Kakairi Irouia Burabeti n Aroni Mika
1. Tera te titiraki are e bae n iaiangoia Mika, ao e aera ngkai e aki matebuaka ana uarongorongo?
1 ‘E na roko n ningai tokin te waaki ae buakaka ae ngkai i aon te aba?’ E bae n iaiangoa te aeka n titiraki anne te burabeti are Mika, ngke e tataekina rongorongon ana motikitaeka Iehova i aon aia tautaeka tibun Iteraera ao Iuta. Ma e aki matebuaka ana uarongorongo. N 740 B.C.E., n ana tai ni maiu Mika, ao e a kakoroaki iai bukin ana taeka Iehova ibukin Tamaria. (Mika 1:6, 7) Imwina ao e a kamaunaaki Ierutarem n te ririki 607 B.C.E. (Mika 3:12) Ti na kanga ni kakairi irouni Mika ngkai ti tataningaa rokon ana bong ni motikitaeka Iehova n ara bong aikai?
2. Ti na kanga ni kaotiota te taotaonakinnano ngkai ti tataningaa ana bong Iehova, ao bukin tera?
2 Bwaina te Taotaonakinnano: E korea ae kangai Mika: “Ao ngai, N na kariaria Iehova; N na kaantaninga Atuani maiuu.” (Mika 7:7, BG) Ni koauana, e aki katoka ana uarongorongo Mika ao n tataningaa rokon te toki. E teimatoa ni katabetabea n te uarongorongo, ngkai ngaia ana burabeti Iehova. Ngkai ti tataningaa ana bong Iehova, ti riai naba n uataboa “te itiaki n aroaroni [maiura] ao ni karaoi mwakuri ibukin tangiran te Atua.” (2 Bet. 3:11, 12) E reke aia tai aomata n tatabemania nako n rairi nanoia, man ana taotaonakinnano Iehova. (2 Bet. 3:9) Mangaia are ti ururinga te kauring man te Baibara ae ti na kakairi n aia taotaonakinnano burabeti.—Iak. 5:10.
3. Bukin tera bwa ti riai ni butiia Iehova taamneina ae raoiroi?
3 Onimakina Korakoran Iehova: E ngae ngke iai mwiokoani Mika ae kangaanga, ma e onimakina Iehova ibukini korakorana ni karaoa mwiokoana anne. (Mika 3:8) E ataia Iehova bwa ti kainnanoa te korakora mairouna, ngaia anne bukina ae e kaungaira n te Baibara bwa ti na butiia te korakora. E tituaraoi n anga mwaakana nakoia akana kua bwa a aonga ni kakororaoa mwiokoaia n te ekaretia. (TaiAre. 84:5, 7; Ita. 40:30-31) Ko a tia n rinanon aei ni maium n am beku ae tabu? Ko katoatai ni butiia Iehova ana ibuobuoki mwaakana ae taamneina ae raoiroi?—Ruka 11:13.
4. Tera te katoto ae moanibaan te tamaroa ibukira ni boong aikai man aroaroni maiuni Mika?
4 E moanibwai irouni Mika kakaraoan nanon te Atua i nanoni maiuna ni kabane. E motinnanoia bwa e na teimatoa ni kakaonimaki n aki ongea ae e otabwaniniaki n te aroaro ni maiu ae buakaka. N aron naba anne, e tuoaki ni katoabong etin arora. Mangaia are ti bia kakorakoraa ara motinnano ae ti na “nakonako n aran Iehova ae Atuara n aki toki ao n aki toki.”—Mika 4:5, BG.