Kakairi Iroun Iesu N Angareirei Ma Te Tangira
“Bon akea te aomata ae taetae n te aro arei ma ngkoa.”—IOANE 7:46.
1. Tera aroia aomata ni kaineti ma aron ana angareirei Iesu?
IANGOA kakaongoraan ana angareirei Iesu! Ti wareka uaan aei n te Baibara nakoia te koraki ake e a tia ni kaitiboo ma ngaiia. N te katoto, te tia korea te Euangkerio ae Ruka e taekini aroia aomata ake n ana kaawa Iesu ae Natareta bwa a moanna ni “mimi n taeka n akoi aika nako mai wina.” E taekinna Mataio bwa te koraki ake a kakauongo nakon Iesu ngke e angareirei n ana Kabwarabwara i aon te Maunga, a ‘bati ni mimi n arona n reirei.’ Ao Ioane e kakoauaa bwa bureitiman ake a kanakoaki ni katika Iesu, a oki rikaaki ma tabonibaia ao a taku: “Bon akea te aomata ae taetae n te aro arei ma ngkoa.”—Ruka 4:22; Mataio 7:28, BK; Ioane 7:46.
2. Aanga raa ake e kabonganai Iesu n ana angareirei?
2 A bon aki kairua bureitiman akanne. Bon akea te nanououa bwa Iesu bon te tia Reirei ae te kabanea ni kakannato mai buakoia aomata. E angareirei n te aro ae mataata raoi, e kai ota te aba iai ao akea ae e kona n tiribureia. E rangi ni mwaatai ni kabonganai kaikonaki ao titiraki. E kaangaraoa raoi ana angareirei nakoia te koraki ake e taetae nakoia, tao aika kakannato ke aika mangori. E kai reke te ota ni koaua aika e reireinia aomata, ma ni koauana a bon nano naba. Ma e ngae n anne, e aki riki Iesu bwa te tia Reirei ae kakannato ni bwaai aikai n tii ngaiia.
Te Aroaro ae te Kabanea ni Kakawaki Bon te Tangira
3. Ngkai te tia reirei Iesu, tera kaokorona ma mataniwi n Aaro n ana bong akanne?
3 E bae n iai i buakoia taani koroboki ao Baritaio, mwaane aika wanawana aika iai irouia te atatai ao rabakauia n tibwaia nako. N te aro raa ae e rangi ni kaokoro iai aron ana angareirei Iesu ma Baritaio? N tai akanne, bon akea tangiraia aomata aika mangori irouia mataniwi n Aaro. A riribaiia ao a taraiia bwa ‘aomata aika a na reke kaia.’ (Ioane 7:49) Ni kaitaraan anne, e a kairaki Iesu bwa e na nanoangaia, kioina ngke “a rawawata, ao a mae nako, n ai aroia tiibu aika akea te tia kawakinia.” (Mataio 9:36) E tatangira, e nanoanga ao e akoi. Irarikin anne, bon akea tangiran te Atua irouia mataniwi n Aaro. (Ioane 5:42) E ngae n anne, e bon tangira Tamana Iesu ao e kukurei ni karaoa nanona. A kabwaoua ana taeka te Atua mataniwi n Aaro ibukin oini kakabwaiaia, ma Iesu e tangira “ana taeka te Atua,” ngaia are e angareirei iai, e kabwarabwaraa, e boutokaia ao e maiuakinna. (Ruka 11:28) Eng, e kaotia bwa e kairaki n te tangira ae nano Kristo ni baike e reireinia aomata, n reitakina ma ngaiia ao arona n angareirei.
4, 5. (a) Bukin tera bwa e kakawaki te angareirei ma te tangira? (b) Bukin tera bwa e kakawaki naba te atatai ao te rabakau ibukin te angareirei?
4 Ma tera arora? Ngkai taan rimwini Kristo ngaira, ti kani kakairi irouna n ara mwakuri ni minita ao ni maiura. (1 Betero 2:21) N te aro aei, tiara tiaki tii te anga te atatai man te Baibara ma ti riai naba ni kaotiota aroaron Iehova ao e a moamoa riki ana tangira. N aki ongeia bwa e mwaiti ara atatai ke tao e karako, ke tao e rangi n tiraua rabakaura n angareirei ke tao tii teutana, ma te tangira are ti kaotiotia e na buokira n rotii nanoia te koraki ake ti uarongorongo nakoia. Ti riai ni kakairi iroun Iesu n angareirei ma te tangira bwa ti aonga ni mwaatai ni koaua n ara mwakuri ni karekeia taan rimwina.
5 Ni koauana, ngkana ti kan riki bwa taan angareirei aika mwaatai, ti kainnanoa te atatai moa ibukin te bwai ae ti kan taekinna, ao rabakaura n anga te atatai anne. E buokiia taan rimwina Iesu bwa a na karekei baika uoua aikai, ao e buokira ngkai Iehova bwa ti na karekei baikai naba rinanon ana botaki. (Wareka Itaia 54:13; Ruka 12:42.) Ma ti riai ni waakina te angareirei tiaki tii mani wanawanara ma boni mai nanora naba. Ngkana a kaai ni mwakuri te atatai, te rabakau ao te tangira, a kona n rangi ni kakukurei uaaia. N aaro raa ngkanne aika ti kona ni kaota iai te tangira ngkana ti angareirei? E kanga Iesu ao taan rimwina ni karaoa anne? Ti na noria.
Ti Riai n Tangira Iehova
6. Tera arora n taekina temanna ae ti tangiria?
6 Ti kan taekini baika ti tangiri aika a bongana ibukira ao ni karaoan aei, a kona aomata n nora kimwareireira ao ingaingara. E rangi ni koaua aio ngkana ti taetae ibukin te aomata ae tangiraki iroura. N angiin te tai, ti rangi n ingainga n tibwaia ma aomata te bwai ae ti ataia ibukin te aomata anne. Ti kamoamoaa, ti karinea ao ni boutokaia. Ti karaoa anne ibukina bwa ti tangiriia aomata nako bwa a na katikaki nanoia nakon te aomata anne n namakinan aroarona, n ai arora naba.
7. Tera are e kaira Iesu bwa e na karaoia ibukin tangiran te Atua?
7 Imwain ae ti kona ni karikirakea tangiran Iehova i nanoia aomata nako, ti riai moa n ataia ao n tangiria. Ni koauana, tangiran te Atua bon aan te taromauri ae koaua. (Mataio 22:36-38) E katea te banna ni katoto Iesu ae kororaoi. E tangira Iehova ma nanona ni kabane, wanawanana, taamneina ao korakorana. E kinaa raoi Tamana Iesu bwa e a tia ni kabanea tao birion te ririki i karawa ma ngaia. Tera mwini kabanean te tai ae abwabwaki ma Tamana are i karawa? E taku Iesu “I tangira te Tama.” (Ioane 14:31) E noraki te tangira anne ni bwaai ni kabane ake e taekin Iesu ao ni karaoi. E kairia bwa e na teimatoa ni karaoi baike e kakatonga iai te Atua. (Ioane 8:29) E kaumakaki bwa e na boaia mataniwi n Aaro aika a mwamwanaa te aba ibukina bwa a taku bwa a tei ibukin te Atua. E boni kairia naba bwa e na taekina taekan Iehova ao ni buokiia aomata bwa a na kinaa ao n tangira te Atua.
8. Tera ae kairiia taan rimwin Iesu bwa a na karaoia man tangiran te Atua?
8 N ai aron Iesu, taan rimwina n te moan tienture a tangira Iehova ao e kairiia te tangira aei bwa a na tataekina te rongorongo ae raoiroi ma te ninikoria ao te ingaingannano. E ngae ngke a kaitaraaki irouia mataniwi n Aaro aika tautaekania aomata, ma a boni kaona Ierutarem n aia angareirei. E mataata raoi bwa taan rimwina a bon aki kona ni katoka tataekinani baika a a tia n nori ao n ongo. (Mwakuri 4:20; 5:28) A ataia bwa bon raoia Iehova ao e na kakabwaiaia, ao e boni kabatiaa kakabwaiaia! Ni koauana, e kee i aan 30 te ririki imwini maten Iesu ao e a kona te abotoro Bauro ni korea ae e a tia n tataekinaki te rongorongo ae raoiroi “i aonaba ni kabane aika i aani karawa.”—I-Korote 1:23.
9. Ti na kanga ni kakorakoraa ara tangira ibukin te Atua?
9 Ngkana ti kan riki bwa taan angareirei aika mwaatai ni koaua, ti bia kakoauaa raoi bwa ti teimatoa ni kakorakoraa tangiran te Atua iroura. Ti na kanga ni karaoa anne? Boni man arora n taetaenikawai ma te Atua ni katoatai n te tataro. Ti kakorakoraa naba ara tangira ibukin te Atua man reiakinan ana Taeka, warekani booki aika aanaki man te Baibara ao iriran bobotaki ni Kristian. Ngkai e a rikirake ara atatai ibukin te Atua, e na kaonaki ngkanne nanora n tangirana. Ngkanne, ngkai ti kaotiota ara tangira ibukin te Atua n ara taeka ao ara mwakuri, a na noria tabemwaang ao tao a na kona ni burimauniaki iai nakon Iehova.—Wareka Taian Areru 104:33, 34.
Ti Riai n Tangiri Baika Ti Angareirei Iai
10. Tera kanikinaean raoi te tia reirei ae rabakau?
10 Tangirani baike e angareirei iai boni kanikinaean te tia reirei ae rabakau. E riai ni kakoauaa bwa a koaua baike e angareirei iai, e mutiakini ao a boni kakawaki naba nakoina. Ngkana arona bwa te tia reirei e tabeakina are e angareirei iai, e kona n noraki ingaingan nanona ao e na riki bwa te bwai n anainano ae korakora nakoia te koraki ake e reireinia. N te itera are teuana, ngkana arona bwa te tia reirei e aki ota raoi ni baike e angareirei iai, e na kanga ngkanne ni kantaningaia te koraki ake e reireinia bwa a na iaiangoa kakawakin te bwai are a ongoraeia? E rangi ni kakawaki am banna ni katoto ngkai te tia angareirei n Ana Taeka te Atua ngkoe. E taku Iesu: “Ngkana e bane raoi reireiana ao e a boraoi ma ana tia reirei.”—Ruka 6:40, BK.
11. Bukin tera bwa Iesu e tangira are e angareirei iai?
11 E tangiri baike e angareirei iai Iesu. E ataia bwa iai te bwai ae rangi ni kakawaki ae e riai n tibwaia nako, ae te koaua ibukin Tamana are i karawa, are “ana Taeka te Atua” ao “taekan te maiu are aki toki.” (Ioane 3:34; 6:68) Koaua ake e angareirei iai Iesu, ai aron te ota ae raneanea ni kaotaraei baika bubuaka ao ni katuruturui baika raraoi. Koaua akanne, a uota te kantaninga ao te kabebetenano nakoia akana nanorinano, aika a mwamwanaaki irouia mataniwi n Aaro aika kewe ao ni karawawataaki iroun te Riaboro. (Mwakuri 10:38) Tangiran te koaua iroun Iesu e aki tii noraki i nanon ana angareirei ma e noraki naba ni bwaai ni kabane ake e karaoi.
12. Tera ana namakin te abotoro Bauro ibukin te rongorongo ae raoiroi?
12 N ai aron Iesu, e rangi ni korakora tangiran ao iaiangoani kakawakin te koaua ibukin Iehova ao Kristo irouia taan rimwina n te aro are a aikoa kona taani kakaaitara ni kabwarai nanoia man tibwatibwaakina nakoia aomata. E koroboki Bauro nakoia raona ni Kristian i Rom ni kangai: “E ingainga nanou ni kani uota te Rongorongo ae e Raoiroi . . . Ba I aki mama n taekina te Euangkerio. . . . boni mwakan te Atua ni kamaiuia aomata ni kabaneia.” (I-Rom 1:15, 16, BK) E iangoia Bauro bwa tataekinan te koaua bon te mwakuri ae rine. E korea ae kangai: “I anganaki . . . te akoaki aei, ae te tataekinna nakoia Tientaire bwaikorakini Kristo, ae aki konaki n ataki raoi.” (I-Ebeto 3:8) E bon aki kangaanga iaiangoan ingaingan nanoni Bauro ngke e angareirei nakoia aomata n taekan Iehova ao ana kantaninga.
13. Baikara bukina aika ti riai iai n tangira te rongorongo ae raoiroi?
13 Te rongorongo ae raoiroi ae i nanon Ana Taeka te Atua, e anganira te kona n ataa te tia Karikiriki ao ni karekea ara iraorao ae kaan ma ngaia. Te rongorongo ae raoiroi anne e katauraoi kaeka aika karaunano ibukin titiraki aika bongana i nanoni maiura ao iai korakorana ni bitii maiura, n anganira te kantaninga, ao ni boutokaira i nanon taai aika karawawata. N ikotaki ma anne, e boni kaotaki te kawai nakon te maiu ni koaua are bon akea tokina. Bon akea te atatai ae rangi ni kakawaki ke ni manena riki nakon te rongorongo ae raoiroi. Bon te bwaintangira ae rangi ni kakawaki ae ti a tia n anganaki ae e anganira te kimwareirei ae rangi ni korakora. Ngkana ti tibwatibwaa te bwaintangira anne nakoia aomata, e na kauaataoa riki te kimwareirei nakoira.—Mwakuri 20:35.
14. Ti na kanga ni kakorakoraa ara tangira ni baike ti angareirei iai?
14 Tera ae ko kona ni karaoia bwa ko aonga ni kakorakoraa riki tangiran te rongorongo ae raoiroi? Ngkana ko tabe ni wareka Ana Taeka te Atua, motirawaia n taai aika riai ao iaiangoa are ko warekia. N te katoto, iangoiko bwa aongkoa ko raona Iesu n ana mwakuri ni minita ngke e mena i aon te aba ke tao ko kaai n airi ni mwananga ma te abotoro Bauro. Iangoiko bwa aongkoa ko mena n te aonnaba ae boou ao taraia bwa aekakira okoron te maiu iai. Iaiangoi kakabwaia ake a a tia n reke iroum rinanon ongeabam nakon te rongorongo ae raoiroi. Ngkana ko kateimatoa korakoran am tangira ibukin te rongorongo ae raoiroi, a na bon nora te tangira anne te koraki ake ko angareirei nakoia. Iai bukina ae raoiroi, ngkai ti riai n taratara raoi ao ni botumwaaka n iaiangoi baike ti a tia n reiakin ao ni mutiakini baike ti angareirei iai.—Wareka 1 Timoteo 4:15, 16.
Ti Riai n Tangiriia Aomata
15. Bukin tera bwa te tia reirei e riai n tangiriia te koraki ake e angareirei nakoia?
15 Te tia reirei ae rabakau, e karau nanoia te koraki ake a reiakinaki n te aro are a a ingainga ni kairekerekeia ma baike a reiakin ao ni kukurei n reiakinna ao ni kaota nanoia iai. Te tia reirei ae tatangira, e anga te atatai ibukin tabeakinaia raoi te koraki ake e angareirei nakoia. E kaangaraoa raoi ana angareirei ibukini kainnanoia ao nakon tian aia atatai. E iangoa raoi aia konabwai ao baika a riiriki i nanoni maiuia te koraki ake e angareirei nakoia. Ngkana iai te aeka n tangira aei irouia taan angareirei, a na kona te koraki ake a reireiaki n noria ao e na kakukurei te angareirei ma te reireiaki.
16. N aaro raa ake e kaotiota iai tangiraia aomata Iesu?
16 E kaotiota aekan te tangira anne Iesu. Te aro ae te kabanea ni korakora ae kaotiota ana tangira, bon te anga maiuna n aomata ae kororaoi n te aro are a a kona ni kamaiuaki aomata nako. (Ioane 15:13) N ana mwakuri ni minita Iesu, e bon aki roko n te kua ibukin tararuaaia aomata n te itera n rabwata ao e a moamoa riki n te itera n taamnei. N oneani mwini kantaningaani kawarana irouia aomata, e ririanna bubua ma bubua te maire n tibwatibwaa te rongorongo ae raoiroi nakoia. (Mataio 4:23-25; Ruka 8:1) E bwabwaina te taotaonaki n nano ao te atataiaomata. Ngkana a kainnanoa kaetakia taan rimwina, e karaoia ma te tangira. (Mareko 9:33-37) E kaungaia ni kaotiotan onimakinaia bwa a na riki bwa taan uarongorongo aika mwaatai n tataekinan te rongorongo ae raoiroi. Akea temanna te tia reirei ae rangi n tatangira riki nakon Iesu. E kaumakia taan rimwina te tangira are e kaotiotia nakoia, bwa a na manga tangiria ao n tou mwin ana tua.—Wareka Ioane 14:15.
17. A kanga taan rimwin Iesu ni kaotiota tangiraia aomata nako?
17 N ai aron Iesu, a kaotiota te tangira ae nano taan rimwina ao mwannanoaia te koraki ake a tataekina te rongorongo nakoia. N nanomwaakaia i aani bwainikirinaia ao ruanikaini maiuia, a uarongorongo nakoia aomata ao a tokanikai n tataekina te rongorongo ae raoiroi. Ai korakorara mwannanoaia te koraki ake a buokiia n te itera n taamnei! A rangi n rota te nano ana taeka te abotoro Bauro are e korea ae kangai: “Ma ti nimamanei i buakomi, n ai aron te tia toba ngkana e akoiia natina. Ao ai arora naba, ngkai a bati tangirami i roura, ao ti aki kan anganingkami ti ana euangkerio te Atua, ma ti kan anganingkami naba maiura, ngkai kam a riki ni bati n tangiraki i roura.”—1 I-Tetaronike 2:7, 8.
18, 19. (a) Bukin tera ngkai ti rangi n ingainga ni kan anga boni ngaira ni waakinaanako te mwakuri n uarongorongo? (b) Anga te katoto ni kaotia bwa te tangira are ti kaotiotia e bon noraki irouia aomata nako.
18 N aron naba anne ao ni boong aikai, a tataekina te rongorongo ae raoiroi Ana Tia Kakoaua Iehova ni katobibia te aonnaba ni kakaaeia te koraki ake a ingainga ni kan ataa te Atua ao n toro irouna. I nanon 17 te ririki n nako ni karinanaki rikaaki, e noraki bwa ti a tia ni kabanea te aoa ae raka i aon teuana te birion ni katoa ririki n tataekina te rongorongo ao ni karekeia taan rimwin Kristo iai, ao ti teimatoa n reitaanako te mwakuri anne. Ti karaoa anne ma te ingaingannano, e ngae ngke te mwakuri n uarongorongo e kainnanoa ae ti na anga ara tai, korakorara ao kaubwaira. N ai aron Iesu, ti ataia bwa Tamara ae tatangira are i karawa e tangiriia aomata bwa a na karekea te atatai ae na kairiia nakon te maiu are akea tokina. (Ioane 17:3; 1 Timoteo 2:3, 4) E kairira te tangira bwa ti na buokiia te koraki aika raoiroi nanoia bwa a na ataa Iehova ao n tangiria n ai arora.
19 E bon noraki te tangira are ti kaotiotia irouia aomata nako. N te katoto, e korei reeta te tari te aine ae te bwaiania n te United States, ni kabebetei nanoia te koraki ake a a tia ni bua raoia aika tangiraki n te mate. N ana kaeka temanna te mwaane, e korea ae kangai: “N te moantai ao I rangi ni mimi ngkai te aomata aei e kona ni kabanea ana kona ni kororeta nakon te aomata ae e aki kinaa naba teutana bwa e aonga ni buokia n nanomwaaka i nanon taai ake e kekeiaki iai. I kona n tii motikia bwa iai iroum tangiraia aomata ao te Atua are e kairiia aomata i nanoni kawain te maiu.”
20. Tera aroni kakawakin te angareirei ma te tangira?
20 N aron are e a tia n taekinaki are ngkana te tangira ao te rabakau a kaai ni mwakuri, ko kona ni kantaningaa mwina ae te kabanea n tamaroa. N ara angareirei, ti kataia ni buokiia te koraki ake ti angareirei nakoia bwa a aonga ni kairaki aia iango n ataakin Iehova ao te nano ae tangiria. Eng, ngkana ti kan riki bwa taan angareirei aika mwaatai ni koaua, ti kainnanoi iteran te tangira aika tenua n aron tangiran te Atua, tangiran te koaua ao tangiraia aomata. Ngkai ti karikirakea te aeka n tangira anne ao ni kaotiotia n ara mwakuri ni minita, ti namakina tiaki tii te kimwareirei ibukin te anga boni ngaira ma te raunnano naba n ataakin ae ti kakairi iroun Iesu ao ni kakukureia Iehova.
Ko na Kanga ni Kaeka?
• Ngkana ti reireinia aomata te rongorongo ae raoiroi, bukin tera bwa e kakawaki bwa e na iai iroura . . .
• tangiran te Atua?
• tangirani baike ti angareirei iai?
• tangiraia te koraki ake ti angareirei nakoia?
[Taamnei n iteraniba 21]
Tera ae karika okoron aron ana angareirei Iesu ma taani koroboki ao Baritaio?
[Taamnei n iteraniba 24]
E kainnanoaki n te angareirei te rabakau, te mwaatai ao e a moamoa riki i aoni bwaai ni kabane, te tangira