Aia Titiraki Taani Wareware . . .

E Koaua Bwa e Karikaki te Riaboro Iroun te Atua?

▪ Kioina ngkai e taekinaki n te Baibara bwa “e karikii bwaai ni kabane” te Atua, a a iangoia tabeman bwa e bae te Atua ni karika naba te Riaboro. (I-Ebeto 3:9; Te Kaotioti 4:11) E kateretereaki n te Baibara bwa te Atua e aki karika te Riaboro.

E karikaki iroun Iehova te aomata are e a manga riki bwa te Riaboro. Ngaia are moan rikin temanna are karoton te tia kakaitaraa te Atua, e bon riai ni kaboraoaki ma ae kaotaki n te Baibara ibukin Iehova ngkai ngaia te tia Karikiriki. E taekinaki ae kangai ibukina: “Moan te raoiroi ana makuri; Ba bon te kaeti-taeka ae riai ana aro ni kabane: Bon te Atua ae kakaonimaki ae akea ana buakaka, E raoiroi ao E eti Ngaia.” (Te Tua-Kaua 32:3-5, BG) Man taeka aikai, ti a kona iai ni kakoauaa bwa Tatan bon te anera naba temanna ae natin te Atua are e kororaoi ao e raoiroi ngkoa. E taekinaki te Riaboro iroun Iesu n Ioane 8:44 bwa “e aki teimatoa n te koaua,” ni katerea iai bwa e a tia ni bwaina te koaua Tatan ao ni katinanikua te buakaka ngkoa.

Ma e ngae n anne iai naba inaomatan te anera are e a manga riki bwa Tatan n rinea ae eti ke ae kairua, n aroia nikiraia ana anera Iehova aika wanawana. E boni karikia bwa Tatan ae nanona “te tia Kakaaitara,” ngke e rineia bwa e na kaitaraa te Atua ao ni kaungaia te moan taanga bwa a na raonna.​—Karikani Bwaai 3:1-5.

E karikia naba te anera ae buakaka anne bwa te Riaboro ae nanona “te tia Uarao.” Bon te tia kamwamwane Tatan ae e aki nonoraki are e kaira te naeta ni kamanenaani keewe ni kamwanea iai Ewa, bwa e na aki ongeaba n ana tua te tia Karikiriki ae rangi ni mataata. Anne bukina ae Iesu e arana Tatan bwa “taman te kewe.”​—Ioane 8:44.

Ma e na kanga te anera ae kororaoi are akea kabwakana ke kaririana, n riki n rangi ni buakaka? E teretere bwa e rangi ni mataaiakina te taromauri are e riai ni karaoaki tii nakon te Atua, ao e noria bwa e kona ni kaaki te botannaomata i aan ana tautaeka n oneani mwin are a na tautaekanaki iroun Iehova. Ibukina bwa e iaiangoa te kan tautaeka n oneani mwin are e na aki, e a kariaia iai bwa e na rikirake te iango anne ao n tokina e a mwakuria. E kabwarabwaraaki te bwai ae riki n te boki ae Iakobo ni kangai: “A kataaki aomata n tatabemania nako ngkana a katikakinako n oin aia kaibwabwaru ao ni mwamwanaaki iai. Ao ngkana e bikoukou te kaibwabwaru ao e bungia te bure.”​—Iakobo 1:14, 15; 1 Timoteo 3:6.

E kaikonakaki ni kangai: Iangoia bwa aongkoa e noria te tia karaoa te akaunti, bwa e reke angana ni kamangaoa mwin te mwane nako aana ae te mwakuri n iraa nakon te kambwana are e mwakuri iai. E kona ni waekoa ni kanakoa te iango ae kairua anne. N oneani mwin anne, ngkana e iaiangoa anne e nang karikirakea iai tangirana ao e na bae ni karaoa te mwakuri. Ngkana e karaoa anne, e na boni karikia iai bwa te tia iraa. E na riki naba bwa te tia kewe ngkana e kewe imwin ana bure are e karaoia. N aron anne, e karikirakei iango aika kairua ao ni karaoi, te anera are karikaki iroun te Atua ike e a boni karikia iai bwa Tatan te Riaboro ni kamanenaan inaomatana ni karaoan te uarao ao te karitei nakon Tamana.

Ti rangi ni kakaitau bwa e na kamaunaaki Tatan iroun te Atua n te tai are e a tia n namatia. (I-Rom 16:20) Ma a reireiaki taan taromauria te Atua ni koaua ana kunemwaan Tatan ao n anganaki kamanoaia. (2 Korinto 2:11; I-Ebeto 6:11) Ngaia are “rarawa nakon te Riaboro, ao ane e na birinako mairoumi.”​—Iakobo 4:7.

[Kabwarabwaraan n iteraniba 32]

E boni karikia bwa Tatan te anera ae kororaoi aei ngke e rineia bwa e na kaitaraa te Atua