Kakairi Irouia Burabeti n Aron Amota
1. Bukin tera bwa e kona n riki ana katoto Amota bwa nibwani kaungaakira?
1 Ko a tia n namakinna bwa ko aki tau n uarongorongo ibukin uarereken am reirei ao ko nako man te utu ae mangori? Ngkana ngaia anne, ko kona ni kaninikoriaaki man ana katoto Amota. Bon te tia kawakin tiibu ngaia ao te tia kiniki uaanikai naba n taai tabetai, ma e kakorakoraaki iroun Iehova bwa e na tataekina te rongorongo ae kakawaki. (Amota 1:1; 7:14, 15) N aron naba anne, n ara bong aikai ao e kabonganaia Iehova te koraki ake a nanorinano ao ni mangori. (1 Kor. 1:27-29) Baikara riki reireiara ibukin ara mwakuri ni minita aika ti kona n reiakin mairoun te burabeti are Amota?
2. Bukin tera bwa ti kona n teimatoa n nene ni kaitaraakira n ara mwakuri ni minita?
2 Teimatoa n Nene ni Kaitaraakim: Ngke e ongo ana taetae ni burabeti Amota, Amatia ae te tia taromauria te boua ae te kao te teei ao te ibonga n te tautaeka n uea ae Iteraera ni baronga ake tebwina mai meang, ao ai aron ae e taetae nakon Amota ma te un ni kangai: ‘Nakoni mwengam! Katikuira ma arora! Bon iai ara Aro!’ (Amota 7:12, 13) E uaraoa ana taeka te burabeti, Amatia n ana bubutii nakon te Uea are Ieroboam bwa e na katoka ana mwakuri Amota. (Amota 7:7-11) Ma e aki maaku Amota. Ni boong aikai, a kakorakoraia n ukera ana kariaia te tautaeka tabeman mataniwin Aaro bwa a na bwainikirinia ana aomata Iehova. Ma e ngae n anne, e karaunanora Iehova bwa bon akea te kai ni buaka ae karaoaki n ekiranako ae e na tokanikai.—Ita. 54:17.
3. Baikara uoua iteran ara rongorongo ae ti tataekinna ni boong aikai?
3 Tataekina Ana Motikitaeka te Atua ao Kakabwaia n Taai Aika A na Roko: E ngae ngke e taetae ni burabetina te motikitaeka Amota ibukin te tautaeka n uea ae Iteraera ni baronga ake tebwina, ma e motikia n taekinna ni bokin te Baibara ae e oti iai arana, taekan ana berita Iehova ibukini manga katean te kaawa ao kakabwaia aika mwaitikurikuri. (Amota 9:13-15) Ti tataekina naba rokon ana “bong ni motikitaeka” te Atua, ao bon tii aei iteran “te rongorongo ae raoiroi ae taekan te tautaeka n uea” ae ti riai n tataekinna. (2 Bet. 3:7; Mat. 24:14) E na kauka te kawai nakon te maiu are aki toki i aon te aba, kamaunaaia aika buakaka iroun Iehova n Aremaketon.—TaiAre. 37:34.
4. Tera te karaunano ae ti karekea bwa ti aonga ni kakororaoa nanon Iehova?
4 E tuoaki raoi ara motinnano bwa ti na maiuakina nanon ara katabu ao ni karaoa nanon Iehova, ngkana ti tataekina rongorongon te Tautaeka n Uea n te aonnaba ae a bati iai taani kakaaitara. (Ioa. 15:19) Ma e ngae n anne, ti kakoauaa bwa e na teimatoa Iehova ni katauira bwa ti na kakororaoa nanona n aron are e karaoia nakon Amota.—2 Kor. 3:5.