, taani motikitaeka, ao te aomata ae kakannato, ke a kona naba ni karaoi babaire ibukin waakinan mwakuri aika bubuaka aikai.
9. Tera aron rotakia kaain Iuta ao Iteraera n ribuakan te kaetitaeka are e kaakaraoaki irouia aomata aika bubuaka?
9 A rotaki buaka kaain Iuta ao Iteraera ni kabane n taiani mwakuri n ribuaka ake a kaakaraoaki irouia mataniwi aika bubuaka. E taekinaki ni Mika 7:5 bwa kioina ngkai akea te kaetitaeka ae riai, e kona ngkanne ni karika te nanououa i marenaia aomata aika iraorao, aomata aika iraorao-ni-karaba, ao ai uana naba ma raao ni mare. Ibukin aei, ao e taekinaki n te kibu 6 bwa e korakora te riribai i marenaia kaain utu aika rangi ni kaan, n aroia naati mwaane ma tamaia, ao naati aine ma tinaia.
10. A na kanga Kristian ni kaeti aroaroia i buakon te aroaro n ribuaka ni boong aikai?
10 Ma tera arora ni boong aikai? Te koaua bwa ti aki nori aeka n aroaro aikai? N aron are e riki nakon Mika, ti a otabwaniniaki ngkai n te kaetitaeka ae ribuaka, akean onimakinaia aomata, akean te itoman ae raoiroi i marenaia aomata nako ao i nanon te utu naba. Ma e ngae n anne, ngkai bon ana toro te Atua ngaira aika ti maeka n te aonnaba ae buakaka, ti bon aki tangiria bwa e na rin i nanon te ekaretia ni Kristian iango n aonnaba aika bubuaka aikai. Ma ti na kakorakoraira ni kakairi n reirei aika kakawaki ibukini kateimatoara ni kakaonimaki ni maiuakini aaro aikai n te bong teuana ma teuana. Te koaua, bwa ti “kakaraoa ae raoiroi nakoni bwaai ni kabane.” (Ebera 13:18) Ko aki kakoauaa ngkanne ae man kaakaraoan te kaetitaeka ae riai, e na kona ni karekei nakoira kakabwaia aika mwaiti aika reke man te botaki n itaritari ae kaotiota te onimaki ni koaua?
A Kanga Aomata n Ongo “Bwanan Iehova”?
11. E a kanga n tabe ni kakoroaki bukin are e taekinaki ni Mika 7:12?
11 E taetae ni burabetinna Mika bwa e ngae ngke e korakora te babaire buaka n taai aikai, ma e na bon roko te tai are a nangi bane iai aomata aika kakaokoro nako ni maeka i aan te kaetitaeka ae raoiroi. E taetae ni burabetinna naba te burabeti aei, bwa a na ikotaki aomata aika a nang riki bwa taan taromauria Iehova, “mai tari n toki i tari, ao man te maunga n toki n te maunga.” (Mika 7:12) Ni boong aikai, ao ibukini kabanean kakoroan bukin te taetae ni burabeti aei, e nang aki tii kakabwaiaki te botannaomata teuana ma a nang kakabwaiaki aomata ni kabane man ana kaetitaeka ae riai te Atua. (Itaia 42:1) E na kanga n noraki kakoroan bukin aei?
12. A kanga n ongo “bwanan Iehova” aomata ni boong aikai?
12 Ibukin kaekaan aei, iangoi ana taeka Mika ake imwain aikai. E taekinaki ae kangai ni Mika 6:9: “E wewete bwanan Iehova ni wetea te kawa, ao e na mutiakina aram te aomata ae rabakau.” Tera aroia aomata mai buakoia natannaomata nako n ongo “bwanan Iehova” ao tera irekereken aei ma arora ni kaakaraoa te kaetitaeka ae riai? E koaua, bwa e a aki taetae te Atua ma aomata n taai aikai. Ma e ngae n anne ao a a bon tia n ongo bwanan Iehova aomata nako, rinanon ara mwakuri n tataekina te rongorongo ni katobibia te aonnaba, n aki ongeia bwa tera aia reeti ke tera aron kakannatoia. Ibukin aei, aomata ake a kakauongo, a ‘maaka aran te Atua,’ ao a moanna ni karinea n te aro ae riai. Ti boni karaoa ae riai ao ae tatangira rinanon arora n tataekina rongorongon te Tautaeka n Uea ma te ingaingannano. Ti “karaoa ae eti” kioina ngkai ti a tia ni katanoataa aran te Atua nakoia aomata nako n akea ae ti katikua.
Ti Riai n Tangira te Nanoanga
13. Tera te kaokoro i marenan te akoi ae boto i aon te tangira ao te tangira?
13 Ti na manga maroroakina ngkanne te kauoua ni bwai ae e kainnanoaki are e taekinaki ni Mika 6:8. E kaantaninga Iehova bwa ti na “tangira te nanoanga.” Te taetae n Ebera ae rairaki ikai bwa “nanoanga” e kona naba n rairaki bwa “te akoi ae boto i aon te tangira” ke “te tangira ae kakaonimaki.” Te akoi ae boto i aon te tangira boni kaotan tabeakinaia aomata tabemwaang ao nanoangakia naba. Iai okoron te akoi ae boto i aon te tangira, ao te tangira. N te aro raa? E raababa nanon te taeka ae te tangira, n aron ae e kona ni kaineti nakoni bwaai ao iango. N te katoto, e taekinaki n te Baibara bwa iai “ane tangira te wain ma te bwa,” ao te aomata ae e “tangira te rabakau.” (Taeka N Rabakau 21:17; 29:3) N te itera are teuana, te akoi ae boto i aon te tangira e aki toki ni kaineti ma aomata, ao e moamoa riki aei nakoia aomata aika beku iroun te Atua. Mangaia are e taekinaki ni Mika 7:20 taekan “te atataiaomata [te akoi ae boto i aon te tangira, NW] nakon Aberaam” ae te mwaane are e beku iroun Iehova ae te Atua.
14, 15. E kanga ni kaotiotaki te akoi ae boto i aon te tangira, ao tera ae taekinaki ni barakirabe aikai are e oti iai koauana?
14 Ni kaineti ma Mika 7:18, e taekinna te burabeti aei bwa “E kukurei ni kan atataiaomata [te akoi ae boto i aon te tangira, NW]” te Atua. Ni Mika 6:8, ti tuangaki iai bwa ti na aki tii kaotiota te akoi ae boto i aon te tangira ma ti riai naba ni kaota kakawakina. Tera reireiara man kiibu aikai? E kaotiotaki te akoi ae boto i aon te tangira ma te nano ni koaua n aki kani kabooaki mwina, ibukina bwa ti boni kani kaotiotiia. N aron Iehova, ti namakina te kukurei ngkana ti kaotiota te akoi ae boto i aon te tangira nakoia ake a kainnanoia.
15 Ni boong aikai, te akoi ae boto i aon te tangira e kanikinaeia ana aomata te Atua. Iangoa te katoto aei: N Tun n te ririki 2001, e riki te ieka ae korakora imwin bwakan te karau ae korakora ma te angibuaka i aon Texas, i Amerika ao a uruaki iai taabo ni maeka aika ngaa ma ngaa mwaitiia, n ikotaki naba ma mwengaia Ana tia Kakoaua Iehova aika bubua ma bubua mwaitiia. Ibukin nanoia ni kani buokiia tariia aika Kristian aika kainnanoa te ibuobuoki, ao a tia taani Kakoaua aika tao 10,000 mwaitiia n anga aia tai ao korakoraia ma nanoia ni kukurei ni buokiia tariia aikai. A karaoa te mwakuri n anganano aei n te maan ae raka i aon iteran te ririki, ike a mwakuri iai n te ngaina ao te bong, ni katoa Kaonobong ao Taabati n akea namakinan te kua irouia, ibukin manga katean Taabo n Taromauri aika 8 mwaitiia ao auti ni maeka ibukiia tariia aika Kristian aika raka i aon 700 mwaitiia. Te koraki ake a aki kona n reke rokoia n ira te mwakuri aei, a bwaintangirai amwarake, bwaai aika kainnanoaki ibukin te kateitei, ao te mwane. Bukin tera ngkai a anganano ngaa ma ngaa taani Kakoaua aikai ibukin buokaia tariia ni Kristian? Ibukina bwa a “tangira te nanoanga [te akoi ae boto i aon te tangira, NW].” Ai kaunganano ra ataakin mwakuri aika kaota te akoi ae boto i aon te tangira are kaotiotaki irouia tarira ni katobibia te aonnaba! Eng, kaboraoan aroarora ma bwaai aika tangiraki ibukin kaotan tangiran te “nanoanga” bon tiaki te bwai ni karawawata ma bon te bwai ae karekea te kimwareirei!
Bwaina te Iraorao ma te Atua n te Nanorinano
16. Tera te kaikonaki are e ibuobuoki ni kamataataa kainnanoan te nakonako n nanorinano ma te Atua?
16 Te katenua ni bwai ae riai n reke iroura are koreaki ni Mika 6:8 bon “te nako n nanorinano ma Atuam.” E nanonaki n aei bwa ti riai n atai tian ara konabwai ao ti na mwiokoa te Atua iai. Ibukin kabwarabwarana: Iangoia bwa aongkoa iai te ataeinaine ae uarereke ae taua bain tamana ni kamatoaa, i nanon aia tai n nakonako n tain karen te ang ma te karau ae korakora. E bon ataia raoi te ataeinaine ae uarereke aei bwa iai tian korakorana, ma e onimakina tamana. Ti ataia naba ngaira bwa iai tian ara konabwai ma ti bon onimakina Tamara are i karawa. Ti na kanga ni kateimatoaa onimakinan Tamara? Te anga teuana, ngkana ti teimatoa n iaiangoia bwa bukin tera ngkai ti wanawana riki ngkana ti teimatoa ni kaania te Atua. E kauringira Mika bukina aika tenua: Iehova bon te tia Kamaiuira, ara tia Kairiri, ao te tia Katanira.
17. E kanga Iehova ni kamaiuia ana aomata, ni kairiria ao ni kamanoia n taai ake rimoa?
17 Ni kaineti ma ae koreaki ni Mika 6:4, 5, e taekina iai ae kangai te Atua: “I kawaerakeko man te aba are Aikubita.” Eng, Iehova bon te tia Kamaiuia I-Iteraera. E manga taku riki Iehova: “I kanakoa Mote, ma Aaron, ma Miriam, riri moam.” A mwiokoaki Mote ao Aaron ibukin kairiran te botannaomata aei, ao Nei Miriam e kaira aia mwaati n ruruoia ainen Iteraera ibukin aia tokanikai. (Te Otinako 7:1, 2; 15:1, 19-21; Te Tua-Kaua 34:10) E katauraoa te kairiri Iehova rinanoia ana toro. N te kibu 5, e kauringa te botannaomata ae Iteraera Iehova bwa e kamanoia mairoun Baraka ao Baraam, ao e kamanoia naba ni kabanean mwakoron mwanangaia mai Titim i Moaba n nako Kirekara n te Aba ni Berita.
18. Tera ae e karaoia te Atua n te aro are e a riki iai bwa te tia Kamaiuira, ara tia Kairiri ao te tia Kamanoira ni boong aikai?
18 Ngkai ti nakonako ma te Atua, e kamaiuira man ana aonnaba Tatan, e kairirira n ana Taeka ao ana botaki, ao e botiira ni kamanoira ngkana ti buakanaki irouia taani kakaaitaraira. Mangaia are iai bukina ae riai ngkai ti riai n taua ni kamatoaa bain Tamara are i karawa, ngkai ti nakonako ma ngaia ni kabanean mwakoron mwanangara ae karuanikai, nakon te tabo ae kakawaki riki nakon te Aba ni Berita are rimoa, ae taekan ana aonnaba te Atua ae boou ae raoiroi.
19. E reitaki te nanorinano ma tian ara konabwai n te aro raa?
19 Ngkana ti nakonako n nanorinano ma te Atua, ao ti buokaki iai bwa ti na iangoi raoi arora. E kona n reke aei ibukina bwa kaotiotan te nanorinano e reitaki ma arora n atai tian ara konabwai. E kona n tiatianaki ara konabwai ni baike ti karaoi n ara beku iroun Iehova ibukin rikirakera ni kara ke aorakin rabwatara. Ti aki riai ni kariaia te aro aei bwa e na kabwarai nanora, ma e ngae n anne, e raoiroi riki bwa ti na ururingnga are e butimwaai ara kekeiaki ao ara anganano te Atua, ni kaineti ma ‘mwaitin ara konabwai ao tiaki n ai aron akean ara konabwai.’ (2 I-Korinto 8:12) Te koaua, bwa e kaantaningaira Iehova bwa ti na toro irouna ma nanora ni kabane, n aron are ti kona. (I-Korote 3:23) Ti na boni kakabwaiaki n aaro aika mwaiti mairoun te Atua, ngkana ti kakorakoraira ni karaoa are ti kona ni beku irouna ma te ingaingannano.—Taeka N Rabakau 10:22.
E Kabatiai Kakabwaia te Nano ni Kakaantaninga
20. Ataakin tera, ae e riai ni buokira ni kaotiota te nano ni kakaantaninga n aron Mika?
20 Ti kairaki bwa ti na kakairi n aroaron Mika man namakinan kakabwaiakira iroun Iehova. E taku: “N na kaantaninga Atuani maiuu.” (Mika 7:7) Tera irekereken taeka aikai ma arora n nakonako n nanorinano ma te Atua? Ti buokaki man te nano ni kakaantaninga ke te taotaonakinnano, bwa ti na aki bwarannano ngkai e tuai man roko ana bong Iehova. (Taeka N Rabakau 13:12) Ni koauana, ti bane ni kakaantaningaa tokin te waaki ae buakaka ae ngkai, ma te ingaingannano. Ma e ngae n anne, ao ni katoa wiki, ngaa ma ngaa aomata aika a moana nakonakoia ma te Atua. Man ataakin aei, ti a kona ngkanne n ataa bukina ae riai ngkai ti riai ni kaotiota te nano ni kakaantaninga. N reitaki ma aei, e taku temanna te tia Kakoaua ae e a tia n uarongorongo i nanon te tai ae e a rangi ni maan: “Ngkana I tanrikaaki n uringa arou n tataekina te rongorongo ae raoiroi i nanon 55 te ririki n nako, ao I boni kakoauaa raoi bwa akea te bwai ae e bua mairou i nanon au tai ni kakaantaningaa ana babaire Iehova. N te itera are teuana, I a tia naba ni kabebeteaki man aaro aika kammaraki aika mwaiti.” Ko a tia n namakina ae titeboo ma aio?
21, 22. E kanga ni kakoroaki nanon are e taekinaki ni Mika 7:14 n ara bong aikai?
21 Ti na boni kakabwaiaki ngkana ti nakonako ma Iehova n akea te nanououa iroura. Ngkana ti wareka Mika 7:14, ao Mika e kabotauia ana aomata te Atua ma tiibu aika kamanoaki raoi iroun te tia kawakin-tiibu. Kakoroan bukin te taetae ni burabeti aei teuana riki ni boong aikai, bwa a namakina kamanoaia nikiraia kaain te I-Iteraera n taamnei n ikotaki naba ma “tiibu tabemang,” iroun te tia Kawakin-tiibu ae onimakinaki ae Iehova. A mena “n tii ngaiia, n te buakoakonikai,” ao a kaokoroaki ma te aonnaba ae karuanikai n te aro n taamnei.—Ioane 10:16; Te Tua-Kaua 33:28; Ieremia 49:31; I-Karatia 6:16.
22 E na reke irouia ana aomata Iehova te mweeraoi n aron are e taetae ni burabetinaki ni Mika 7:14. E taekina ae kangai Mika ibukia ana tiibu te Atua ke aomata: “A amamarake i Batian ma Kireata.” A amwamwarake tiibun Batian ao Kireata n tawana aika maiureirei ma ni maiuraoi, ao n aron anne, a a mweeraoi naba ana aomata te Atua ni kaineti ma bwaai n taamnei aika bati, ao aei te kakabwaia ae raka nakoia ake a nakonako n nanorinano ma te Atua.—Warekaia Iteraera 32:1; Te Tua-Kaua 32:14.
23. Tera reireiara ae reke ngkana ti iaiangoa are e taekinaki ni Mika 7:18, 19?
23 Ni Mika 7:18, 19, e katuruturuaki iroun te burabeti aei bwa e ingainga nanon Iehova ni kani kabwarai aia bure aomata aika raraoma. E taekinaki n te kibu 18 bwa e “kabwara buakaka” Iehova, ao e “rirarikin aia bure.” Ni kaineti ma ae e taekinaki n te kibu 19, e “na tetewe nako aia bure nako aani marawa.” Tera te reirei ae e kona n reke man aei? Ti kona naba n titirakinira i bon iroura bwa tao ti katotonga Iehova ni kaineti ma aei ke tiaki. Ti kabwarai aia bure aomata ngkana a bure nakoira? Ngkana a raraoma aomata aikai ao a ukoukora karekean te raoi, ni koauana, ti na kani kaotiota aron Iehova n tauraoi ni kani kabwarai buure n aki toki.
24. Tera kabwaiam ae ko namakinna man ana taetae ni burabeti Mika?
24 Ti kanga ni kakabwaiaaki imwin iaiangoan raoi ana taetae ni burabeti Mika? E a bon tia ni kauringira bwa e katauraoa te kaantaninga ae koaua Iehova ibukiia ake a kaania. (Mika 2:1-13) Ti a tia ni kaungaki bwa ti na karaoi bwaai ni kabane ibukin karikirakean te taromauri ae koaua, bwa ti aonga ni kona n nakonako n aran te Atua n aki toki. (Mika 4:1-5) Ao a a tia naba ni karauaki nanora bwa ti boni kona ni karaoa ae tangiraki iroun Iehova, n aki ongeia bwa tera aroaroni maiura. Eng, ti boni kakorakoraki raoi man ana taetae ni burabeti Mika, bwa ti na nakonako n aran Iehova.
Ko na Kanga ni Kaeka?
• Tera ae e tangiria Iehova mairoura, ni kaineti ma ae taekinaki ni Mika 6:8?
• Tera te bwai ae e riai n reke iroura, ngkana ti kani “karaoa ae eti”?
• Ti na kanga ni kaotia bwa ti “tangira te nanoanga”?
• Tera ae e reitaki ma te ‘nakonako n nanorinano ma te Atua’?
[Taamnei n iteraniba 21]
Kaotia bwa ko tangira te nanoanga n arom ni buokiia aomata ni bwaai aika a kainnanoi
[Taamnei n iteraniba 21]
Karaoa ae ko kona, ngkai ko ataa tian am konabwai ma te nanorinano
[Taamnei n iteraniba 21]
Kaakaraoa ae riai rinanon tataekinan te rongorongo ae raoiroi nakoia aomata n aki ongeia bwa a kakannato ke a aki