Ko Iangoiia Aomata Aika Mamaara n Aron Iangoaia Iroun Iehova?

1, 2. Bukin tera bwa e kona n nanoangaia aomata aika mamaara Bauro?

TI BANE n namakina te mamaara n taai tabetai. Ti kona n ituaki n aoraki tabeua ake a kona ni kamamaaraira n te aro are e a kangaanga iai kakaraoan ara mwakuri ni katoabong. Ngaia are iangoia bwa aongkoa ko rangi ni mamaara tiaki tii i nanon teuana ke uoua te wiki ma i nanon te tai ae rangi ni maan. Tiaki ko na kakaitau ngkana a kaotiota nanoangaam tabemwaang ngkana ko rinanon te aeka ni kangaanga aei?

² E ataa aron rotakin temanna te abotoro Bauro e ngae naba ngke e kamamaraaki ni karawawata mai nanon ao i tinanikun te ekaretia. A bati taai ake e iangoia iai bwa e a aki kona uotana. (2 I-Korinto 1:8; 7:5) Ngke e iaiangoi baika a riki ni maiuna Bauro ao karawawataana aika bati ngkai te Kristian ae kakaonimaki ngaia, e a taekina ae kangai: “Antai ae mamaara ao N na aki naba ngai mamaara?” (2 I-Korinto 11:29) Ao ni kaineti ma kaain te ekaretia ni Kristian aika kakaokoro ake e kabotauia Bauro ma bwain nako te rabwata, e taekinna iai bwa bon aomata aika “a rangi ni kainnanoaki . . . ake a taraa ni mamaara.” (1 I-Korinto 12:22) Tera ae nanonna iai? Bukin tera bwa ti riai n iangoiia aomata aika a taraa ni mamaara riki n aron iangoakia iroun Iehova? Ao ti na kanga ni kakabwaiaaki ni karaoan anne?

ANA IANGO IEHOVA IBUKIA AOMATA AIKA MAMAARA

3. Tera te bwai ae kona ni karirira bwa ti na iangoa ae aki raoiroi ibukia te koraki ake a kainnanoa te ibuobuoki n te ekaretia?

³ N ara bong aikai ao a bati ake a bwainikirinia te koraki aika mangori ao ni mamaara bwa a aonga ni karekei baika a tangiri. A kakoauaa bwa e riai ni marurung ma ni korakora te aomata ngkana e nakoraoi maiuna. Ti aki riai n tarariaoa te aeka n aroaro anne, ma ti boni kona n aki namakina rikiraken te iango ae buakaka ibukia te koraki ake a kainnanoa buokaia ni katoatai ao n te ekaretia naba. Ma ti boni kona ni karikirakea te iango ae nakoraoi riki ae ai aron ana iango te Atua.

4, 5. (a) E kanga kamatataan 1 I-Korinto 12:21-23 ni buokira bwa ti na katotonga aron Iehova n iangoi mamaaraia aomata? (b) Ti na kanga ni kona ni kakabwaiaaki ni buokaia aika mamaara?

⁴ Ti kona ni karekea te ataibwai ni kaineti ma aron ana iango Iehova, ibukia aika mamaara man te kaikonaki ae koreaki n ana moan reta Bauro nakoia I-Korinto. Ni mwakoro 12 ao e kauringira Bauro bwa e ngae ngke e aki tamaroa bwain te rabwata ke ae te kabanea ni mamaara ma e boni kainnanoaki. (Wareka 1 I-Korinto 12:12, 18, 21-23.) E a tia ni kabuakakaaki kanoan te iango aei ibukini bwain nako rabwatan te aomata irouia tabeman ake a kakoauai rikini bwaai i bon irouia. Ma e kaotaki ni mwin taiani kakaae i aoni bwain te rabwata ake a a tia n iangoaki ngkoa bwa akea bonganaia ma a boni karaoi mwakuri aika rangi ni kainnanoaki.a N te katoto, a nanououa tabeman ibukini bonganan te taboniwae ae uarereke ma e a iangoaki ngkai bwa iai bonganana ibukini kabaerantan te rabwata ni kabane.

⁵ E kamataataa Bauro bwa a bane ni bongana kaain te ekaretia ni Kristian. E iangoiia ana toro ni kabane Iehova n ikotaki naba ma te koraki ake a taraa ni mamaara riki bwa “a rangi ni kainnanoaki” ao tiaki aron Tatan are e kakeai bongaia aomata. (Iobi 4:18, 19) E riai te iango anne ni buokira n tatabemanira nako bwa ti na namakina te kukurei ni mwiokoara n ara ekaretia ao arora n riki bwa kaain ana botaki te Atua ae katobibia te aonnaba. N te katoto, iangoa te tai teuana ngke ko tauraoi ni buoka te aomata ae e a kara are e kainnanoa te ibuobuoki. Ko bae n tia ni kaangaraoa am tai ibukini buokana. E aki ngkanne riki te ibuobuoki are ko anga bwa te bwai ae manena ao e karekea naba nakoim te kukurei? Eng, ngkana ti karekei baika kainnanoi tabemwaang, ti a namakina iai te kimwareirei n tabeakinaia ao ti karikirakea te taotaonakinnano, te tangira ao ti ikawai n te onimaki. (I-Ebeto 4:15, 16) E tangirira Tamara ae tatangira bwa ti na iangoia tarira n te ekaretia bwa a bane ni kakawaki, e ngae ngke iai tian aia konabwai ma a boni kaotiota te nakoraoi ao te tangira.

6. E kanga Bauro ni kabonganai taeka aika “mamaara” ao “korakora” n taai tabetai?

⁶ E kakannongora bwa ngke e kororeta Bauro nakoia I-Korinto, e kabongana te taeka ae “mamaara” ni kabwarabwaraa iai aron aia iango naake tiaki taan onimaki ibukia Kristian ake n te moan tienture, n ikotaki naba ma arona n iangoia i bon irouna. (1 I-Korinto 1:26, 27; 2:3) Ngke e taekinia Bauro te koraki ake a “korakora,” e aki nanonna bwa a na namakinna tabeman Kristian ae a kakannato riki. (I-Rom 15:1) Ma e taekinna bwa a riai Kristian aika rabakau riki n taotaon nanoia nakoia te koraki ake a tuai n nene raoi wakaaia n te koaua.

TI KAINNANOA KANGARAOAN ARA IANGO?

7. Tera ae kona n tukira bwa ti na aki buokiia naake a tangira buokaia?

⁷ Ti aki tii kakairi iroun Iehova ngkana ti buoka “ae akea ana bwai,” ma ti karekea naba akoara mairouna. (Taian Areru 41:1, BG; I-Ebeto 5:1) Ma ni koauana, ti kona n tukaki mani buokaia te koraki ake a tangira te ibuobuoki n taai tabetai, ngkana ti iangoiia n te aro ae aki raoiroi. Ke ti kona n namakina te maamaa ao ni kararoaira ma te koraki ake iai aia kangaanga ibukina bwa ti aki raoi ataa te bwai ae ti na taekinna. E taku Cynthia,b ae te tari te aine are e kitanaki irouni buuna: “E kona ni kammaraki ngkana a aki tabeakiniko taari ke e aki karaoaki ae ko kantaningaia mairouia raao ni koaua. Ngkana ko rinanoni kataaki, ko bae ni kainnanoia aomata ake i rarikim.” E a tia Tawita ngkoa n aki tabeakinaki irouia raoraona.—Taian Areru 31:12.

8. Tera ae na buokira ni kaotiota riki te nanoanga?

⁸ Ti na bae n nanoanga riki ngkana ti ururinga ae a a tia tabeman taari mwaane ao aine aika tangiraki iroura ni kamamaraaki ni kangaanga aika karuanikai n aron te maiu ni kainnano, maekaia n te mwenga ae a kaokoro aia Aaro kaaina ke aroia ni kekeiaki ribuakon te rawawatannano. Ti na bae naba ni kaaitara ma te aekaki anne n te bong teuana. A kauringaki tibun Iteraera ake a maiu ni kainnano ao ni mamaara n te aba are Aikubita, bwa a na aki ‘kamatoai nanoia’ nakoia tariia ake a karawawataaki imwain rinia n te Aba ni Berita. E kantaningaiia Iehova bwa a na iangoiia te koraki ake a maiu ni kainnano bwa e kakawaki buokaia.—Te Tua-Kaua 15:7, 11, BG; Nakoaia Ibonga 25:35-38.

9. Tera ae moanibwai iroura ni buokaia naake a kaitaraaki ma taiani karawawata? Kabwarabwaraa.

⁹ N oneani mwin are ti na riki bwa taani motikitaeka ke taan aki onimakinia aomata, ti riai n anga te karaunano ni bwaai n taamnei nakoia naake a kaitaraaki ma baika aki kantaningaaki. (Iobi 33:6, 7; Mataio 7:1) Aio kabwarabwaraana: N rokon te tia rebwerebwe ae ikoaki n te kabuanibwai n te kawai n ruun te onnaoraki are tabe ma aoraki aika karina, a na kataia taani mwakuri iai n iangoia bwa e boni karika te kabuanibwai teuanne? A aki, ma a na waekoa ni karaoa te ibuobuoki nakon ikoakina. N aron naba anne, ngkana e a tia ni kamamaraaki ni bon oin ana kangaanga temanna raora n te onimaki, e moanibwai iroura anganakina te ibuobuoki ni bwaai n taamnei.— Wareka 1 I-Tetaronike 5:14.

10. A kanga ni “kaubwai n te onimaki” tabeman, e ngae ngke a taraa ni mamaara riki?

¹⁰ Ngkana ti iaiangoi moa aia kangaanga tarira, ti kona n iangoia bwa a taraa n aki mamaara. Iangoia taari aine ake a a tia n nanomwaaka ni kaitaraakia irouia aia utu i nanon ririki aika bati. A kona tabeman n taraa n nanorinano ao ni kai rotaki, ma e koaua bwa a aki kaotiota aia onimaki ae rianako ao aia kakorakora? Ngkana ko nora te tina ae akea buuna ni kakaaei bobotaki n te ekaretia ni katoatai ma natina temanna ke aika a bati, e aki anaaki nanom n ana onimaki ao ana kakorakora? Ao tera aroia ataei aika tebwi tabun aia ririki ake a nimta te koaua n aki ongei kaririakia ni baika bubuaka n te reirei? Ti kinaia naake a taraa ni mamaara riki bwa titeboo ma a “kaubwai n te onimaki,” n aroia naba aomata aika i buakora aika nakoraoi riki aroia.—Iakobo 2:5.

KANGARAOA AM IANGO N ARON ANA IANGO IEHOVA

11, 12. (a) Tera ae na buokira ni kaangaraoi ara iango ibukia aomata aika mamaara? (b) Tera reireiara n aron Iehova nakon Aaron?

¹¹ Ti buokaki ni kaangaraoa ara iango ibukia aomata aika mamaara n aron ana iango Iehova n arona ni kaetii kangaanga ake a irekereke iai ana toro tabeman. (Wareka Taian Areru 130:3.) N te katoto, ngke arona bwa ko mena irarikini Mote n te tai are e karaoaki te boua ae te koora ae te kao te teei iroun Aaron, tera am namakin ibukin Aaron ngke e kaekai bukinana n aaro aika bati ni karaoan anne? (Te Otinako 32:21-24) Ke tera arom n iangoa aroaron Aaron ngke e kaririaki irouni mwanena ae Miriam bwa e na kakanikoa Mote are e mare ma te ianena? (Warekaia Iteraera 12:1, 2) Tera am namakin ngke a kabwaka Aaron ao Mote ni karaoiroa Iehova n te tai are E anga te ran i Meriba n te aro ni kakai?—Warekaia Iteraera 20:10-13.

¹² E na bae ni katuuaaeaki Aaron iroun Iehova ibukini karaoani kairua akanne n te tai naba arei. Ma E ataia bwa tiaki te aomata ae buakaka Aaron ke e karaoa te bure ae kakaiaki. E taraa n ae e kariaia Aaron bwaai aika riki ke kariri mairouia tabeman ake a katannakoa mani karaoan ae eti. E ngae n anne, ngke e tuangaki kairuana, e kakoauai ao e tauraoi ni butimwaei ana moti Iehova. (Te Otinako 32:26; Warekaia Iteraera 12:11; 20:23-27) E rineia Iehova bwa e na kaatuua ana iango n ana onimaki Aaron ao arona n rairannano. E teimatoa n ururingaki Aaron ma kanoana n tienture ake imwina bwa aomata aika mamaaka Iehova.—Taian Areru 115:10-12; 135:19, 20.

13. Tera ae ti kona n neneria ibukin ara iango ibukia aomata aika mamaara?

¹³ Ngkana ti na kaangaraoa ara iango n aron ana iango Iehova, ti riai n neneri ara iango ibukia te koraki ake a taraa ni mamaara. (1 Tamuera 16:7) N te katoto, tera arora nakon te ataei ae tebwi tabun ana ririki are e aki kaotiota te wanawana n rinean ana kaakibotu ke e kaotiota te aroaro ae buakaka? N oneani mwin are ti na kabuakakaa n te aro ae riao, e aera ti aki iangoi baika ti na karaoi ibukini buokana bwa e na rikirake ni bwaai n taamnei? Ti kona ni biririmoa ni buoka temanna ae kainnanoa te ibuobuoki ao mani karaoan anne, e na bon rikirake iai wanawanara ao ara tangira.

14, 15. (a) Tera ana namakin Iehova ibukin aki ninikorian Eria n te tai ae kimototo? (b) Tera reireiara man te baere e rinanona Eria?

¹⁴ Ti buokaki naba ni karababaa ara iango ibukia tabemwaang rinanoni kabotauan ara iango ma ana namakin Iehova nakoia ana toro tabeman ake a iangoia bwa a bwarannano. Temanna mai buakoia bon Eria. E ngae ngke e a tia teuanne n ninikoria ni kaaitaraia ana burabeti Baara aika 450 mwaitiia, ma e birinako mairoun te Uea n Aine ae Ietebera ngke e ataia bwa e bouruakina kamateana. Imwin ririannana n te raroa ae tao 150 te kiromita nako Beerateba, e rokoroko naba n te rereua. E rotaki n te kua te burabeti man ririannana aei i aan te riringa ao e a tekateka i aan te aroka ao “e bubuti i bon i bukina ba e na mate.”—1 Uea 18:19; 19:1-4, BG.

¹⁵ Tera ana namakin Iehova ngke e a nora ana burabeti mai karawa ae kakaonimaki bwa e a bwara nanona? E ribaa ana toro ibukina bwa e rotaki n te rawawata ao n aki ninikoria i nanon te tai ae kimototo? Bon tiaki ngaia anne! E atai Iehova tian ana konabwai Eria ao E kanakoa te anera. E kaungaaki Eria iroun te anera uoua te tai bwa e na amwarake. Ma ngaia are e a aki ‘rangi n raroa te kawai irouna’ ni mwanangana are imwina. (Wareka 1 Uea 19:5-8, BG.) Eng, imwain raoi are e anga taiani kaetieti Iehova, e kakauongo nakon ana burabeti ao e karaoi mwakuri aika manena ibukini kakorakoraan teuaei.

16, 17. Ti na kanga ni kakairi n ana mwamwannano Iehova nakon Eria?

¹⁶ Ti na kanga ni kakairi n ana mwamwannano te Atua? Ti aki riai ni waekoa n anga te reirei ni kairiri. (Taeka N Rabakau 18:13) E raoiroi riki ngkana ti karekea moa ara tai ni kaotiota mwannanoaia te koraki ake tao a iangoiia bwa a “aki rine” ibukin aia kangaanga n tatabemania nako. (1 I-Korinto 12:23) Imwin anne, ti a tauraoi ni karaoa te mwakuri n te aro ae eti n aron ae kainnanoaki.

¹⁷ N te katoto, iangoa Cynthia, are taekinaki mai moa are e kitanaki ma natina aine aika uoman irouni buuna. A a bon tiku n tii ngaiia. Tera aroia raoia aika taani Kakoaua tabeman ni buokiia? E kabwarabwaraa ni kangai: “Imwin tarebooniakia iroura ni kaongoia te bwai ae e a tia n riki, a a bon roko naba n ara auti imwaini koron 45 te miniti. A boni waanako rannimataia. A tiku i rarikira i nanon uoua ke tenua te bong. Ibukina bwa e aki tau kanara ao a rangi n uruaki nanora, a a butimwaeira taari ni kawakinira ni mwengaia i nanon tabeua te tai.” Ibukin anne, ko bae n ururinga te baere e koreia Iakobo ae kangai: “Ngkana akea ana kunnikai te tari temanna ae te mwaane ke te tari te aine, ao e aki tau kanana ni katoabong, ma ngkana e kangai temanna iroumi nakoia: ‘Naako ma te rau, kam na kaabueingkami ao kam na kanuaingkami,’ ma ngkana kam aki angania baika a kainnanoi ibukin rabwataia, ao tera uaan anne? N aron anne, e mate naba te onimaki ngkana e aki raonaki n taiani mwakuri.” (Iakobo 2:15-17) Ti kakaitau n aia boutoka taari n te tabo anne are roko raoi n taina, bwa a a reke korakoraia Cynthia ma natina aine ni beku bwa auxiliary bwaiania, onoua te namwakaina imwin raoi aia kangaanga ae kauruakinano.—2 I-Korinto 12:10.

A BATI AIKA KAKABWAIAAKI

18, 19. (a) Ti na kanga ni kona ni buokiia te koraki ake a mamaara i nanon te tai ae uarereke? (b) Antai aika a kakabwaiaaki ngkana ti buokiia te koraki aika mamaara?

¹⁸ Ko bae n ataia man te baere ko rinanona bwa e kona ni kainnanoaki te tai ae bati ibukini kamarurungan te iango man te aoraki ae wenemaan. Ai aron naba anne, e kona ni kainnanoa naba te tai ae bati te Kristian are e a tia ni kamamaraaki n oin ana kairua ke ni kangaanga aika kakaiaki ibukini manga kakorakoraan ana onimaki. Ni koauana, e kainnanoa kakorakoraan ana onimaki tarira n te ekaretia rinanon te reirei n ukeuke i bon irouna, te tataro ao karaoani mwakuri ni Kristian tabeua. Ma ti na bwaina te taotaonakinnano ni karokoa e a manga oki korakoran ana onimaki? Ao n te tai are e tabe iai n okioki korakoran ana onimaki, ti na nanomwaaka ni kaotiota te tangira nakoina? Ti na kakorakoraira ni buokiia te koraki ake a mamaara n te tai ae uarereke bwa a na namakinna ae a tangiraki ao a rangi ni kakawaki n te ekaretia?—2 I-Korinto 8:8.

¹⁹ Tai mwaninga bwa ngkai ti karekea te boutoka mairouia tarira n te ekaretia, ti namakina te kimwareirei are e tii kona n reke man te anganga. Ti karikirakea naba oini konabwaira ni kaotiotan te nanoanga ao te taotaonakinnano. Ma e bati riki ae kona ni kaotiotaki. E rikirake bwainan te akoi ao te tangira i nanon te ekaretia ni kabane. Ma ae moamoa riki, ti kakairi iroun Iehova are e iangoiia aomata ni kabane bwa a kakawaki. Eng, bon iai bukina aika raoiroi iroura ni kabane ngkai ti toua mwin te kaungaunga ni “buokiia ake a mamaara.”—Mwakuri 20:35.