KANIKO RIKI MA TE ATUA

Te Kabebetenano Ibukia Akana Uruaki Nanoia

E TAKU temanna te aine ae te Kristian are e a tia ni kabokorakora ma karawawata aika bati ni maiuna: ‘N au iango e bon aki kona n tangirai Iehova ke ni butimwaeai.’ E kakoauaa neiei bwa e raroanako Iehova ma ngaia. E koaua bwa e rangi n raroanako Iehova ma akana taromauria aika tao a karawawataaki? E reke te kaeka ae kabebetenano n ana taeka te tia areru ae Tawita ake a kairaki koreaia iroun te taamnei n Taian Areru 34:18.

E ataia Tawita bwa e kona te tia taromauria Iehova ae kakaonimaki ni karekea mwin te rawawatannano ae korakora. Ngke te rorobuaka Tawita ao e karabarabaa mani kaeana n aki toki iroun Tauro are te uea ae bakantang, are e kakorakoraa ni kan tiringnga. E ukoukora kamanoana Tawita n te tabo are e taku n ana iango bwa e na aki kona Tauro ni kakaaea iai, ae abaia aia kairiribai ae Kate n aononi Biritia. Ma imwini kinaakina, e a reke birinakona maikanne ngke e bakaaea te rangirang. E neboa te Atua Tawita ibukini kamaiuana, ao e boboto korean Taian Areru 34 irouna n te baere e rinanona.

E kakoauaa Tawita bwa e rangi n raroanako te Atua ma akana a aitara ma rawawatan nanoia, a nimamate ke a namakinna bwa a aki manena n Ana taratara? E korea ae kangai Tawita: “E a kaan Iehova ma akana a uruaki nanoia, Ao E kamaiuia akana a raraoma tamneiia.” (kibuna 18) Ti na nora aroni karekean te kabebetenano ao te kantaninga n taeka akanne.

“E a kaan Iehova.” E taekinaki n te boki teuana bwa te kibuntaeka aei bon “te aro naba teuana ae taekinaki iai te Uea bwa e tataningamarau, e kakawakinira, e tatauraoi n ibuobuoki ao ni kamaiuia ana aomata.” E karaunano ataakin ae e boni kakawakinia ana aomata Iehova. E nori kangaanga aika a rinanona ana aomata i nanon “taai aika okoro aika karuanikai,” ao e atai naba nanoia.​—2 Timoteo 3:1; Mwakuri 17:27.

“Akana a uruaki nanoia.” N aaba tabeua, ao e kaineti taeka aika “uruaki nanoia” ma aki tangiraki. Ma n aron ae e taekinna te tia rabakau temanna, a kaineti ana taeka te tia areru ma “te nanokawaki ao te rawawata ae rangi ni korakora n te aro ae rababanako riki.” Eng, a bae n rinanoni kangaanga aika korakora taan taromauria te Atua aika kakaonimaki ike a kona n uruaki iai nanoia.

“Akana a raraoma tamneiia.” A kona n rangi ni mangori aomata n oin aia taratara n te aro are a a kabuaa aia kantaninga ni kabane ngkekei naba. E taekinaki n te boki ni kairiri ibukia taan raira te Baibara bwa tao e rairaki te kibuntaeka aei bwa “te koraki ake akea te bwai ae raoiroi ae a kantaningaia.”

Tera aron Iehova nakoia akana a “uruaki nanoia” ao n “raraoma tamneiia”? E koaua bwa e teiararoa ma ngaiia, e iangoiia bwa a aki riai n tangiraki ao n tabeakinaki irouna? Boni kaitaraan raoi anne te bwai ae riki! N aron te karo ae mwanokaa ao ni kabebetea natina n rawawatana, ai aron naba Iehova ni kaania taan taromauria ake a tang nakoina ibukini buokaia. E ingainga nanona ni kani kabebeteia ao ni karau nanoia akana uruaki nanoia ao n raraoma taamneia. E kona n angania te wanawana ao te korakora are a kainnanoia, bwa a aonga ni kekeiaki ribuakoni kataakia ake a aitara ma ngaai.​—2 I-Korinto 4:7; Iakobo 1:5.

E aera ngkai ko aki ukera arom ae ko kona ni kaaniaki riki iai ma Iehova? E berita ni kangai te Atua ae nanoanga: “I maeka . . . ma te aomata naba ae e raraoma tamneina ma n nanorinano, ba N na manga kamaiui tamneiia akana nanorinano, ma ni kamaiui nanoia akana raraoma.”​—Itaia 57:15, BG.